BAHAN JAMITA HANANAEK TUHAN JESUS KRISTUS TU SURGO, ULAON NI APOSTEL 1: 1 – 11

 

BAHAN JAMITA EVANGELIUM
HANANAEK TUHAN JESUS KRISTUS TU SURGO
KAMIS, 14 MEI 2026
ULAON NI APOSTEL 1: 1 – 11 

"JESUS MANAEK TU SURGO JALA NA RO DO IBANA MUSE"

Patujolo.

Buku Ulaon Apostel on ima udut ni surat ni si Lukas tu si Teopilus. Molo di buku Lukas di surathon ibana sude ulaon dohot poda ni Jesus mulai sian na tubu sahat tu hananaekNa. Dipatorang si Lukas do tu si Teopilus, na pasahaton ni Jesus ma ulaon i tu angka siseanNa gabe sitindangi (saksi) ni Tuhan Jesus di portibion. Dung hehe Jesus sian hamatean dipataridahon Jesus do diriNa tu angka siseanNa saleleng 40 ari andorang so manaek Ibana tu banua ginjang. Laos ditingki ima dipake Jesus laho mambohali angka siseanNa andorang so dipasahat dope ulaon namangihut laho manghatindangkon Jesus. Dung di ida angka sisean i naung hehe Jesus sian hamatean, naung pinarsilangkon ni halak Romawi ditagam nasida doi gabe ombas laho pajongjonghon muse harajaon ni si Daud ala bangso ni Debata do nasida. Alai didok Jesus, ianggo ombas ni i holan Ama i do na umbotosa. Ianggo di roha ni Jesus ndang apala  na di pingkiran ni sisean i na rumingkot. Alai, adong do ulaon na rumingkot dope sian i nanaeng si ulaon nasida ima gabe sitindangi. Ido joujou ni ari haheheon i. Molo dung manaek Jesus tu banua ginjang, dipasahat Tuhan Jesus ma ulaon i tu hita, ima laho manghatindanghon laos mamaritahon haluaon naung pinatupaNa i tu sandok portibion. Asa ari hananaek ni Tuhan Jesus tu banua ginjang ima ari parsuruon tu hita asa lao hita manindangi dohot marbarita nauli. 

Hatorangan.

1.           Tutu situtu do Jesus hehe sian hamatean (ayat 1-5)

Godang do halak na so marhatopothon ia Jesus dang tutu ibana mate jala hehe. Marragam do angka alasan ni halak mandok dang tutu Jesus mate dohot hehe. Jadi ingkon jolo tangkas do on haporseaanta tutu do Jesus mate dohot hehe? Alai haporseai ma dang margabus buku nabadia i. Asa  tangkas ma tahaporseai Jesus mate, hehe, manaek tu banua ginjang. Dang holan hata-hata saluhutna i. Ido asa marpigapiga hali Jesus patuduhon diriNa tu angka siseanNa asa tung tandap  paboa natutu situtu do Jesus hehe sian na hamatean i. Jadi hita pe ingkon jolo tangkas do haporseaonta Jesus hehe sian na mate asa boi hita mamaritahon Jesus. Boasa? Ai di atas ni haheheonNa ido dipajongjong Barita Nauli, nang haporseaonta, nang huria pe. HaheheonNa ido dasor ni Barita Nauli, ai di haheheonNa ido hasisingkop ni haluaonta.

 

2.                Aha na porlu taparrohahon di Hananek ni Tuhanta Jesus tu banua ginjang? (Ayat 6-7).

Naparjolo: ima patuduhon nunga singkop be ulaon ni Jesus di portibion. Angka ulaon dia ma naung dipasae Jesus? Ima haluaon naung di parade na gabe haluaon ni saluhut jolma dohot portibion. Alani i manaek Jesus tu banua ginjang asa suruonNa muse Tondi Parbadia, jala Tondi ima muse namangula di roha ni jolma i laho manjangkon haluaon i. Paduahon: dipabangkit Jesus marhuraja di atas ni saluhut. Ima sipaboaon asa sude portibion umbotosa paboa ingkon marsomba tu Jesus do sandok portibion. Holan ibana ma tasomba, unang be na asing. Patoluhon: Hananaek ni Jesus tu banua ginjang paposhon rohanta ala nunga diparade be ingananta di lambung ni Ama i. Molo porsea hita parsidohot ma hita tu inganan naung pinaradeNa i. Paopathon: Dung manaek tu banua ginjang ro do Ibana muse padua halihon. Disi ma muse boanonNa haluaon i singkop jala boanonNa sude na porsea tu lambung ni Ama i. Alai disi ma uhumonNa angka na so porsea. Anggo tingkiNa dang adong hita na umbotosa ari haroroNa i, songon panangko borngin do haroroNa. Molo mangolu pe hita nuaeng on ma tingki di hita paimahon haroroNa. Alani dungo, rade, jala rade ma hita. Tapauli ,a tongtong dirinta paimahon sadihari haroroNa.

 

3.           Jaloon muna do Hagogoon (Ayat 8a)

Andorang so disuru Jesus sisean i, jolo dilehon do di nasida bohal marhite pangajarion. Ndang hea hita dipaborhat Jesus tu sada ulaon so jolo dibohali. Didok Jesus do, sai na dongananKu do hamu ganup ari rasirasa ro ajal ni hasiangan on. Nuaeng didok: jaloon muna do hagogoon ni Tondi Parbadia. Rumang ni hagogoon na songon dia do na nidok ni turpuk on? Hagogoon (Yun:dunamos) i, ima sada hagogoon na nilehon ni Tondi ni Debata, na patauhon nasida mangulahon ulaonna songon na sinuru manang sitindangi ni Kristus. Mansai ringkot situtu do hagogoon i laho mangulahon ulaon na dokdok jala na arga i. Ido huaso namangalehon di hita sahala asa dijalo halak panindangionta. Molo tabaritahon Jesus i, ndang hamaloonta  na mangula disi, alai huaso ni Tondi i do na mangula di roha ni jolma i. Ala ni i, na mambahen halak gabe porsea manang manjalo Tuhan Jesus ndada alani hamaloon manang kemampuanta, alai holan alani huaso ni Tondi ido. Songon dinamit doi na boi mamuntar roha batu. Alani i holan huaso ima tapangasahon, unang dirim. Dunamos manang hagogoon ido mangalehon semangat, ringgas ni roha, hatoguon asa rade jala manahan laho manaon sitaonon, barani mangadopi dohot mamolus angka hamaolon manang pangambati. Ai ulaon na gok hamaolon jala melelahkan do marbarita nauli. Disi ma ringkot dunamis (hagogoon-huaso) i. Huaso manang dunamos i do tong na mangalehon pikiran manang cara na imbaru, manang inspirasi molo sipata sungkot ulaon na marbarita nauli i. Dilehon i do di hita panatapan na dao dohot inspirasi. Alai tung holan silehonlehon ni Debata do i. Tu ise do dunamos-huaso i dilehon? Saguru lomo ni roha ni Debata sambing do i.  Tung so adong do sian dirinta na boi manontuhon, na boi gabe syarat laho manjalo i. Saguru tu lomo ni roha ni Debata sambing do i. Hagogon na songon i ndang hea i laho manursari manang manegai naung denggan. Ido umbahen didok Apostel Paulus: Ai dilehon Debata do tu hita tondi hagogoon, tondi haholongon, tondi pangarajaion diri, ndada tondi hatahuton (2 Timotius 1:7). Jadi molo tung adong sada hagogoon na manursari manang manegai hasadaon dohot hadengganon ni huria ni Tuhan i, nunga ringkot i patangkason manang ujion na sian Debata doi manang na ro sian tondi ni portibion (1 Joh 4:1-6). Tondi Parbadia dohot hagogoonNa i bebas doi laho mangamudihon dohot marrohai angka na porsea i. Na boi ulahononta ima mangidohon dibagasan tangiang: Ale Tondi Parbadia, na nilehon ni Debata, songgop jala mangula ma Ho dibagasan ngolu nami.

 

4.           Gabe SitindangingKu ma Hamu (Ayat 8b – 11).

Molo dilehon huasoi Tudia do pangkeonta umbahen dilehon i? Ima laho marbarita nauli. Ndang tu na asing. Holan laho marbarita nauli do i. Didok Jesus: gabe sitindanging-Ku ma hamu di Jerusalem dohot di sandok Judea dohot di Samaria, sahat ro di ujung ni tano on paboahon tu sandok portibion. Hata sitindangi-Ku (Yun: Marturein) lapatanna: manghatindanghon na ni ida jala hinaporseaanna. Alai laos sian ido hata martyr. Asa marturein marlapatan doi rade manghatindanghon na ni ida jala nahinaporseaanna nang pe ingkon gabe mate alani i. Ima na tagoari ulaon marbarita nauli manghatindanghon Jesus i tu sandok portibi on, asa ditanda portibion haluaon naung pinarade ni Jesus. Ai parenta ni Tuhan Jesus doi di Matius 28:19-20 dohot Markus 16:15. Ido gabe didok si Paulus di 1 Korintus 9:16 “Ai molo huhatahon barita nauli i, ndang hasurunganku i, utangku hian do i, marjea do ahu, aut so hubaritahon i. Lapatanna: tudos tu rapanrapan, na so marguna do hita molo so dohot hita marbarita nauli. Rom 1:16-17 “Ai ndang huhailahon barita nauli i, ai hagogoon ni Debata do i paluahon nasa na porsea, halak Jahudi jumolo, dung i dohot do halak Junani. Ai dipapatar do disi hatigoran ni Debata, na sian haporseaon tu haporseaon, hombar tu na tarsurat hian : “Na mangolu do partigor i hinorhon ni haporseaonna”.  Sian Barita nauli do boi halak gabe porsea di Jesus, dung i malua, dung i masuk tu surgo. Molo dang sahat i tu nasida, mago tu naroko ma nasida. Sungkunsungkunta: boha do au gabe parbarita nauli? Ai so huboto taringot tu hata ni Debata na tarsurat di Bibel i. Ai ise ma manangihon au marbarita nauli? On godang pangambati asa olo halak marbarita nauli. Alai ingot ma huaso ni Yesus do mamboan halak tu Ibana. Sungkun-sungkun na rumingkot, ima: olo do ho gabe sitindangi ni Jesus?

 

Hahonaan.

Godang do na boi tabahen dalan laho marbarita nauli. Na dumenggan, songon na binahen ni angka huria na parjolo ido ima marhite parange dohot parsaoran na denggan (Ulaon 2:4). Parange nasida na mansai denggan, ni ihot jala ni onjar ni holong, mambahen gabe mabiar torop halak, jala tertarik mangihuthon Jesus. Parangenta ima gabe jamitanta. Ima gabe sira dohot panondang tu halak na asing. Boido muse marbarita nauli marhite paralealeon. On do metode penginjilan na mansai denggan pangkeonta. Tabahen ma lam torop angka alealenta. Tamulai ma sian Jerusalem, tu Judea, tu Samaria sahat tu ujung ni portibion. Lapatanna mulai ma sian na jumonok sahat tu na dumao. Dia mai? Mulai ma sian dirim, sian jabum. Baritahon ma Jesus i tu ianakhonmu, tu keluarga, dohot tu tondongmu. Dung ipe asa tu halak na dao. Di jabu boido mura hita, jaha ma bibel i tu ianakhonmi laos ajari ma manjaha bibel. Nian ulaon na maol do marbarita nauli sahat do tu namaneahon hosa. Alai didok Tuhan Jesus: sai na dongananKu do hamu ganup ari. Alani ulaon saonari ima mambahen dirinta ingkon parsidohot disi. Nunga dilehon Tuhan i haluaon tu portibion alai ulahon ma haluaon i saonari asa talup hita tu inganan pinaradeNa i. Berhentilah hanya fokus ke sorga tetapi fokuslah didunia ini untuk memberitakan injil.  Molo rade do rohanta tamulai ma sian Jerusalem, tu Judea, tu Samaria sahat tu ujung ni portibi on. Lapatanna tamulai ma sian na jumonok, na ummet-met. Dia ma i? Mulai ma sian bagasmu. Baritahon Jesus i tu anakhonmu, tu keluargam, tu manang ise pe na adong di bagasmu. Dung i tu hombar jabum, dung i tu tondongmu. Asa marhite i rarat ma Barita Nauli i, jala tamba bilangan ni halak na porsea. Selamat marbarita Nauli ma.

Berbagi :