SERMON JAMITA MINGGU-Josua 21: 43 – 45

SERMON JAMITA MINGGU

Minggu IX Dung Trinitatis, 2 Agustus 2026

Sai na Saut do Na Pinarbaga ni Jahowa Semua Janji Tuhan Dipenuhi Josua 21: 43 – 45

I.Patujolo

    Hamu angka dongan Parhalado ni Tuhanta na hinolongan, marhite turpuk Josua 21:43-45 on, nunga sahat hita tu sada hatorangan na gabe pangujung ni sandok ulaon panaluhon tano Kanaan. Turpuk on dipajongjong gabe "Gong Teologis" manang pangujung ni sandok pardalanan na borat, dung salpu paraloan jala loja mambagi parjambaran ni angka suku (Pasal 1-21). Dison ma dipatupa sada panindangion (proklamasi) na balga: Paboa Debata Jahowa i, sada pe sian bagabagaNa ndang adong na tartading manang na sega. Secara sastra, on margoar Doxology (pujian), i ma sada klimaks na manggombarhon paboa pardalanan ni Israel nunga sahat tu garis finish. Turpuk on paingotton hita laho mamereng tu pudian (retrospektif), laho manghatindangkon hasetiaan ni Debata uju hita mangadopi tantangan di joloan on.

II.Hatorangan Ni Turpuk

    Molo tapamanat sian hata asli ni turpuk on, adong tolu pondasi haporseaon na gabe siingoton ni hita.

    Na parjolo, i ma hata nātan (mangalehon) di ayat 43. Sahalak teolog na margoar Trent Butler paboa tano Kanaan i i ma gift (silehonlehon/anugerah), ndada hasil ni gogo manang prestasi militer ni Israel. Jotjotan do hita songon Parhalado merasa ulaon di huria i gabe hasil ni haboiononta manang manajemen ni parhaladoan sambing. Turpuk on paingotton hita: Panghobasionta i ma anugerah (natan). Tohonan na tajaloi jala ruas na nilehon ni Debata tu hita i ma parjambaran na mardomu tu lomo ni rohaNa, ndada hasil ni rupa manang gogonta.

    Na paduahon, i ma hata nûaḥ (hademakon manang keamanan/perhentian) di ayat 44. Tafsiran teolog na margoar Robert Boling patorangkon paboa dison ma Israel muba sian status parjalang gabe  bangso  na  hot.  Nang  pe  di  adong  dope  tantangan  musu  di humaliang, alai didok turpuk on: "jala ndang manahan musunasida nanggo sada maradophon nasida." On ma na margoar Hiperbola Teologis. Lapatanna, sian pandangan ni Debata, nunga monang halak Israel. Molo hita pe mangadopi "musu" songon parsalisian, kelelahan mental, manang hagangguon di zaman digital on, taingot ma: nunga ditumpak Debata hian ulaonta. Marulaon ma hita sian posisi ni halak na nunga monang, ndada songon halak na ganggu roha.

        Na patoluhon, Hasintongan ni Bagabaga ni Debata ("lo-nāpal dāḇār"

- Ayat 45), i ma puncak ni hatorangan  i: ndang adong tartading nanggo sada sian saluhut hata na denggan. Tafsiran D.C. Mulder paingotton  hita  paboa  sejarah  Israel  i  ma  bukti  ni  integritas  ni Debata. Ndang dipaloas Debata sada pe hataNa "madabu tu tano" (gagal) tanpa realisasi. Di tongatonga ni hagangguon ni ruas manang uju loja hita mangula, taingot ma janji ni Debata ndang hea kadaluwarsa. Molo nunga didok Debata dongananNa hita sahat tu pangujung ni hasiangan on, ndang adong gogo ni portibi on na boi mambahen janji i gagal.

 

III.Panimpuli

Aha ma naboi diputikhonan sian turpuk on ima:

a.   Mangarajumi  tohononta  gabe  silehonlehon:  Ala  sandok ulaon i i ma natan (pangalehonon) ni Debata, antong ndang adong inganan ni ginjang ni roha (kesombongan) di parhaladoan.  boi muba (Transformasi) molo hita arunduk ni roha mangadopi ruas jala mardalan di bagasan habasaron,  ai  ulaon  ni Debata  do  na  taula, ndada  ulaon parbisnison manang politik.

b. Mangajarhon  Hasetiaan  ni  Debata  di  Keluarga: Transformasi haporseaon ingkon dimulai sian jabu. Parhalado ingkon gabe role model na paboahon tu keluarga paboa "Sai na saut do na pinarbaga ni Jahowa." Molo jabu ni Parhalado nunga hot marojahan tu haporseaon on, gabe mura  ma  hita  mangarahon  ruas  mambahen  jabuna  gabe pusat pengajaran iman.

c.   Togu  Marojahan  tu  Firman  na  So  Hea  Mose:   Hita mangadopi jaman na muba-uba, alai turpuk on paingotton hita paboa "lo-naphal dabar" (ndang adong hata ni Debata na madabu/sega). Denggan ma nian hata ni Debata manogu hita  laho  mangajarhon  hasintongan  ni  Hata  I  tu  angka keluarga ni ruas, ai i do hagogoon na manahan molo ro galumbang ni jaman.

 

        Hita angka Parhalado, Ibana do Debata na tuntas mangula jala na satia di bagabagaNa. Antong, mangula ma hita marhite hiras ni roha,  ai  nunga dipatupa  Ibana  hasongan  manang hademakon  jala nunga dipasahat Ibana i tu hita. Marhite ulaon Transformasi di tongatonga ni keluarga, tahatindanghon ma hasetiaan ni Debata na so hea mose i. Sai na saut do na pinarbaga ni Jahowa! Amen.

Berbagi :