BAHAN JAMITA PARTANGIANGAN, JAKOBUS 4: 6 – 10

 

BAHAN JAMITA EPISTEL

MINGGU EXAUDI

MINGGU, 17 MEI 2026

JAKOBUS 4: 6 – 10 

JAHOWA MAMASUMASU JALA MANGARAMOTI HO

Patujolo

Huria nahinaholongan. Songon jolma na marsaor hita, adong do nilai-nilai ni parngoluon na mamboan tu hadengganon. Jala jotjot do i dipangke halak gabe patokan laho masuk tu surgo. Alai di hakristenon tahaporseai do haluaon i holan marhite haporseaon tu Jesus Kristus do (Ep. 2:8-9). Jadi, surat on na sinurathon ni si Jakobus, anggi ni Jesus (Gal. 1:19; laos pat. Mrk. 6:3) patajomhon parlapatanion taringot tu haluaon marhite haporseaon na marparbue di ngolu ni angka na porsea paboa haporseaon na sintong i ma haporseaon na manahan di pangunjunan (Jak. 1), haporseaon na sintong tarida marhite parulaon na denggan (Jak.2), boi manirang habisuhon ni Debata sian habisuhon ni jolma (Jak. 3), ndang marale-ale tu hisaphisap portibi (Jak. 4), jala manontong do haporseaon i ro di saleleng ni lelengna (Jak. 5).

Dipasahat si Jakobus do poda on songon uluan di Jerusalem jala dibereng si Paulus songon tiang ni huria (Gal. 2:9) jala ditujuhon tu na sampulu dua marga na di parserahan di na moru haporseaon hinorhon ni parsorion namasa. Isarana haleon, hapogoson, dohot na di gosagosa ni angka panggomgomi ni halak Jahudi. Ala ni i, digoari do on gabe surat umum tu halak Kristen Jahudi. Poda on marojahan sian poda ni Jesus taringot tu ngolu di harajaon ni Debata (songon jamita di dolok) dohot habisuhon ni ngolu sian buku Poda (Bindu 1-9). Naeng patoguhon haporseaon ni halak Kristen Jahudi, na mandok nang pe dibagasan hasusaan nasida, adong do Debata mamasumasu jala mangaramoti asa tongtong dibagasan hasatiaon dohot habadiaon nasida maradophon Debata.

Hatorangan Ni Turpuk

            Turpuk on paboahon na dihirim nasida do asa naeng nian haruar sian sitaonon i. Alai pangalaho nasida patuduhon na maraleale do nasida tu portibi on marhite pangiburuon, parbadaan, dohot mangharingkothon hagiot ni daging. Didok do nasida halak Kristen naung manjalo Barita haluaon i alai dang dihangoluhon Hakristenan na i. Isarana naeng dapotan na denggan alai maralo maradophon Debata, na marlapatan dang dos haporseaon dohot pangalahona. Gari ada diparngoluan ni hajolmaaon jotjot do ta bege ‘molo naeng na denggan di jalo ho, ulahon ma na denggan. Songoni nang baliksa’. Asa i do didok si Jakobus nasa jolma na naeng maraleale dohot portibi on dipajongjong do ibana gabe alo ni Debata. Alai nang pe songoni, asi ni roha ni Debata dang munsat sian nasida, tarida doi sian panjouon ni Debata marhite si Jakobus pasingothon asa marhamubaon dibagasan haserepon ni roha. Nang pe sai mandao nasida sian Debata jala dang hot dihaporseaon na sintong i alai ung balga do asi ni roha ni Debata maradophon dosa ni hajolmaon ta (ay. 6a).

            Alani i, huria na hinaholongan. Dang tarajumanta denggan basa dohot holong ni Debata tu ganup jolma. Ra sungkunsungkun di rohanta aha do haroa haringkotan ni Debata tu hita jolma on. Sona hahurangan Debata molo so adong hita. Molo tung pe mardosa sude jolma, ianggo Jahowa tong do Jahowa Ibana nang pe so disomba angka jolma i Ibana. Na marlapatan, ndang hahurangan Debata ai Ibana do na manompa saluhut na adong di portibion tarmasuk ma i hita jolma. Alani sasintongna dang patut marginjang ni roha angka jolma on ai silehon lehon Debata sambing do ngoluna. Jala sahat saonari pe nga songon gabe sada karakter i di hajolmaon. Alai molo taida di turpuk on ia hata Gorik na mandok ‘ginjang roha’ ima ἀντιτάσσεται (antitassetai) na marlapatan adong pambahenan na mangalo. Jadi halak Kristen hatihai dang holan karakterna ginjang roha alai haginjangan ni roha nai di aktualisasihon laho mangalo hata ni Debata. Ginjang ni roha taringot tu partondion mambahen sasahalak gabe ndang marsihohot be tu Debata. Imbar ni i, halak na serep roha i do na mananda gok situtu asi ni roha ni Debata.

            Alai nang pe mandao ala dihaginjangan ni roha nasida. Alai tong do dipajonok Debata tu huriaNa i holan ala asi ni rohaNa, ai haholongon do Debata (1 Joh. 4:8). On do parasingan ni Debatanta sian debata sileban. Ianggo Jahowa, Ibana do na patandahon diriNa mardalani ditongatonga bangsoNa, jala Ibana gabe Debata ni nasida jala nasida gabe bangsoNa (3 Mus. 26:12). Asi ni roha na di hata Gorik ima χάριν-charin sian hata χάρις- charis, ido pasupasu ni Debata di angka halak naung dipillit dapotan haluaon dibagasan asi ni roha ni Debata (predestinasi). Jala pasupasu nai do na gabe ubat manang solusi diganup na porsea asa unang be mangiburu, mambunu, masialoan nasida sama nasida (1 Ptr. 4:8), gabe marserep ni roha mangulahon nasa guru nidok Debata songon tanggungjawab ni halak Kristen na naung tarpasupasu ni Debata, ima:

Ayat 7, Haserepon ni roha mambahen halak Kristen mangalehen diriNa tu Debata na gabe uluan di ngoluna jala ngarade mangoloi hata ni Debata laho mangalo si bolis. Ai dang marhuaso si bolis maradophon hatani Debata. ndada ditompa ianggo sibolis alai surusuruan hian doi gabe sialo Debata jala tarbuang ma surusuruan i tu portibi on (pat. Jon 1:6-11; Jes. 14; Hes.28). alani sotung gabe sibolishon hita ala sai jotjot mangalo tu hata ni Debata.

Ayat 8, dipabotohon tung tarbuka do tangan ni Jahowa diharoro dohot dihamubaon ni halak Kristen Yahudi naung leleng maraleale dohot portibion alai maralo tu Debata. Asi ni roha ni Debata marhite Jesus Kristus paiashon dosa nasida jala pajonokhon nasida sian nadao asa unang be nian adong di roha nasida angka hosom, teal, late. Hata ‘tangan’ ima songon synecdoche (gaya bahasa dimana sebagian mewakili seluruhnya) na mewakilhon sude pamatang. Ingkon ta paias sude hajolmaonta dang holan dipatamatang, alai hata ‘roha’ dikontrashon dohot ‘tangan’ patuduhon ia paiashon ingkin terjadi sian roha pingkiran huhut motivasi ta.

Ayat 9-10, adong do hata na mandok; keterbukaan adalah awal dari pemulihan. Songon bangso na sampuludua na marsipadaoan, ampuna angka dosana be, alai ringkot do mangarsakkon, mangarapati, manopoti angka dosana be. Ala molo naeng pajonokon diri tu Debata ingkon padaohon dosa do. Ala dang boi dua hal na maralo boi mardomu disada inganan. Halak na paserephon rohana di adopan ni Debata do na olo manopoti dosana jala mandok  “molo tatopoti dosanta, haposan do Ibana jala bonar, manesa dosanta jala paiashon hita sian nasa hageduhon” (1 Joh. 1:9). Nasida do na dipatimbo rap dohot Anak I gabe parjambar di harajaon ni Debata.

Panimpuli

            Songon ponggol ni ende rohani batak sian Dompak Sinaga na mandok “Nang pe jotjot manimbil au sian akka dalanMu alai sai tong basa do Ho mangurupi au Tuhan. Mangolu pe au boi hudai na paet na tonggi dapot akka na hujalahi ala ni asim do I Tuhan dang ala ni hagoonku”. Sada pangakuan marhite haserepon ni roha do na paboahon, ia ngolu on ima pasupasu na balga sian Debata nang pe godang angka sitaonon alai didongani diramoti Debata do angka huriaNa laho pabaritahon dohot mangulahon hata ni Debata unang holan manjalo jala manangihon alai ingkon tarsiar do na naung ditobus hita dibagasan Jesus Kristus marhite pangalaho dibagasan hasatiaoan tu Debata songon motto ni HKI na dibagasan Jakobus 1:22.

Berbagi :