Sermon JAMITA EPISTEL PARTANGIANGAN:2 Korint 1: 15 – 24

SERMON JAMITA EPISTEL PARTANGIANGAN

Minggu IX Dung Trinitatis, 2 Agustus 2026

Sai na Saut do Na Pinarbaga ni Jahowa

Semua Janji Tuhan Dipenuhi

2 Korint 1: 15 – 24

 

I. Patujolo

    Hamu angka dongan di bagasan goar ni Tuhanta Jesus Kristus. Sada tantangan na borat di bagasan ulaon panghobasionta ima hasintongan (integritas) dohot haporseaon ni ruas tu angka parhobasNa. I do na nialaman ni Apostel Paulus di suratna tu huria Korintus on. Diuhumi angka na mangalo ibana do Paulus songon halak na mardua roha (elaphria) ala muba rencana pardalananna. Dietong angka pangalo i do nian, molo so tulus janji ni apostel i, lapatanna ndang tarpasahat ibana barita na uli na sintong. Alai ndang dialusi Paulus i marhite rimas, alai marhite teologi na gomos jala na bidang.

II. Hatorangan Ni turpuk       

 Molo tapamanat di ayat 17-18, ditudu angka pangalo i do Paulus mambahen haputusan kata sarka (mangihuthon sibuk/lomo-lomo ni roha). Alai didok Paulus ma: "Alai haposan do Debata (Pistos ho Theos), ai ndang jumpang di hami hata olo huhut hata ndang. Di bagasan  ulaon  parhaladoon,  hasintongan  ndada  holan  soal manajemen waktu manang janji-janji na manis, alai i ma parnidaan ni pangalaho ni Debata di bagasan ngolunta. Molo hita pangula ndang marsihohot di hata dohot parulaon, gabe maol do huria i porsea di Barita na Uli na dibege nasida. Hasintongan ni parhalado i ma bona ni transformasi di bagasan huria dohot keluarga.

        Siala ni i, diajarhon Apostel Paulus do tu hita taringot parbinotoan Kristologi na mansai bagas. Di bagasan Jesus Kristus, ndang adong na mardua roha. “Ai manang piga bagabaga ni Debata, gabe olo do di bagasan Ibana jala marhitehite Ibana do amen, bahen hasangapon ni Debata marhitehite hami.” Saluhut bagabaga haluaon ni Debata na di bagasan Padan na Robi nunga digohi secara definitif di bagasan Kristus. Ulaon ni Parhalado ingkon sahat do tu haporseaon na tutu di bagasan Kristus. Dinama targoar hita pangula ba mangula ma, tatogutogu do huria i asa mandok "Amen" (tutu jala sintong) tu Debata.   Tugasta   songon   parhalado   i   ma   mamboan   huria   tu haporseaon na tang, ndada tu ganggu ni roha.

        Sada sunggulsunggul na ringkot di turpuk on i ma Paulus mamangke tolu istilah yuridis (hukum) di ayat 21-22 laho patoguhon huaso ni ulaonna. Parjolo, pahothon, lapatanna Debata do na mangalehon validitas legal tu ulaonta; Paduahon, mamiahi, hita nunga dipillit jala dipabadia Debata laho mangula; Patoluhon, sumahap, i ma Tondi Porbadia na di bagasan hita gabe bukti na sintong na patolushon ulaon ni Debata sahat tu ujungna. Parhaladoon on ndada ala ni lomo- lomo ni roha, alai ala lomo ni roha ni Debata do tu hita. Nunga dimeteraikan Debata hita, jala i do na mambahen hita ingkon mabiar jala marhuaso laho mangula, ndada mangulahonn lomo ni rohanta sambaing tarlumobi tu mamake jabatan laho mangarajai tu na so sintong.

III. Sipahusor-Husoron

Marhite turpuk on, adong piga-piga siingoton ima:

a. Pasiding ma Pangalaho Otoriter: Songon parhalado unang ma hita merasa "mangarajai" huria. Hita parhobas ni huriaNa. Hamuliaon ni ulaonta i ma uju huria i marlas ni roha di bagasan Kristus, ndada uju huria i mabiar mida hita.

b. Tondi  Porbadia  mambahen  Hagogoon:  Di  bagasan mangadopi ulaon na borat di Huria, ingot ma nunga dimeterai hita jala nunga dilehon Tondi Porbadia. Gogo ni parhalado ndada di hamalohon ni jolma, alai di panindangion sian Debata.

c.   Mandok  "Amen"  rap  dohot  Huria:  Taparsitutu  ma  asa ganup jamita, tangiang, dohot ulaonta manogutogu huria mandok "Amen" tu Kristus. Unang loas huria muli marhite ganggu ni roha, alai boan ma nasida tu bagabaga ni Debata na margoar "Olo" di bagasan Jesus.

 

Marhite na mangajarhon hasintongan ni iman di bagasan keluarga dohot huria, hita angka parhalado HKBP mambahen transformasi na mangolu. Songon Debata na mangalehon Kristus gabe "Olo", hita pe tahasintongkon ma ulaonta gabe "Olo" ni Debata di adopan ni huria- Na. Amen.

Berbagi :