Sermon Jamita Minggu-Mateus 14: 22 – 33

 

Sermon Jamita Minggu

Minggu X Dung Trinitatis, 9 Agustus 2026

Posma Rohamuna, Unang Hamu Mabiar

Tenanglah Jangan Takut

Mateus 14: 22 – 33

 

I.Patujolo

Adong 2 siberengonta marhite turpuk jamita tu Minggu 09 Agustus 2026 on. Naparjolo, ima taringot songon dia ngolu panghobasion   ni   Jesus   gabe   tiruan   di   hita   jolma.   Na paduhaon,  gabe  tubu  panindangion  ni  angka  sisean  na mandok: “Tutu do Ho anak ni Debata”. Ima songon doktrin manang dogma taringot “ise do Jesus” marhite panindangion ni buku panurat Mateus i. Alani jumolo ma jo tauhal taringot Doktrin: “ise do Jesus i”, barupe sahat hita muse tu parngoluan siganup ari marhite na maniru ngolu panghobasion ni Tuhan Jesus. ima boi do ta dapot di ayat 33 i: tutu do ho anak ni Debata, di bahasa Indonesia: engkau adalah Anak Allah. Di Bibel PB Pandohan “anak ni Debata”, adong tadapot 231 hali, molo holan buku Evanggelium  76  hali  jala  holan  panindangion  ni  Jesus taringot tu dirina sandiri adong 65 hali. Molo di ha-Jahudion Pandohan “anak ni Debata”, marhadomuan doi tu peran ni Mesias  manang  Kristus.  Ima  tudutudu  tu  sahalak  raja  na ditodo Debata laho pasikophon bagabagaNa tu tonga-tonga ni bangsoNa. Ibana ma gabe parhiteon laho paturehon partalian na imbaru di Debata dohot bangsoNa. Dietong do Ibana songon  sahalak  partogi  na  manjalo  Sahala  sian  Debata. Songon raja na ditodo Debata. Adong do parasingan haporseaon Halak Jahudi dohot hakristenonta. Ima Ndang sahat dope pangantusion ni hajahudion taringot Debata gabe jolma. Laos songoni do pangantusion ni angka sisean, na manghatindangkon  “tutu  do  Ho  anak  ni  Debata”  holan sebatas Mesias dope manang dang dihaporseai dope Debata gabe jolma.   Alai marhite turpuk i, na tahaporseai Ibana do Mesias  dohot  Tuhan.  

II. Hatorangan Ni Turpuk 

    Boi  doi  tabereng  marhite  ulaonNa, Ibana mardalan diatas ni aek jala boi di paso Ibana alogo na mangguncang aek i. Toho ma isi ni panindangion haporseanta di ponggol paduahon: “ahu porsea di Jesus Kristus, anak ni Debata na sasada… ido Tuhanta...”. Ndang na paboahon partalian  pardagingon,  alai  naung  ta  haporsea  do  Ibana: Debata gabe jolma (Allah Menjadi manusia). Bahasa Junani didok: Theos ho uios jala bahasa Latin:  Deus Filius, manang bahasa Inggris: God The Son. Lapatan sasintongna ima: Debata gabe Anak (Allah putra atau Allah menjadi Anak). Boasa boi Debata gabe jolma (inkarnasi), ima alani hadirionNa songon sipanompa dohot na marhuaso. Na ro do Ibana marhite tompaan daging laho manopot hita jolma tu portibion. Alani ma antong tung mansai marasing doi : jolma gabe Debata dohot Debata gabe jolma (hakristenon). Na sintong ima Jesus do Tuhan, jala ido songon pamusatan pangantusion di pangajarion ni hakristenonta, na tadapot marhite buku bibelta i. Ai dibaritahon do angka panghobasionNa marhite na patupa ragam ni halongangan (mujizat), manesa dosa (pengampunan dosa) dohot haheheonNa (kebangkitanNya). Asa naeng ma tapeop hata haporseaon na tadok siganup ari minggu i, ima hata haporseaon na dirumushon angka bapa gereja marhite Konsili Nicea (taon 325 M) dohot Konsili Konstantinopel (taon 381M). Molo pe adong Halak parugamo na asing mangaleai isi ni haporseaonta i, na mandok: ai na maranak do Debata jala ise do  omakna?    Asa unang pola  gabe  ganggu  hita di  angka pandohan nasida i.

3.   Songon  dia  ngolu  panghobasion   ni  Jesus  dohot  angka siseanNa, ima na gabe tiruan di hita si ihuthon Ibana. Di sude panghobasioNa   diula   do   marhite   na   mangajari   dohot pamalum angka sahit, jala disorohon do muse laho martangiang. Dibagasan  turpuk jamita on, disuru Jesus do angka sisean i asa jumolo lao marparau. Ingkon mangalap gogo do nian nasida, asa laho muse manguduti ulaonna tu nasa angka huta tu huta laho marbarita nauli. Alai dipangke Jesus do tingki holan sahalakNa martangiang. Dungi di dapothon   ma   angka   sisean   naung   marparu   marhite   na mardalan di atas ni aek.  Pola do mabiar angka sisean i jala songon na mamareng tondi (begu). Gabe ruar ma pandohan ni Jesus tu angka siseanNa: "Pos ma roha muna unang hamu mabiar". Dung dibege angka siseani na Tuhan ido hapena, gabe naeng didapothon si Petrus ma muse alai naeng lonong ala ganggu ni rohana jala na parpudi gabe tubu panindangion: “Tutu  do  Ho  anak  ni  Debata”.  Aha  do  na  boi  tabereng marhite saluhut na masa i?

a.    Ringkot do martangiang. Mamangke  holan sahalak niba laho manghatai tu Tuhani, asa sian i boi jumpang pangalapan  gogo  laho  mangula  si  ulaon.  Songoni  do muse Tuhan Jesus dipatuduhon Ibana do tu hita, nangpe Ibana Tuhan alai asa gabe tiruan di hita marhite na disahanghaon Ibana laho martangiang (manghatai) tu AmaNa na di banua ginjang.  Marhite na martangiang do hita manghatai tu Debata laho mangido gogo dohot pasahathon sude nasa arsak ni ngolu. Dibagasan ngolu sipartanging do dalanta laho mangorom roha loja dohot roha muruk. Molo nunga martangiang hita, disi ma jumpang roha na imbaru. Di turpuk jamita on, dipatuduhon Jesus do dibagasan ngoluna, ima songon parsitutuonNa di ulaonNa laho mangajari angka na torop dohot    pamalum    nasa    angka    sahit    huhut    gabe sipartangiang. Asa songoni ma nian ngolu ni angka na porsea tarlumobi angka naposoNa, ringgas mangula siulaonna asa gabe siboan lasni roha hombar tu lomoni roha di Debata jala di sangahon tingki laho martangiang.

b.    Nampuna    haporseaon.    Haporseaon    ima    posniroha maralahon roha na ganggu. Sude do halak seadong biar ni roha songon si Petrus i. Alai asa tapangke ma haporseaonta laho maralahon angka nasa galumbang na sai manosak pardalan ni ngolunta. Molo tapangke posni rohanta, tontu tahaporseai na adong do Ibana di lambungta. Naso jadi pasombuonNa hita madabu jala na tuk  do  Ibana  pasohon  galumbang  na  bolon  i.  Sapala naung  tapasahat  tu  Tuhani  sandok  nasa  ulaonta,  asa

tahangoluhon ma haporsean i. Unang ganggu hita laho mangalakahon laho manopot Ibana, nangpe ro alogo i. Porsea do si Petrus alai ganggu dope dagingna alani gogo ni alogo i. Antong asa tapasada ma dagingta dohot posnirohanta laho maralahon gogo ni alogo na sai manggugai ngolunta on. Ai molo Nunga porsea tu Ibana mansuru hita, tontu dao ma sian ganggu ni roha. Asa unang songon nidok ni Jesus tu si Petrus: “eh ho siotik haporseaon, aha ma pola ganggu roham”. Alani ingkon pos do rohanta molo nunga porsea hita di Ibana hape.

c.    Ngolu na marpanindangion. dibaritahon panurat Mateus do muse, naso holan posniroha laho mangihuthon Tuhan Jesus, alai ingkon sahat do hape muse tu ngolu na marpanindangion. Ima panindangion na ruar sian pamangan. Songon nidok ni angka sisean i: “Tutu do Ho anak ni Debata”. Jesus do Tuhan ni saluhutna, Debata gabe jolma, na ro tu portibon gabe anak.

 

III. Sipahusor-husoron. 

        Songon  angka  sisean  na  dibagasan parau ido hita, ima na mangadopi persoalan ni ngolu, gabe ganggu roha alani boban na mansai dokdok. Songon alago na manghutur pardalan ni ngolunta. Alai unang lupa hita, Tuhan Jesus na sai tongtong mandongani hita didia pe hita mangula si ulaon. Songon nidokNa tu angka sisean i: “Ahu do, unang hamu mabiar”. Asa nian unang pintor mabiar hita, alai ta paloas ma rohanta di Ibana. Na marhuaso do Ibana laho pasohon nasa persoalan ni ngolunta,  asalma posrohanta di Ibana huhut mambahen ngolunta fokus di Ibana. Fokus ma hita di Ibana, unang fokus tu galumbang na manggugai parngolunta. Ai molo fokus do hita tu persoalan ekonomi, sahit, dohot angka na asing, ido na mambahen hita gabe lonong. Alai molo fokus do hita di Tuhan Jesus, na marhuaso pasohon angka galumbang ni portibion, na boi do tutu mardalan hita di atas ni aek i nangpe gogo galumbang i jala bagas aek i. Jesus do Tuhan, ima Debata na ro gabe jolma tu portibion. Antong tu Ibana ma tapasahat sandok pardalanan ni ngolunta. Sai dongananNa do hita mangadopi nasa angka galumbangi jala dang loasonNa hita laho lonong tu bagasan aek i.

 

 

 

Berbagi :