Sermon Jamita Epistel-5 Musa 15: 6 – 11

 

Sermon Jamita Epistel  Minggu, 12 Juli 2026, 

MINGGU VI Dung Trinitatis 

5 Musa 15: 6 – 11

 

1.   Patujolo

Buku 5 Musa disurathon si Musa jala ra ditambai si Josua, na manurathon hamamate ni si Musa di Bindu 34. Buku 5 Musa (kitab Ulangan) diterjemahon sian hata Inggris Deuteronomium, sian hata Gorik "Deuteronomion" na marlapatan "paduahalihon mangalehon Patik". On ma pandohan songon pamungkaan ni 5 Musa 1:1. Buku on disurathon si Musa di adaran Moab tu sundut na imbaru ni Israel na laho masuk tu Tano Kanaan. Patik na paduahon on ima sada patik na dipaimbaru hombar tu situasi dohot kondisi ni Israel na so gabe bangso nomaden be, alai songon bangso na dilehon Debata do i tu nasida. Diparade si Musa buku on gabe panindangion tu sundut Israel na mangihut (5 Musa 31:26-27: "Buat hamu ma buku patikon jala peakkon hamu ma i tu lambung poti parpadanan ni Jahowa, Debatamuna i, asa gabe sitindangi disi dompak ho. Ai nunga tangkas hutanda panundalion ni roham dohot hatangkangon ni tangkuhukmu! Ida ma, gari uju mangolu dope ahu di tongatongamuna sadarion garina, sai manggunturi do hamu dompak Jahowa na sai laonna i, lam beha ma tagamon ia dung mate ahu?”)

 

2.   Hatorangan ni Turpuk

Di  ayat  6  di  turpuk  on,  marbagabaga  do  Debata  mangalehon pasupasu na marlobilobi tu bangso Israel, songon naung binagabagahonNa i. Tarmasuk do pasupasu on hatauon pasalion tu bangso na asing, so pola ingkon marsali sian bangso I; jala boi mangarajai torop bangso so pola tunduk tu huaso ni bangso i. Bagabaga  kesejahteraan  ekonomi  dohot  kedaulatan  nasional dibingkai di bagasan konteks padan na umbidang antara ni Debata dohot bangso Israel, di na marjanji Debata laho mamasumasu jala mangaramoti bangso na pinillitNa molo dioloi nasida parentaNa jala tongtong marsihohot tu Ibana. Sada sian tema utama ni turpuk on ima gagasan taringot tu pasupasu dohot pangaramotion ni Debata. Di

sandok Bibel i, digombarhon do, Debata songon sahalak na satia jala na burju mangalehon na ringkot di bangsoNa; jala digombarhon do muse pasupasu ni Debata, ima Debata songon sahalak na namangalehon perhatian penuh laho memanage (mengatur) kekuasaan politik ni bangsoNa. Ndang holan hamoraon materi dibagabagahon   tu   bangso   Israel,   alai   dohot   do   hatauon   laho marhuaso tu bangso na asing so pola ditaluhon nasida. Bagabaga on manggombarhon status ni bangso Israel songon bangso na pinillit ni Debata, na dipapulik jala dipatimbo sian angka bangso na asing marhite asi ni roha ni Debata. Konsep pasalion tu bangso na asing so pola marsali sian nasida pe adong do lapatanna simbolis. Konsep on manggombarhon kemandirian dohot kemapanan, songon i nang kemampuan ni bangso i na diberdayakan gabe habaoran pasupasu tu dongan   humaliang.   Di   kasus   on   inganan   ni   bangso   Israel, kemampuan pasalion tu bangso na asing ima tanda gengsi (perasaan atau sikap yang berkaitan dengan harga diri, martabat, dan kehormatan) dohot huaso. Marhite bagabaga haboion on tu bangso Israel, dipahot Debata do status istimewa nasida songon bangso haholonganNa.

 

Di ayat 7-8 didok “Tung sura adong di tongatongamu sada halak na pogos, sada sian hahaanggim disada sian ingananmu, di tano na nilehon ni Jahowa, Debatam tu ho, unang ma patangkangmu roham, jala unang tiop tanganmu mida donganmu na pogos i; alai ingkon patupaonmu do tanganmu tu ibana, jala lehononmu tu ibana pujian na godang, tuk tu haporluanna, manang aha pe na ringkot di ibana”. Taringot tu na mangalehon pinjaman, diondolhon Tuhan Jesus do di Lukas  6:34  “Jala  molo  mangkirim  hamu  mambuatsa  muse,  laho pasali dongan, parulian dia ma i di hamu? Ai dipasali parjahat do donganna parjahat, asa dijalo muse hepengna. Ay. 35: On ma tahe: Haholongi hamu ma musumuna bahen hamu ma na denggan jala pasali hamu ma, di na so hirim rohamuna di balosna; balga ma upamuna, gabe angka anak ni Natumimbul i ma hamu, ai basa do Ibana di na tois marroha jala di na jahat. Ay. 36: Gabe parasiroha ma hamu, songon Amamuna, Parasiroha i!"

Bahkan dipaingot do di ayat 9-10 asa manat ma ho, asa unang tubu pingkiran na so denggan di bagasan roham, mandok: Nunga jonok taon papituhon, taon hasesaan ni utang, gabe muruk ho tu donganmu na pogos i, jala ndang adong dilehon ho tu ibana, gabe mangangguhi ibana tu Jahowa taringot tu ho, gabe dosa ma i di ho. Ingkon godang do lehononmu tu ibana, jala unang marsak roham mangalehon tu ibana, ai ala ni i do pasupasuon ni Jahowa, Debatam ho di nasa ulaonmu dohot di nasa na jinama ni tanganmu. Marroha na ias do marnapahon silehonlehon. Sikap memberi orang percaya, memberi harus didasari oleh hati yang bersih (ketulusan) tanpa paksaan atau mengharapkan imbalan. Naeng songon ima gaya hidup angka na porsea,  marroha  na  digohi  compassion  (tindakan  nyata  bernafas belas kasih).

 

Sada hal na mangonjar bangso i ingkon marsiurupan ima ingat sejarah. Mangangguhi ma ho tu Debata, ingot ma Israel uju marsitaonon nasida di Misir. Mangangguhi do nasida tu Debata jala dialusi Debata do nasida. Dibaritahon sejarah i do tindakan haluaon dohot parasinirohaon ni Debata ditingki joujou bangso i disitaonon nasida. Bahkan dipatuduhon Debata do rimasNa molo adong na bersikap  semenamena tu  bangsoNa i.  Di  buku  Padan  na  Imbaru, mangalehon na marlobilobi sian perspektif ni Tuhan Jesus diajarhon di Mateus 5:7 Martua ma na burju, ai siasian do nasida. Jala diparentahon Tuhan Jesus di Mateus 5:42; Lehon ma tu angka na mangido sian ho jala unang tulak angka na naeng manginjam sian ho. Di ayat 11 di turpuk on didok: Ai ndang tagamon mansohot halak na pogos di tano i; i do umbahen na hutonahon tu ho, songon on: Ingkon bidang do tanganmu mangangkupi angka hahaanggim, angka na tarsosak dohot na pogos di tanom. On mangondolhon muse ringkot ni mambuka tangan. Boasa? Ala dalan ni ngolu ni Israel, songon na tinonahon ni si Musa, i do na laho manghapus hapogoson. Bereng ma

5 Musa 15:3-4, Boi do papunguonmu sian halak na asing, alai ingkon surathononmu do utangmu tu donganmu. Jadi ndang adong di tongatongamu na pogos, ai tutu do pasupasuon ni Jahowa ho di tano silehonon ni Jahowa, Debatam tu ho bahen partalianmu. Nda ala holong  ni  rohana  tu  jolma  umbahen  na  dipapatar  sude  Patik  ni

Debata? Sian ayat 11, taantusi do na dihalomohon Debata do asa hadirion ni Israel gabe pasupasu tu halak na asing. Laos i do na hinalomohon ni Jesus Kristus rap dohot hita huriaNa, asa tabungka tanganta bidang tu angka donganta, tarlumobi tu angka donganta na marsitaonon asa gabe pasupasu hita tu dongan jolma marhite na manggohi  Patik  Holong  i.  Taparrohahon  ma,  hadirion  ni  Jesus Kristus di panghobasionNa di portibi on, marputar do i di panghobasion ni angka na pogos dohot na marsitaonon (Mat. 11:4, dialusi Jesus ma nasida: "Laho ma hamu paboahon tu si Johannes na binegemuna dohot na niidamuna i: 11:5 marnida ma angka na mapitung, mardalan ma angka na pangpang, dipamalum ma angka na huliton, dipahehe ma angka na nengel. Marhite barita i, diajarhon Debata do holongNa na balga i tu Israel marhite na paluahon nasida sian Misir jala mangalehon tano na pinarbagabaga i tu nasida, diajarhon Debata do HolongNa na balga i tu hita marhite na paluahon hita sian dosa marhite Jesus Kristus jala mangalehon hangoluan na saleleng ni lelengna tu hita.  Ala ni saluhutna i, dipangido Debata do asa mandok mauliate hita jala "mananda dirinta" marhite na manghaholongi Ibana, marhite na manghaholongi dongan na manaon dibagasan hahurangan, alai molo ditutup pintu ni rohana maradophon donganna, boha ma holong ni roha ni Debata mian di ibana? Alani i, unang ma hata manang dilanta manghaholongi so marpambahenan.

 

III.sipahusor-husoron

Tung tangkas do Debata mangido hita laho marsiurupan, masipauliulian, masihaholongan sama dongan. Hata ni Debata mangajarhon tu hita asa buka roha dibagasan roha na ias marroha holong jala marsiurupan tu dongan na asing marhite na marpambahenan. Debata mandok Ibana do na mangalehon pasu-pasu tu bangso Israel, alai pasupasu i ndang holan boi dipajongjong di dirinta sandiri, alai ingkon do dipasahat tu angka dongan jolma na membutuhkan. Dipasahat Debata do tu hita asa boi gabe pasupasu, dang holan gabe mampaturehon diri, alai asa parsidohot hita gabe habaoran pasupasu tu halak na pogos. Jadi, Marsiurupan ma hamu, jala gabe pasupasu ma hamu tu na asing asa gabe patar holong ni Kristus dingoluta. Amen

Berbagi :