Sermon Epistel-Partangiangan:Psalmen 62: 1 – 5

Sermon Epistel-Partangiangan

Minggu X Dung Trinitatis, 09 Agustus 2026

Posma Rohamuna, Unang Hamu Mabiar 

 Psalmen 62: 1 – 5

 I.Patujolo

    Pos ni roha ima songon hadirion ni hita jolma. Nang pe malo manabunion hadirion na be, alai molo so adong posniroho, tontu gabe se ganggu do manang adong biar ni rohana laho mangulahon. Songoni do na tabereng di si Petrus di atas ni parau i. Hira halak na pos situtu do rohana laho mandapothon Jesus, hape ganggu do rohana. Gabe naeng lonong ma ibana tu bagasan aek i. Molo di turpuk jamita partangiangan on, dipatuduhon si Daud do posnirohana tu Debata. Pola do dibahen si Daud, ende laho mamuji Debata jala didok: tu Debata   sambing   do   Marhuraja   rohangku   (di   bahasa Indonesia: hanya dekat Allah saja aku tenang). Lapatanna molo nunga didapothon Debata marhite ulaon parsombaonna, disi do jumpang ni si Daud roha na dame manang dao sian ganggu  ni  roha.  Sai  hira  na  lupa  do  ibana  sian  bahaya ancaman ni angka musuna. Ai na hea do si Daud dilelelele si Saul manang si Absalom. Pola do diae si Daud hasusaan ni ngolu, na digombarhon songon dorpi na jomba (dinding yang miring) manang songon parik na matorpas (tembok yang hendak roboh). Songon  na mago  do  pangkilaan  na jomba dohot na matorpas i, molo marhuraja ibana tu Debata. Ima na tabereng di syair karangan ende ni si Daud on, borhat sian pengalaman ni ngoluna. Makna ni ende on, asa na mengendehon dohot na mambege olo pajonokhon ngoluna tu Debata huhut mambahen Ibana gabe partanobatoanna.

II.Hatorangan Niturpuk 

    Songoni do nang parpslamen on, didok holan tu Debata sambing do Ibana marhuraja. Alai molo deba jolma didok parpsalmen i: olo do margabus laho manjalahi hasangaponna jala di  hatana songon  laho mamasu-masu  hape  mamburai. Nian dang sude songoni angka jolma alai di pengalaman ni parpslamen i songoni ma.

 3.   Aha do tona ni jamita partangiangan on? alusna:

a.   Tapajonok ma ngolunta tu Debata. Dalan pajonok ngolu tu Debata  ima,  marhite  ngolu  ni  halak  na  pasomal-somal dirina     tu    hadaulaton.    Dang    tading    ngoluna    laho martangiang dohot  marende  mamuji  pasangaphon  Ibana. songoni do muse na manangihon hata ni Debata marhite ulaon di huria dohot na manjaha hataNa di buku nabadia i. Dang salpu sada ari ia so jumolo laho manangihon hata ni Debata,  ima  tanda  parsitutuon  laho  pajonokon  diri  tu Debata. Sian ragam ni kesibuk ni angka ulaona laho mandiori ngolu siganup ari, alai sai disorohon do tingkina muse laho manangihon hata ni Debata.

 

b.   Ibana ma partanobatoanta. Tutu do arta, hamoraon dohot huaso di jabatan boi mambahen las  rohanta. Ai marhite angkai, gabe sangap do hita dijolo ni angka dongan jolma. Alai saluhutna angka i, ndada boi mambahen sonang salelengna. Molo nunga mago saluhut na i sian ngolunta, boi do hita di halupahon dongan jolma. Songoni muse gabe parohon sahit manang arsak alani so malo hita mamangke. Alani ma muse na gabe tona ni jamita partangiangan on, naeng manosoi hita asa mambahen Debata gabe partanobatonta (gunung batu dan kota benteng). Molo Debata do tabahen gabe partahannanta, sai jumpang hita ma antong haulion ni ngolu. Gabe dipadao do hita sian angka musunta sinuaeng on. Musu ni ngolunta, ima angka na           mambahen   hita   gabe   marsak,   dohot   ragam   ni parasahiton ni ngolu. Boi halak gabe marsahit alani artana, hamoraonna dohot jabatanna molo dang dibahen jumolo Debata gabe partanobatonna.

 

4.   Aha do sipamanatonta diparngoluan hita jolma? Alusna ima: Debata do silehon haluaon alai sipata olo do jolma mambahen ngolu parugamoon gabe siului hasangaponna tu diri sandiri.

III.Hatorangan Ni Turpuk 

    Diula pe parugamoon, alai ndang laho patuduhon unduk ni roha tu Debata. Adong dope na memperalat agama, manjou goar ni Debata holan laho mangalului kepentingan sandiri. Didok marugamo hape songon halak atheis, ala ndang adong biar ni  rohana di  Debata naso  manghalomohon  hajahaton. Marsangkap sahat tu na mangulahon, laho mambunu dongan jolma. Asa tatangiangkon ma negaranta Indonesia on, marningot ulang tahun kemerdekaan na pa81-hon. Asa tongtong boi dihatindangkon jala diulahon sude rakyat Indonesia, paboa naung merdeka jala Debata do na mangalehon kemerdekaan manang haluaon i. Ima songon na tarsurat di pembukaan undang-undang dasar 1945 alinea pa3- hon: Atas berkat rahmat Allah yang Maha kuasa. Asa marhitehon i ma nian sude rakyat Indoensia unang mangasahaon huaso hasangaponna, alai di ingotma na Debata do silehon haluaon i. Negaranta on dang negara agama, alai negara beragama do. Ima negara Indonesia na porsea tu Debata. Unang be nian tabege adong di orai laho beribadah tu Debata. Hita halak Kristen tongtong ma gabe tiruan di ngolu parugamoon. Marsomba ma hita tu Debata marhite tangiang dohot ende pujipujian huhut mangulahon nasa angka na tajamitahon manang na tatangihon i. Asa gabe tiruan ma hita di donganta jolma jala boi dibereng Debata.

Berbagi :