BAHAN JAMITA MINGGU EXAUDI,4 MUSA 6: 22 – 27

BAHAN JAMITA EVANGELIUM, MINGGU EXAUDI

MINGGU, 17 MEI 2026

4 MUSA 6: 22 – 27

“JAHOWA MAMASUMASU JALA MANGARAMOTI HO”

 

I.                 Patujolo

Buku 4 Musa on dibuhai marhite hata ni Jahowa tu si Musa di halongonan Sinai. Asa ido godang angka teolog na mandok na manggurithon buku on ima si Musa. Na digoari halak heber do buku on ‘wayedabher’ (Hata ni Jahowa) manang ‘bemidbar’ (di halongonan) (4 Musa 1:1). Jala di hata Gorik didok ‘arithmoi’ (bilangan) songoni nang di hata Indonesia ala dibagasan buku on godang angka parenta sian Jahowa tu si Musa taringot tu angka sensus ni halak Israel dohot angka bilangan ni na naeng sipelehonon nasida tu Debata. Jala di turpuk on, tong do ro Hata ni Jahowa tu si Musa asa patolhashon tu hahana si Aron dohot angka pinomparna taringot tu pasupasu ni Jahowa tu angka halak Israel. Molo di sungkun tu Hita, dia do ta pillit dipasupasu manang mamasumasu? Ra godang do na mimillit dipasupasu. Hape sasintongna molo hita mamasumasu na gabe tanda mai naung ta jalo pasupasu i.  Nang songoni di hita halak Kristen na jotjot do ta bege jala sipaimaonta songon didok turpuk on diparmingguan secara khusus di gereja HKI na gabe panimpuli ni minggu marhite angka Pandita nang songoni sintua. Alai aha do na gabe tolak ukur molo ngolunta on nga dipasupasu Debata? jala pasupasu na songon dia do na tajalo sian parmingguon ta i? Holan asa martamba tamba do arta ta di naung ringgas hita marminggu? Manang hasehaton, hamoraon dohot na asing?. Ringkot do nian i alai na rumingkot ima ngolu na hinalomohon ni Debata.  

II.               Hatorangan Ni Turpuk

Songoni do si Musa Na dipillit Debata manguluhon bangso Israel haruar sian tano misir tu tano naung dipadanhon Debata tu Israel. Ndang alani hamaloonna mangkatai, alai dihasatiaonNa mangulahon na hombar tu hata ni Debata gabe dipasupasu do nasida laho manguluhon Israel dohot hahana si Aron. Taida ma dihadirion ni Debata na mangaramoti pardalanan nasida ido na gabe pasupasu naung balga. pasupasu dihata heber didok doi  barakh – berkat, (bd. 1 Musa 12:2) na  molo ditatanan hata heber mula ni hata barakh on sarupa doi dohot hata  berekh-lutut) (bd. Ps. 95:6) naeng mandok hata ‘pasupasu’ manaringoti ulaon panghobasion na marsinggang dibagasan haserepon ni roha. Asa ido didok Jahowa tu si Musa nalaho sipatolhashon si Aron dohot sude pinomparna taringot pamasumasuon ni Debata. Boasa ingkon marhite si Aron? Ala ibana do malim na dipillit gabe parhitean ni Debata laho manguluhon ulaon (ibadah) ni Israel laho mamasumasu bangsoNa dibagasan hasitolusadaonNa. Jala ta ida ma andorang so turpuk on, baru dope ditahbishon si Aron gabe malim jala ndang apala godang pengalamanna laho patuduhon pamasumasuon ni Debata secara ritual. Jadi didok Debata ma “on ma sipasahatonmu tu bangso ni Debata laho mamasumasu bangsoNa”. Alani ta boto do ia pasupasu dang holan taringot angka na adong diportibion manang na jotjot ta dok rezeki (keberuntungan). Alai tangiang pasupasu na digurithon buku 4 Musa 6:24-26 dang pasupasu dipadan robi manang dipadan na baru alai songon teopani (penyataan Allah) dibagasan hasitolusadaon ni Debata naung dipapatar tu portibion ima pasupasu na manontong, songon Jahowa na papatarhon diriNa di tongatonga ni pardalanan bangso Israel tu Kanaan marhite ombun na marsijongjong ditingki arian jala api na marsijongjong ditingki bornginna asa tarbaen nasida mandalani sipardalanan nasida (2 Mus. 13:21). Alani pasupasu na digurithon marhite turpuk on pataridahon hasitolusadaon ni Debata na papatarhon jala patandahon diriNa tu bangso Israel.

Ayat 24 “Sai dipasupasu jala diramoti jahowa ma ho”

Manggombarhon Debata Ama, sitompa jala mangaramoti angka na ditompaNa. Jadi dang dipaloas Jahowa angka na diompanai sahalakna mangulahon siulahononna di portibion. Songon halak Israel na dibagasan parhorsihan dipardalanan tu Kanaan. Godang do angka hamaolan na diadopi nasida. Alai marhite si Musa mangalehon parenta tangkas asa boi diihuthon nasida. Ra sai dirimpu nasida do na diuhum, jala dihurung Debata bangso i. Alai di tingki i do tong, marhite si Aron dohot angka pinomparna, sangkap ni Debata laho patuduhon na naeng gabe bangso halomoan ni rohaNa. Dijalo jala dihilala bangso i do angka panghobasion marhite pangaramotion ni Jahowa ditingki di halongonan nasida na sai tong dilehon aha na porlu dinasida.

Ayat 25 “Dipasondanghon Jahowa do Bohina tu ho, jala asi rohana mida ho”

Debata na berinkarnasi dibagasan Jesus Kristus laho patuduhon diriNa tu hita songon mataniari na manondangi haholomon ni portibi on (Luk. 1:78; Mat. 4:16; Joh. 8:12). Alani, bohini di Debata do Kristus, Anak na I gabe hadirion ni Debata sian naso tarida gabe tarida, sian naso boi pajumpang bohi gabe pajumpang. Jala dang holan na tarida alai dohot do marsinondang na patuduhon hasonangan Na tu bangsona laos manaringoti Debata na mangalehon asi ni roha Na tu hita  (Ps. 31:17; Sep. 3:17), marlapatan doi na sai tontong do Ibana marsilehonlehon tu hita (Joh 1:14).

Ayat 26 “didompakkon Jahowa ma Bohina tu ho, jala dipasaorhon ma dame tu tondim”

Tondi porbadia na songon mimik ni Debata manang ekspresi ni Debata. Dibagasan parngoluan sisonari on pe, molo nga didompakhon bohina laho pajumpang dohot hita berarti adong halomoan dohot silahalasniroha (perkenanan) diantara hita.  songoni nang pasupasu Debata, ima haradeonNa di ngolunta patupahon asi ni roha Na. alai angka jolma on do na jojot marbalik sian adopan ni Debata na marlapatan ndang Debata manang pasupasui na mandaoi hita alai hita do na mandao sian pasupasu I (bd. 1 Mus. 4:16). Alani unang taarsahi tondi I laho pahothon hita (Ep. 4:30), paposhon rohanta, marbagabaga jala mangalehon hadameon (shalom) tu hita dang holan hademeon dingolu portibion alai padamehon hita dohot Debata. ido pasupasu nasasintongna diampehon tu halak Kristen marhite goarni Jahowa na patandahon diriNa nagabe Debata diangka na porsea. 

III.              Panimpuli

Huria na hinaholongan, Ngolunta on songon dibagasan pardalanan haporseaon di parhorsihan. Mangadopi hamaolon alai disi do Debata laho mamasumasu hita marhite pangaramotion, asi ni roha, dohot hadameonNa jala ido kepastian nasian Debata. Ala ni i, ngolu ni halak na porsea na manjalo pasupasu ndang be digohi holso manang keraguan taringot tu bagabaga ni Debata, alai digohi marhite hasatiaon laho mangihuthon parsuruon ni Debata, ndada holan mangeahi pasupasu (materi) alai baliksa mual ni pasupasu i, i ma Debata sandiri. Jala halak na dipasupasu ima na manjaga habadiaonna songon halak Israel na pasahathon dirina tu Jahowa. Songoni do halak Kristen asa pasahathon diriNa tu Debata namamasumasu dohot mangaramoti ngolunta. Alani dang tarbilangansa pasupasu ni Debata di hita jala dang adong sidalianta asa dang gabe pasupasu hita didonganta. Songon istilah na jotjot tabege “diberkati untuk menjadi berkat”. 

 

 

 

Berbagi :