Sermon Epistel Jamita Partangiangan : 4 Musa 14: 11 – 19

 

Sermon Epistel Jamita Partangiangan

Minggu IV Dung Trinitatis

4 Musa 14: 11 – 19

 

1.   Patujolo

Buku Opat Musa marsirainan do tu konteks bagabaga ni Debata maradophon  si  Abraham  (1  Musa.12:15),  bagabaga  taringot  tu bangso, inganan dohot pasupasu. Diuduti muse bagabaga tu si Musa didolok Sinai (2 Musa.19), dohot pardalanan ni bangso Israel ruar sian Misir ala naung dibagabagahon Debata tano Kanaan.

 

Turpuk on manggombarhon pardalanan ni bangso Israel naeng sahat nama nasida tu tano Kanaan, alai ingkon jolo di halongonan nasida saleleng 40 taon ala marmungutmungut nasida tu Debata. Turpuk on naeng  mangondolhon  tuntutan  ni  Debata  dihaporseaon  ni  halak Israel, na so unduk di uhum ni Debata dohot na manginsahi Jahowa. Na masa tu bangso i di turpuk on laho patuduhon asa holan marhaporusan  tu  Debata  bangso  i  jala  porsea  di  bagabagaNa  ala molo sai manginsahi Jahowa nasida gabe tu paruhuman do nasida. Turpuk on patuduhon keseimbangan antara habadiaon ni Debata, keadilan dohot holongNa jala ulaon ni si Musa songon panurirang na mangondihon bangso i diadopan ni Debata.

 

2.   Hatorangan Ni Turpuk

a.   Torutoru ni Debata (ayat 11-12)

Langsung nama Debata manghatai tu si Musa ala ndang ditangihon bangso i Debata. Nunga dipatuduhon Debata holongNa nang pandonganionNa alai sai di insahi (menista, menolak) bangso i do Debata.  Pola  di  dok  Debata  “sadia  leleng?”  patuduhon  batas kesabaran ni Debata dibagasan hasintonganNa. Alani ingkon jaloon nasida na pantas tu pangalahona, ingkon toruan ni Jahowa nasida marhite sian begu antuk jala rendephonon nasida, jala bahenon ni Jahowa bangso na balga jala na gumogo sian nasida. Ala memang nunga songoni sifat ni bangso  Israel na sai holan marungutungut saleleng dipardalanan ruar sian Misir. Lalap do nasida ndang porsea

di Debata na patupahon saluhutna. Ndang porsea lapatanna ndada holan ndang mangokui alai tarlumobi manulak bagabaga ni Debata secara sengaja (Heb.3:19). On ma alasan ndang bongot nasida tu Kanaan jala gabe sipaingot di sundut naumposo. Angka tanda na binahen ni Debata ditongatonga ni bangso i patuduhon huaso dohot hasatiaon ni Debata. Nang pe naung godang bukti/tanda alai maol dope nasida porsea i ma ala ndang pos Rohana di Debata gabe umbalga biar ni roha.

 

b.   Mangido Asi Ni Roha ni Debata (ayat 13-19)

Nang pe dibagasan rimasNa Debata, alai dibaranihon si Musa do mangelek   di   adopan   ni   Debata   laho   mangondihon   bangso   i. Tongtong do umbalga holongNa martimbanghon rimasNa. Tawaran na binahen si Musa marojahan tu bagabaga ni Debata naung niuarihonNa tu si Abraham, Ishak dohot si Jakob nang tu naposona si Daud (2 Sam.7:8-16). Musa ndanda mangampini hasalaan ni bangso i, alai diondolhon ibana do hamuliaon goar ni Debata so tung gabe tarurak di tonga ni bangso Misir. Molo saut torutoru ni Debata tu bangso Israel gabe sun siap nasida, sotung gabe dietong nasida na so marhuaso Debata ni Israel.

 

Tangkas do dipuji si Musa Debata, ai Debata na lambas roha, parasi roha godang, na marpamuati mida hajahaton dohot pangalaosion alai huhut ndang malua bahenonMu sian uhum anggo halak parsala. Patuduhon   keadilan   ni   Debata,   sintong   do   Debata   dibagasan uhumNa. Ai sahat tu sundut patoluhon nang paopathon luluhonon ni Jahowa angka na marsala. Dampak sian dosa i sahat do tu sundut na naeng  ro.  Musa  na  mangondihon  bangso  Israel  martudutudu  tu Kristus na mangondihon halak pardosa.

 

3.   Sipahusorhusoron

Turpuk on mangondolhon relasi ni Debata dohot bangsoNa. Jotjot do hita ragu di holong nang pangurupion ni Debata dingolunta nang pe nunga taida jala tapanghilalahon bagabaga ni Debata. Naeng ingkon tangkas panandaionta tu Debata dipardalanan ni ngolunta. Naeng lam patar nian taantusi pambahenan ni Debata dingolunta. Boha pe tangkang ni hita on, alai sai marpamuati do Jahowa maradophon hita.

Haluaon ni hita jolma holan alani asi ni roha do (only by his Grace). Gagal do torus bangso Israel mangalapati pambahenan ni Jahowa, suang  songoni  nang  hita  na  porsea  dipartingkian  nuaeng.  Alani unang be sai marmungutmungut hita diadopan ni Debata, tapangido hasesaan ni dosa di angka hajahatonta. Asa margogo hita mangadopi parsorion na adong di portibi on. Holong ni Debata ma na patupa las n iroha, pangapulion nang patoguhon rohanta manghaposi Ibana. Amen.

 

Berbagi :