BAHAN JAMITA PARTANGIANGAN ; JESAYA 44: 1 – 8

BAHAN JAMITA EPISTEL/PARTANGIANGAN

TRINITATIS

JESAYA 44: 1 – 8

 

GABE SITINDANGI DEBATA SITOLUSADA

PATUJOLO

Di tongatonga ni portibi na saimubamuba jala gok parungkilon on dipatudu Debata do holong ni rohaNa dohot panjouonNa marhite turpuk on. Nasida na dibagasan habuangan jala angka tahi ni pangelaela laho manomba debata sileban, tongtong do dipatang haporseaon ni bangso Israel ai Ibana do namanjadihon, napaluahon, paulihon, jala ndang adong dungkon ni Ibana. Dibagasan pambuangan manang nanaeng tu pambuangan nama nasida di hatiha i (abad ke-6 SM). Magoan tano do nasida, hancur nang joro ni Debata, jala gabe sisungkunon identitas ni nasida sebagai bangso na pinillit ni Debata. Gabe ro sungkunsungkun, boha? Satia dope Jahowa tu hita?  Jala ro dope hamaolon na sian angka panomba debata sileban naadong di Babel. Boha do sangkap ni Debata maradophon nasida mangadopi i saluhutna.

HATORANGAN

Ayat 1-2. Hata “tangihon ma” dibagasan hata Heber ima “Shema” sada panggoraan asa diparateatehon hata ni Debata dung hona podai bangso Israel di bindu 43. Di bindu 44 naeng pasahaton ni Debata ma holong satia na sian Ibana. Di ayat 1 on ma parhitean ni bindu 43 taringot tu uhum ni Debata laho mandapatonhon nanaeng paulionNa do bangso i di bindu 44 on. Isarel ima bangso ni Debata jala naposoNa nadipillit ala asi ni roha ni Debata. Dibagasan ayat 2 tarida do hasatiaon ni Debata natontong mangurupi bangso i. Jala digoari nasida “na tigor” (Alkitab TB 2 mamangke hata “hai Yesyurun”) (bnd. 5 Musa 32:15; 33:5; 26) nangpe sipata manimbil nasida, alai tongtong Tuhan i satia maradophon nasida.

Ayat 3-4. Aek, ima tanda ni pasupasu dohot hangoluan, tarlumobi ma di kondisi ni tano naadong di Israel na koring. Hata “mauas” dohot “mahiang” on ma gombaran ni keadaan nang dohot haporseaon nang partondion ni bangso Israel: koring, mandele, ndang marpanghirimon. Dibahen i dilehon ma “… TondingKu …” asa sombu ma uas ni nasida jala mangolu nang partondion ni nasida. Jala on ma surirang taringot tu habobongot ni Tondi Porbadia di Padan na Imbaru (Ulaon ni Apostel 2). Jala ndada holan di nasida pasupasu ni Debata alai marhatorusan do tu angka sundut nanaeng ro. Martumbur namarlapatan ma i ndang mahiang be nasida alai gabe bangso namarparbuehon na denggan, jala simbur magodang nasida ndang di taluhon angka duhutduhut i nasida. Duhut ima tanda ni angka hasusaan, angka parsorion jala angka hagiot ni daging na olo mambahen naso denggan tu angka naporsea.

Ayat 5. On ma respon ni bangso i tu aha naung pinauli ni Debata jala dibagasan las ni roha manggoari dirina ampuna ni Jahowa. Holong satia ni Jahowa nung be masuk tu hadirion ni bangso i. Dibagasan asi ni roha ni Jahowa tau do hita mandok “ahu ampuna ni Debata” nangpe hea hita manimbil alai asi ni roha ni Debata do namanjangkon. On ma hasil ni naung pinauli ni Debata.

Ayat 6. Jahowa do Raja ni nasida namarlapatan marhuaso do Ibana laho paluahon jala mamarenta di tongatonga ni nasida nang di sandok hasiangan on. Dibagasan ayat on dipatorang ma na hot ro di saleleng ni leleng na do Debata. Sian Ibana do haroroan ni angka na adong, jala nunga adong Ibana tagan so adong dope angka harajaon, angka pamarenta. Jala marhadomuan ma on tu Pangungkapon 1:17-18 namandok ai Jesus do mulana dohot ujung na (alfa dan omega). Jala hata “… ndang adong Debata dungkon ni Ahu” marlapatan ma i ai holan sada do Debata na sintong jala on ma hata laho maralohon pardebata sileban (politeis) dohot angka ganaganaan di Babel (Jes. 44:9-20). Mungkin adong do hea tarbege hita halak non-Kristen hea mandok “tiada Tuhan selain Allah” alai nunga jumolo hape di Bibel targorit hata “tiada ilah selain Aku …” (TB 2). Alanii ndang tarhapatudos hita Debata Jahowa tu angka debata ni ugamo manang kepercayaan manang dewa-dewi ni naasing ai holan sada do Debata na sintong ima Debata na tasomba. Ndang jadi dohononta sarupa sude ugamo, ai holan haporseaon ni halak Kristen do namanghatindangkon hasintongan ni Debata.

Ayat 7-8. Ia ayat 7 on ma hata namaralohon ganaganaan, dialo Ibana do angka debata sileban nang angka ganaganaan naso tarbahen laho mamboto manang patuduhonn angka aha namasa sogot. Jala ayat 8 on ma hata namanoguhon jala mangapuli bangso i: “unang hamu tahuton unang ma mondiondit…” nang pe di pambuangan nasida, alai adong do holong satia ni Debata namangalehon panghirimon di nasida. Ingkon do gabe sitindangi bangso i disaluhut hata manang asi ni roha napinasahat ni Debata tu nasida tarlumobi ma di tano pambuangan i. Ndang tarbahen ni naasing, ndang tarbahen ni angka debata sileban manang ganaganaan laho mangaramoti bangso i songon na binahenni Debata Jahowa.

HAHONAAN

1.      Dijou Debata do hita asa gabe sitindangi ni goarNa, huasoNa, padanNa jala angka sangkapNa ditongatonga ni tano on. Nangpe hea hita manimbil jala ramun naujui pangalahonta alai dilehon Debata do holong ni rohaNa tu angka na manangihon panjouonNa. Tarjou do hita sudena asa gabe naposoNa asa unang marhabiaron manghatindangkon Debata di sandok portibi on. Saluhut na mauas, na male, na oto, na sega, na holom ingkon do paulion ni Debata marhite parbaritaanta.

2.      Hitaon ampuna ni Debata. Jala laos i do lapatan ni “Huria” ima “Kyriake” artina ampuna ni Debata (Milik Tuhan). Boi do muba tindakanta maradophon sada barang manang benda molo taboto barang niise do i. Molo taboto “oh.. bukku ni presiden doon” manang “oh… ampuna ni gubernur do on” pasti na ndang sembarangan hita bersikap tu si. Songon i do nang hita, ala ampuna ni Debata do hita ndang sembarangan manang ramun parangenta.

3.      Holan Debata sitolusada (Ama, Anak dohot Tondi Parbadia) do natutu naingkon sisombaon manang sioloan jala ndang adong ndungkon nii. Unang taparhatudos, manang disamahon tu debata ni ugamo naasing, ai ndang sarupa sudena i. Nang pe berengon hera na sarupa alai ndang sarupa i, jala ndang patut sitangihononton debata sileban. Nunga talu angka ganaganaan angka tahi ni sibolis dibahen Debata. Jala unang tagantihon Debata ala ni hamoraon, hagabeon manang hasangapon. Ingkon Debata do jumolo namarhuaso, marhasangapon marhamoraon di bagasan rohanta be. Ndang jumpang hita di debata naasing songon na binaheon ni Debata sitolusada. Amen.

Berbagi :