Sermon Jamita Epistel-Pangungkapon 7: 9 – 17

 

Sermon Jamita Epistel

Minggu V Dung Trinitatis, 5 Juli 2026

 Pangungkapon 7: 9 – 17

 

1.   Patujolo

Ia buku Pangungkapon on disurathon si Johannes mandapothon 7 huria  na  di  angka  luat  parserahan  siala  na  mangadopi  angka panaonon nasida di masa hinarajaan ni Kesar Nero (68-69) dohot Kesar Domitianus (81-96). Disurathon andorang masa halelengse ni huta Jerusalem.   Di pulo Patmos do si Johannes uju manurathon pangungkapon on. Na tarbuang do ibana tusi songon uhuman na pinamasa  ni  Kesar  Domitianus  siala  habaranionna manghatindanghon Jesus Kristus Raja ni saluhut dohot Tuhan ni saluhut. Dietong sada sikap pemberontakan do pamaritahonon ni si Johannes i. Di situasi na mansai maol uju i ro ma Debata paungkaphon tu si Johannes angka pangngkapon taringot tu na naeng masa angka sitaonon. Ndada na laho mambahen gabe mabiar angka huria i disi alai na laho patoguhon haporseaonnasida do.

 

Di si ma diida si Johannes sada realitas surgawi: mansai torop, na so dapot bilangan ni jolma, sian nasa bangso, marga dohot houm dohot hata, angka na jongjong di adopan ni habangsa i dohot di adopan ni Birubiru i. Marhite pangungkapon i naeng dipatuduhon do paboa di balik ni na masa angka sitaonon i, naeng jumpang ma hagogok ni sangkap haluaon ni Debata. Haluaon na naeng pamasaon ni Debata ndada holan tu bangso Israel alai tu saluhut bangso.

 

Di angka huria di partingkian sinuaeng, tema “Haluaon ni Saluhut Bangso” mansai ampit gabe sada perenungan. Lumobi di tongatonga ni na masa angka konflik, sitaonon, dohot parporangan. Asa, marhite pangungkapon on naeng disungguli do hita paboa di ujung ni saluhutna na masa i naeng paungkaphon ni Debata ma hasadaon ni angka na tinobusNa sian saluhut bangso marhite sisada parsombaon nasida tu jolo ni habangsa hasangapon i, tu jolo ni Jesus Kristus i.

2.   Hatorangan ni Turpuk

a.   Tuhan Jesus: Birubiru Siparmahan angka na porsea sian saluhut bangso (ay. 9-10).

Dipatorang marhite anga ayat on ia di ari parpudi jongjong do torop na so habilangan sian saluhut bangso, marga dohot houm, dohot hata di jolo ni habangsa ni Debata dohot  Birubiru i. Maruloshon abit angka na saksak jala maniop maremare di tangannasida. Dia do na nidok ni pangungkapon on? Adong tolu. Na parjolo, adong mansai torop halak na so dapot bilangan, na ro sian nasa bangso, marga dohot houm dohot hata. Naeng dipapatar disi hasadaon ni sude angka na porsea sian sandok tano on. Ndang holan sian sada horong angka na porsea i alai tung sian saluhut bangso di portibi on mulak sogot marsomba tu Debata. Ndang mardia imbar di si angka haroroanna.

Na paduahon,marhite pandohan marulashon abit angka na saksak lapatanna nasida ima angka naung manjanghon holong ni roha ni Debata di bagasan Tuhan Jesus Kristus. Nunga ia nasida diburi sian angka dosana sudena marhite mudar ni Birubiru i naung durus  bahen pelean pardengganan dohot hasesaan ni dosa uju di hau pinarsilang i. Ai tu angka na porsea dipanghophopon ni Birubiru ni Debata ima Jesus Kristus naung tarrsilang  i diparuloshon abit na saksak. Gabe na patoguhon roha ni angka na porsea laho manghatindanghon goar ni Jesus Kristus i atik pe ingkon manaon na porsuk saleleng di portibi on. Ia na patoluhon, marhite pandohan na maniop maremare di tanganna na martudutudu tu angka na satia mamuji jala na pasangaphon Debata di tongatonga ni portibi on, na so  pola dihabiari nasida hamatean siala hagogoon dohot   sitaonon binahen ni portibi on. Ditaon nasida na porsuk siala ni haporseaonna di Tuhan Jesus Kristus  alai  hot  do  nasida  pasangap  dohot  mamuji  goarNa  i. Manahan do nasida mangolophon huaso dohot   holong ni roha ni Debata sahat ro di ujung ni ngoluna.

    Hasatiaon na pinutuduhon ni nasida i gabe tiruan ma i di sude angka na porsea di Tuhan Jesus di nasa partingkian ni ngolu di hasiangan on.  Ai  ndada hea mansohot  huaso  dohot  hagogoon  ni  portibi  on mangelaela  dohot  na  paporsukporsuk  ngolu  ni  angka  sitindangi Tuhan  Jesus  Kristuusi.  Ndang  hea  mansohot  pangaramotion  ni Debata di nasida di manang dia pe na masa siadopannasida di portibi on.

 

b.  Taendehon ma parolopolophon di Birubiru i  (ay. 11-12). Ia ngolu ni angka na porsea di Tuhan Jesus Kristus ndang tarsirang i sian  na  sai  mangendehon  holong  dohot  pambahenan  ni  Debata saleleng di potibi on. Dihatindanghon do marhite i balga ni holong ni Debata  na  marmahani  ngolu  ni  nasida,  di  parsaoranna  di  huria manang di ngolu na marsasahalak. Ai sai na idaon ni angka na porsea i  do  tangan  ni  Debata  na  badia  jala  na  gok  huaso  mandongani, mangalinggomi  angka  na  porsea  i  di  nasa  parsorionna.  I  ma  na pataridahon pandonganion dohot asi ni roha ni Debata na sai imbaru ganup manogot (pat. Andung 3:22-23). Panandaon na songon i ma na mambahen tongtong margogo angka na porsea i mangulahon lomo ni rohaNa saleleng di ngoluna.

 

Alai tutu, hurang ture do angka parendeon ni angka na porsea i di ngoluna di portibi on, ai diida si Johannes do sogot di surgo marhite pangungkapon on na gabe lam denggan do parendeon i di di Debata dohot di Birubiru i. Boasa didok gabe lam denggan parendeon i? Ala rap jongjong do angka na porsea i dohot angka sursurun humaliang habangsa i dohot humaliang anga sintua i dohot parngolu na opat i manomba Debata salelenglelena (ay. 11). Asa, marhite i dipangido tu angka na porsea, angka naung mananda holong ni roha ni Debata di bagasan Tuhan Jesus Kristus, laho mangharinggashon mengendehon pujipujian  di  holong  ni  roha  dohot  di  panarihonon  ni  Debata  di sandok partingkian ni ngolu.

 

c.   Parsihohoton ni angka na badia mangoloi Ibana (ay. 13-

14)

Hasatiaon mangoloi Debata. I do na niigil ni pangungkapon on di angka na badia i. Pangoloion na polin, na so he mansohot arian dohot borngin. Molo tung pe ingkon marsitaonon angka na porsea i di na lahoo patulushon lomo ni roha ni Debata marhite ngoluna, ingkon sai naeng tongtong dihaburjuhon nasida mangulahonsa marpangoloion, so marpansadian. Ai didok do, “Ndang magopo halojaonmuna di bagasan Tuhan i” (1 Kor. 15:58).

Ro ma sada sian angka sintua na di habangsa i manungkun, “Ise do angka i; jala sian dia do ro angka na maruloshon abit na saksak i?” (ay. 13). Didok do mandok si Johannes, “I ma angka naung ro sian haporsuhon godang; nunga diburi nasida abitnasida jala dipasaksak di   bagasan   mudar   ni   Birubiru   i”   (ay.   14).   Lapatanna,   sai dihaburjuhon angka na porsea i do mangoloi Debata ganup ari, arian dohot borngin, nang pe ingkon manaon haporsuhon nasida. Naeng songon  i  ma  sude  angka  na  porsea  di  partingkian  simuaeng. Tongtong mangolu di bagasan habadiaon di parngoluan siganup ari saleleng  di  tano  on  sahat  ro  di  saleleng  ni  lelengna.  Dibahen  i, manant jala jamot ma hita di partingkian ni ngolunta asa unang sumurut haringgashonta mangulahon na denggan hombar tu hata ni Debata.

 

d.  Hasonangan salelenglelengna upa ni angka na porsea (Ay.

15-17).

Hinorhon ni hasatiaon na polin mangoloi Debata di ganup tingki, arian   dohot borngin, ingkon jaloon ni angka na porsea i do hasonangan na manongtong. Marhite angka ayat andorang so trupuk on nunga didok hian paboa manang ise na porsea di Tuhan Jesus Kristus ingkon olo ibana rade mansoadahon dirina jala rade manuhuk silang na tu ibana. Mansoadahon diri dohot manuhuk silang i ma na martudutudu na ngolu ni angka na porsea na so boi so adopanna sitaonon  dohot  haporsuhon  godang.  Alai  tutu,  adong  do partingkianna angka i adopan ni angka na porsea i. Sipata male jala mauas do angka na porsea i di pardalanan ni ngoluna di portibi on; sipata hurangan di angka na ringkot di ngolu pardagingonna, sipata ingkon ditinggang udan dohot las ni ari, dohot rgam dope angka maol, lumobi ala ni late dohot hosom ni angka   parjahat di angka partingkian dohot inganan.

 

Alai laos marhite na sai mangadopi angka sitaonon dohot haporsuhon i do gabe nalnal tarida hatorason ni haporseaon molo burju taoloi Tuhan i nang pe sai dihosomi portibi on na porsea i. Ingkon naeng pos situtu do roha ni angka na porsea i diparmahanion dohot pangaramotion ni Debata di ngoluna. Asa siala parsihohotonna na so

mubauba i mangulahon lomo ni roha ni Debata jumpangna hasonangan na salelenglelengna.

 

3.   Sipahusorhusoron

Na ro ma tingkina joujon ni Debata sude angka bangso di tano on ro mandapothon habangsaNa i laho marsomba tu Ibana, Alai tutu ia angka na ro i ima angka naung mamolus ragam ni sitaonon dohot haporsuhon siala panindangionna di goar ni Tuhan Jesus Kristus mangihuthon angka partingkian dohot ingananna. Sude do angka na porsea sian ragam haroroanna ingkon mangadopi sitaonon dohot haporsuhonna.   Ai   ndang   sai   tarbahen   angka   na   porsea   i   so mangadopi sitaonon dohot haporsuhon di bagasan pardalanan ni ngoliuna di portibi on. Ndang sai luluanna boha pasidinghon angka i. Alai boha do asa monang ibana mangadopisa. Naeng gabe panindangion ma ngoli ni angka na porsea na satia amnghaburjuhon pangoloionn di Debata, mangulahon lomo  ni rohaNa atik pe maralo tu sanggkapsangkap ni portibi on. Gabe tiruan ala na ingkon manaon sitaonon dohot haporsuhon angka na porsea i alai boi manahan hinorhon ni haporseaon dohot panandaonna di pangaramotion ni Debata di ngoluna.

 

Diarahon ngolu na satia marpangoloion i do panandaon na tangkas di haporseaon tu angka bangso na portibi on. Gabe dohot angka bangso sian ragam marga, houm dohot hata, marroha marpandindangion paboa tutu do Debata siramoti ni parngoluan ni angka na porsea. Sialani i taharinggashon ma marpangulaon di bagasan pos ni roha di huaso dohot hagogoon ni Debata asa hot tongtong hita mangolu di bagasan roha na marpangoloion di hata ni Debata. Amen.

Berbagi :