Sermon Jamita MINGGU, Sakaria 8: 20 – 23

 

Sermon Jamita MINGGU

Minggu V Dung Trinitatis, 5 Juli 2026

Haluaon ni Saluhut Bangso 

 Sakaria 8: 20 – 23

 

1.   Patujolo

Buku Sakaria on disurathon dung hamumulak ni bangso Juda sian tano Babel. Mangihuthon angka pande bisuk Padan na Robi adong dua periode panuratan ni buku on. Periode na parjolo di taon 520-518  andorang  so  Kristus  (SM)  ima  panuratan  ni  bindu  1  -  8. Marisihon angka pangungkapon ni Debata tu si Sakaria, Dung i, di taon 480 - 470 SM ma panuratan ni bindu 9 - 14 marisihon panurirangon  mesianik.  Sapartingkian  do  panghobasion  ni panurirang Sakaria on dohot panurirang Hagai. Ia pangondolan ni panurirangon nasida ima paulihon ruhut ni ngolu haporseaon ni bangso i. Maol do ngolu na niadopan ni halak Juda uju mulak nasida sian Babel tu Jerusalem. Ai nunga tibu tarulang huta Jerusalem nang dohot bagas joro ni Tuhan i.

    Dibahen i dipabangkit Debata ma si Sakaria gabe panurirang tu tongatonga  bangso  i.  Marhite  ibana  naeng  dipasahat  Debata  tu bangso i hata pangapulion dohot na patoguhon panghirimon ni nasida di haluaon sipamasaon ni Debata. Marhite pangungkapon angka na pinapatar ni Debata tu si Sakaria gabe sada tanda do i na so ditadinghon Debata bangso i. Marpadan do Ibana paluaonNa bangsoNa i, paulihon Jerusalem dohot na prohon dame tu tongatonga nasida. Marhite isi ni bindu 8 on taida secara khusus panurirang i ditaringoti padan laho pauliulihon muse Jerusalem gabe huta hasintongan (8:3) jala pangisina gabe angka na martua.

    Alai sangkap na pauliulihon i ndada holan tu halak Israel sambing patupaon ni Debata alai dohot tu sude bangso di tano on.   Marhite turpuk on naeng pamasaon ni Debata sada barita gok hamuliaon ni hasangaponNa, Ro ma uduran ni angka bangso dohot pangisi ni huta na bolon laho mangalului jala rap marsomba tu jolo ni Debata. Marsigantung  do  nasida  tu  suhisuhi  ni  ulos  ni  sahalak  Jahudi. Marhite panurirangon on dipaboa do tu hita paboa nunga sian partingkian Padan na Robi nunga disangkap Debata masa haluaon tu saluhut bangso. Asa, ndada sangkap na imbaru taringot tu haluaon ni angka bangso parbegu mangihuthon pardalanan ni ngolu ni haporseaon ni bangso Israel.  Ia  disi  ditaringoti  haluaon  ni  bangso  i  nunga  dohot  di bagasanna  sangka  haluaon  tu  angka  bangso  na  asing  dipatupa Debata. I do na pinaboa ni turpuk on tu hita ima taringot tu universalitas keselamatan na pinatupa ni Debata.

 

II.   Hatorangan ni Turpuk

a.   Israel Parhitean ni Debata Paluahon Angka Bangso i (ay. 20)

Songon on do hata ni Jahowa Zebaot: “Ro dope anggo sogot angka bangso dohot pangisi ni huta bolon.” (ay. 20).

    Dipungka do ayat parjolo ni turpuk on (ay. 20) dohot sada formula hata panurirangon na khas: “Songon on do hata ni Jahowa Zebaot” (Beginilah firman TUHAN Semesta Alam), na mangondolhon huaso (otoritas ilahi) dohot hasisintong ni panurirangon i. Goar ‘Jahowa Zebaot” martudutudu tu parhuasoon na universal ni Debata. Ndada marhuaso Ibana holan di bangso Israel alai dohot tu saluhut bangso marhite angka pardalanan sejarah ni angka bangso i. Ia pandohan “Ro dope anggo sogot” (masih akan datang lagi) martudutudu tu orientasi masa depan profetis. Haluaon ni angka bangso i ndada ala ni dampak perkembangan/gejolak politik ni Israel alai ala inisiatif (tindakan aktif) ni Debata sandiri di bagasan pardalanan sejarah ni angka bangso  i.  Diungkap  Debata roha ni  angka  bangso  i  dohot pangisina sudena ro marsomba dohot mangalului Debata (ay. 21). Pandohan, “angka huta bolon” (banyak kota) manggombarhon bidang ni inganan haroroan ni angka bangso i, manang lintas wilayah geografis. Adong parhusoran ni pangantusion borhat sian konteks on. Ndada Israel i gabe ujung ni dalan haluaon sipamasaon ni Debata. Alai gabe parhitean (sarana) na ma Israel. Ai nunga dilumbahon Debata hian tu si Abaraham di 1 Musa 12: 3, “jala dapotan pasupasu marhitehite ho saluhut angka bangso ni tano on.”   Marhite i haluaon ni angka bangso na pinatupa ni Debata i gabe hagogok ni bagabaga ni Debata tu si Abraham.

 

b.  Masa Gerakan Misioner na Masiarahan (ay.21)

“Jala laho do sogot angka pangisi ni huta na sada tu na sada nari mandok:

“Beta hita rap marsomba tu bohi ni Jahowa, jala mangalului Jahowa Zebaot!

Ahu pe naeng dohot do laho tusi.” (ay. 21) 

    Molo di ayat 20 diondolhon taringot tu haroro ni angka bangso marsomba dohot mangalului Jahowa Zebaot, ia di ayat 21 on dipatuduhon  do  sada  dinamika  internal  ni  angka  bangso  i  dohot angka pangisina. “Jadi laho do sogot angka pangisi ni huta na sada tu na sada nari” (penduduk kota yang satu akan pergi kepada penduduk kota yang lain). Masitopotan nasida pajumpang laho pasadahon tahi mangalului Debata. Ndada sian roharoha nasida di sangkap i alai na tinogutogu ni Debata do marhite TondiNa tumanda asi ni rohaNa. Laos adong gerakan misioner ni angka bangso i, masiarahan nasida, masibetabetaan mandok, “Beta hita rap …” Dipatuduhon sian pandohan i respon sukarela. Ndang adong paksaan. Sian tulus ni roha do mardongan pos ni roha nasida borhat. Taida marhite  na  masiarahan  on  dihirim  nasida  jumpang  haluaon  na bersifat relasional dohot partisipatif.

    “Beta hita rap marsomba tu bohi ni Jahowa,”   Lembaga Alkitab Indonesia (LAI) menerjemahkan  hata ‘marsomba tu bohi ni Jahowa’ di hata Indonesia dipangke hata ‘melunakkan hati TUHAN’. Molo talapati sian hata haborhatanna di hata Heber (lehallot et pene YHWH), ‘memohon wajah TUHAN atau mencari kemurhan hati TUHAN’. Asa pandohan ‘mencari kemurahan hati TUHAN’ dipatudos   ma   lapatanna   ‘meminta   Allah   berkenan   memberi’. ‘Melunakkan  hati’ marlapatan  memohon agar  Allah  menunjukkan belas kasih-Nya.’ Alai ndada marlapatan gabe ala ni sibahenon ni jolma i gabe marasi ni roha Debata. Alai siala na dipatutoru jolma i do dirina di jolo ni Debata. Ia di hata Batak pandohan ‘merendahkan diri di hadapan Allah’ dipatudoshon tu na marsomba. I do asa dipangke  hata  ‘marsomba  tu  bohi  ni  Jahowa.’  Artina,  ndang marasing  lapatan  ni  na  dua  pandohan  i  mangihuthon  konteks  ni turpuk on ima mangido asi ni roha ni Debata.

 

c.   Parsombaon na Universal (ay. 22)

“Tongon tahe ro do sogot angka bangso bolon dohot parbegu angka na marhuaso

mangalului  Jahowa Zebaot di Jerusalem jala marsomba tu bohi ni Jahowa” (ay. 22)

    Di dua ayat na parjolo ditaringoti haroro ni angka bangso laho marsomba dohot mangalului Debata. Di ayat 23 on dipaboa adong sian tongatonga ni angka bangso i ima angka bangso parbegu na marhuaso ro marsomba tu Debata. “Suku-suku bangsa yang kuat” Pandohan  bangso  parbegu  na  marhuaso  martudutudu  tu  angka bangso na so mananda Debata jala parhuaso di bidang politik dohot militer. Jadi, angka bangso i nang pe didok parhuaso alai ingkon gabe unduk tu Debata. Ndada tumimbo hasangapon ni nasida sian Debata sandiri, Pargogo na so hatudosan. Jala Jerusalem na gabe inganan situjuon nasida laho marsomba tu Jahowa. Asa, mansai ringkot  do  hajongjongan  ni  Jerusalem  laho marsomba tu  Debata. Digoar di Jerusalem ima ‘pusat ziarah ekahatologis’.Pinmat adong tolu na ginombarhon ni hajongjongan ni Jerusalem. Ima na parjolo, tanda parmianan ni Debata, tanda parpadanan na pinaimbaru dohot pusat pemerintahan ilahi.

 

Asa, mamgihuthon sangkap haluaon ni Debata di angka bangso taida sifatna:

-    Universal (torop na marsaulihon asi ni rohaNa)

-    Transformatif (mendorong penyembahan)

-    Eskhatologis (orientasi pada masa depan pemulihan relasi)

 

d.  Pandonganion  ni  Debata  gabe  panindangion  tu  angka bangso (ay. 23)

“Songon  on  do  hata  ni  Jahowa  Zebaot:  I  ma  angka  ari parsigaungan ni sampulu halak sian saluhut dila ni bangso parbegu,”

 

Pandohan “Songon on do hata ni Jahowa Zebaot”, martudutudu tu ‘otoritas ilahi’. Paboa nasa panurirangon ima borhat sian sangkap ni Debata  ndada  sian  roha  ni  angka  panurirang  .  Marulakulak  do formula ni pandohan on disuarahon angka panurirang uju pasahathon barita haluaon sian Debata.   “I ma angka ari”   (Pada waktu itu). Pandohan on martudutudu tu partingkian haluaon pinatupa ni Debata. Mangihuthon sejarahna pandohan on marpardomuan tu partingkian dung habuangan. Alai mangihuthon panatapan teologis, adong dimensi eskhatologis — di na pinaua ni Debata bangso Israel sian Babel marhite na dipillit Debata si Koresh, halak Persia, gabe na manogihon bangso i mulak tu Jerusalem. Laos merhite haluaon ni halak   Israel   i   marpanghorhon   tu   haluaon   tu   saluhut   bangso. “sampulu  halak  sian  saluhut  dila  ni  bangso  parbegu”  (sepuluh orang dari berbagai bahasa dan bangsa). Bilangan ‘sampulu’ dison ndada bilangan ‘nominal’ alai martudutudu tu saluhut bangso dohot parhataan na manggombarhon haluaon sipatupaon ni Debata na universal.

 

“asa marsigantung nasida tu suhisuhi ni ulos ni sada halak Jahudi” (akan memegang erat ujung jubah seorang Yahudi). Martudutudu tu gambaran simbolis do pandohan ‘marsigantung tu suhisuhi ni ulos’ dison. Mangihuthon hasomalan ni halak Timur Dekat Kuno marlapatan do i tanda na marpangidoan, marsigantung, dohot mamparsangapi. Secara teologis, dipatuduhon i do hasasaut ni hata Panurirang Jesaya, "Hametmeton do i anggo tung holan naposongku ho patindang angka marga ni Jakob dohot manogihon mulak angka pasipasi sian Israel; nunga Hulehon ho huhut bahen panondang di angka parbegu, gabe parhitean ni hatuaonKu ho ro di ujung ni tano on” (Jes 49:6). “Rap hita sauduran” (kami mau pergi bersamamu). Prasa on patuduhon na adong sihol ni roha dohot haradeon ni angka bangso parbegu naeng masuk tu punguan ni angka na porsea rap mardalan di bagasan Tuhan i. Haradeon ni angka bangso i ndada ala ni  hajongjongan  ni  bangso  Israel  alai  ala  naung  dibege  nasida taringot tu pandonganion ni Debata di bangso i. “ai nunga hubege hami: Debata do donganmuna”. Laos jumpang do na nidok ni ayat di  bagasan  Jesus  Kristus  na  digoar  Immanuel,  na  marlapatan Donganta ma Debata (Mat. 1:23).

 

III.   Sipahusorhusoron

a.   Haluaon ni Debata: Haluaon na Universal

Marhite panurirangon ni si Sakaria on dipatuduho tu hita taringot tu angkap haluaon na universal sipamasaon ni Debata. Ndada holan terbatas di halak Israel sangkap haluaonNa i alai dohot do angka bangso  parbegu  gabe  mandai  las  ni  roha  ala  parsidohot  nasida manjalo haluaon sian Debata. Ingkon ro do sogot   agka bangso i mangalului dohot marsomba tu Debata. Ia haluaon na sian Debata ndada bersifat eksklusif tu sada bangso, alai gabe basabasa ni Debata tu sude bangso. Songon i nang huria di partingkian sinuaeng dijou asa gabe pasupasu tu saluhut halak.

 b.  Pandonganion ni Debata gabe Panindangion tu Saluhut Bangso

Ro do angka bangso parbegu mangalului Debata ndada alani Israel naung gabe bangso ni Debata. Alai siala dibege nasid songon dia pandonganion ni Debata di halak Israel. Tung gok pangalaosion do ia Israel. Alai ndang hot do holong dohot asi ni roha ni Debatai nasida. Sai marpangulahi do roha ni Debata di bangso i. On ma ondolan ni panindangion i, parasiroha  godang do Debata, sai marpangulahi do rohaNa. Dibahen i, angka naung manjalo asi ni   orha ni Debata di bagasan ngoluna, naeng ma dipatuduhon i ngolu na gok asi ni roha, holong, sai di bagasan hasintongan dohot dame. Haluaon ni saluut bangso marharoroan do i sian ngolu ni angka na satia mardalan mangihuthon hatiuron ni Debata. Saleleng na mian di bagasan ngolu na marhabadiaon huria i, gok holong dohot parasinirohaon, gabe ditubuhon i do panindangion sian angka na humaliang mandok: “Huida hami Tuhan i di tongatongamuna”. Amen

Berbagi :