Sermon Jamita Minggu Minggu IV Dung Trinitatis, Pilemon 1: 4 – 7

 

Sermon Jamita Minggu

Minggu IV Dung Trinitatis, 28 Juni 2026

"Holong Na Manghorhon Lasniroha Jala Patoguhon"

 Pilemon 1: 4 – 7

 

1.   Patujolo

Surat Pilemon on i ma sada surat pribadi na ginurithon ni Apostel Paulus mandapothon si Pilemon, si Appia dohot si Arkhipus, dohot huria na marluhut di bagas ni si Pilemon (1:2). Disura do surat on ditongos Apostel Paulus sian hurungan uju tarihot ibana, jala rap ditongos dohot surat Kolose, laos on ma surat ni si Paulus naunjempek. Turpuk jamita ayat 4-7 on, bagian sian “proem thanksgiving section” (bagian ucapan syukur). Si Pilemon, sahalak warga Romawi na mamora jala maringan di Kolose. Disura, pajumpang ibana dohot Paulus uju di Efesus (Ul. 19), hatiha dihobasi si Epafras huria di Kolose, si Pilemon ma na gabe uluan laos dibagas na dipatupa parpunguan. Songon na somal di dunia Romawi, sude do nasida marnampunahon naposo (budak), salah satu i ma si Onesimus. Lari do si Onesimus siala adong hasalaanna (manipu, manangko) gabe laos pajumpang dohot si Paulus di hurungan. Muba do ibana gabe  siihuthon  Jesus  jala  gabe  anak  haholongan  di  si  Paulus. Sangkap ni surat on i ma naeng mangelek si Pilemon asa olo manjangkon si Onesimus songon dongan na hinaholongan ndang be sekedar gabe naposona.

 

2.   Hatorangan Ni Turpuk

a.   Tongtong Mandok Mauliate Tu Debata (ayat 4)

Songon angka surat ni si Paulus na asing, sai mandok mauliate do Paulus tu Debata hinorhon ni angka uli ni hajongjongan ni huria nang angka haporseaon ni dongan (Rom.1:8, Ep.1:15-16). Turpuk on dibuhai Paulus dohot pandohan “Na mandok mauliate do ahu tu Debata” dibagasan hata Gorik dipangke do hata eucharisto (bentuk: Prensent Active Indicative) namarlapatan tongtong mandok mauliate (terus menerus mengucap syukur). Hata on boi dilapati “Mandok

mauliate ahu tu Debata, tingki hu ingot ho di tangianghu (terj. sesuai NIV)”, dohot “Mandok mauliate ahu tu Debata, jala hugorahon goar mu ditangianghu (terj. sesuai KJV)”. Pandohan on boi ma dilapati na adong mambaen las ni roha si Paulus maradophon si Pilemon. Ai di tangiangna sai diingot si Pilemon. Ringkot ni mandok mauliate tu Debata  di  parngoluan  ni  angka  na  porsea  mangondolhon  relasi pribadi ni sasahalak tu Debata. Pandohan Debatangku na pinangke ni si Paulus, patuduhon parsaoran na rosu. Gabe marhagogoon do hata on mangarahut hubungan emosional ni si Paulus tu si Pilemon, siala gabe dipanghilalahon si Pilemon na tongtong ibana diingot jala ditangianghon si Paulus.

 

b.   Holong Niroha Dohot Haporseaon Di Tuhan Jesus (ayat 5-

6)

Di Bahasa aslina hata holong ni roha na pinangke ni si Paulus, i ma hata “agape”. Holong Agape marlapatan holong na sian Debata tu saluhut manisia, i ma holong na so manuntut balos, ndang bersyarat jala  komitmen  berkorban.  Sahat  do  barita  holong  ni  roha  ni  si Pilemon tu si Paulus, saotik na sian si Epafras na manghobasi di Kolose (Kol.1:7-8, 4:12-13) na tongon rap tarihot dohot si Paulus di hurungan (Pil.1: 23). Dohot sian si Onesimus sandiri, ai naposo ni si Pilemon do ibana tontu tangkas do ditanda ibana parrohaon ni si Pilemon.

 

Hata haporseaon di Bahasa asli na mamangke hata “pistis” (iman, percaya,  kepercayaan).  Ingkon  holan  tu  Jesus  do  tartuju haporseaonta,  ai  holan  dibagasan  Ibana  do  jumpangan  hangoluan nang ragam ni pasupasu. Holong ni roha dohot haporseaon di Tuhan Jesus ndang boi tarsirang, ai parbue ni haporseaon di Tuhan Jesus do holong ni roha i, mansai ringkot do na dua on di ngolu ni angka na porsea. Holong di Tuhan Jesus mangihut muse ma holong tu dongan. Paulus mamangke hata angka na badia “orang-orang kudus” i ma angka dongan naung porsea di Tuhan Jesus. Dipatuduhon si Pilemon do  parbue  ni  haporseaonna  tu  Tuhan  Jesus  marhite  na manghaholongi dongan.

c.   Halalas Ni Roha Dohot Apulapul (ayat 7)

Holong ni roha na pinatuduhon ni si Pilemon manghorhon las ni roha tu si Paulus jala mambahen sabam roha ni angka nabadia i. Marhite na digohi  si  Pilemon  angka na ringkot  di  dongan.  Siala hatiha i hampir 35%-40% di Junani-Romawi kuno angka hatoban do. Nang pe ndang haru tangkas dipatorang angka dia pambahanen ni si Pilemon. Alai ayat on mangondolhon parbue sian pambahenanna i. Dipasabam (telah dihiburkan) marlapatan marhite holong nang parsaoran na pasabam roha sian hatahuton, mangalehon hasonangan manang kompensasi (1 Kor. 16: 18, Pil.1: 7,20).

 

3.   Sipahusorhusoron

Mandok mauliate tu Debata i ma pokok penting na pinatuduhon ni si Paulus, jala laos on do na gabe ciri khas ni angka na porsea naung mananda jala manghangoluhon Tuhan i. Angka na sai tongtong mangingot  mandok  mauliate  tu  Debata  tarlumobi  alani  angka dongan, tontu gabe tiruan na mansai arga.

 

Ingkon marparbue ma haporseaonta tu Tuhan Jesus di pardalanan ni ngolunta. Pataridahononta ma maradophon angka dongan dihumaliang. Manjangkon nasida huhut patupahon angka na tau mangurupi, margogoihon jala mangapuli asa margogo angka dongan. Marhite si Paulus, gabe marsiajar do hita mangharingkothon angka dongan  nang  pe  dibagasan  na  tarihot  ibana.  Boi  ma  pangkeonta angka relasi nang parsaoranta gabe dalan laho mangurupi.

 

Holong mamboan haimbaruon di ngolu ni dongan, gabe marlas n iroha  jala  tarapul  ma  angka  dongan  marhite  na  dipanghilalahon nasida holong ni Tuhanta sian pambahenanta. Molo taulahon holong gabe patupa Transformasi do i di ngolu ni sasahalak. Holong marhite tindakan nyata dipangurupion ndang holan hata. Holong i muse tau padenggan parsaoran songon na masa di si Filemon dohot Onesimus. Laos i do na pinatuduhon ni Debata marhite Jesus Kristus na manghophop jala mangondihon hita. Gabe siboan las n iroha dohot siboan pangapulion ma hita tu humaliang marhite holong na sian Debata. Amen.

Berbagi :