SERMON JAMITA MINGGU
Minggu VIII Dung
Trinitatis, 26 Juli 2026
Panumpak ni Debata di Angka Na PinillitNa
Rom
8: 26 – 30
I.
Patujolo
Paulus do namanurathon Surat na tuhalak Rom, atik pe so si Paulus na patolhashon barita na uli tu huta Rom dohot na pajongjonghonsa, alai mansai holong do rohana di huria i. Sai diusahahon ibana do adong pardomuanna tu sude angka huria ro di angka punguan ni halak Kristen naung adong hatiha i olat ni na tolap ibana, laho mangalehon poda pangajarion na patoranghon dohot na patanghon haporseaon nasida tu Jesus Kristus. Jala marhite pangajarion i dihirim roha ni Apostel Paulus do boi lam mananda huria i di balga ni asi ni roha dohot denggan basa ni Debata na pinatupaNa marhitehite Jesus Kristus. Naeng arahonon ni si Paulus do huria Rom marhite turpuk on secara khusus mangantusi hinaarga, hinauli dohot hagogoon ni haporseaon i laho mangadopi nasa na masa di portibi on. Ala di portibi on dope huria i, ndada maringanan di banuaginjang, jala hombar do i tu tangiang ni Tuhan Jesus, naeng tongtong mangolu dibagasan huria i haradeon “Manghatindangkon Kristus” marhite hata dohot pambahenan. Ala ni i molo masa pe angka pangaleleion songon na binolus ni angka huria na parjolo i, termasuk huria di Huta Rom, ingkon porsea nasida songon angka naung tinodo ni Kristus, Kristus naung manghophop huriaNa, i do na tongtong mandongani jala mangurupi.
II.
Hatorangan
Molo tajaha di bindu 8 on sian mula ni ayat sada disosohon Apostel Paulus do asa angka halak naung dipalua Kristus i sian huaso ni dosa unang be mangolu dibagasan hisap hisap ni daging, alai mangolu ma dibagasan huaso ni Tondi ni Debata na patauhon nasida gabe angka anak ni Debata. Nang pe di portibi on dope jala di bagasan daging, alai nunga dijalo Tondi na manguluhon nasida tu hangoluan na hombar tu padan ni Debata. Mangolu dibagasan Tondi ni Debata na marlapatan; ndada mangolu be dibagasan biar ni roha nang pe hajongjonganta ditongatonga ni portibi on dohot angka natinompa na asing na rap maheu do hita (ay. 22). Dibagasan hagaleonta, pinargogoan ni Tondi Parbadia i do hita, siala asi ni roha ni Debata na niusehonNa dibagasan ngolunta marhitehite Tondi Parbadia (pat. Rom 5:5; 1 Kor.3:16,6:19). Alani i, ringkot situtu do adong panandaion diri dihadirionta songon angka Naposo ni Debata – ruas ni huria mangantusi “Hata ni Debata” dohot “Sangkap ni Debata”. Hagaleon i ingkon dipahami secara positip, ima manait rohanta gabe ringgas marsiajar dohot marsigantung holan tu Debata.
Di bagasan turpuk jamita on, dipatorang Apostel Paulus do ia huaso ni Tondi Parbadia di ngolu ni angka anak ni Debata lobi umbagas dope. Ditingki angka anak ni Debata mangadopi hamaolon na mansai borat pola so boi be mandok hoihoina dohot hata tu Debata, ido asa Tondi i na martangiang tu hita (ay. 26). Jadi tangiang na tapasahat i di tafsirhon jala dipasingkop Tondi Parbadia, asa dialusi Debata ma i hombar tu habisuhonNa dohot Asi ni rohaNa na so hadodoan i. “Alai diboto Sitanda roha i do na pinarrohahon ni Tondi i, ai marguru tu lomo ni roha ni Debata do pangondihonna di angka na badia” (ay.27). Alani i, Tondo Porbadia do na paposhon jala patoguhon roha ni angka na porsea asa malua sian biar ni roha dohot mangalehon pangantusion taringot, ia sitaonon sisaonari berhubungan doi tu ari sogot (Eskatologis). Sai disulingkiti Debata do roha ni jolma i jala rade do Ibana tumangihon tangiangta, ndada ala ni gogona soaranta asa tangihononNa, alai ala ni Tondi Parbadia i do na mian dibagasan hita, ala holan Tondi i do na niokui ni Debata na manguluhon dohot mangurupi hita. Asa molo naeng uluhonon ni Tondi Parbadia hita jala olo tinggil tumangihon soara ni Tondi i, ndada marisuang be angka tangiangta, asa tangiangta pe naeng hombar tu lomo ni roha ni Debata. Sian on boi antusanta ia hasadaaon nang parsaoranta dohot Debata lobi timbona nang bagasna ndang tarbatasi ni pamatang na laho sega on, jala ndang adong na boi pasidingkon hita sian asi ni roha ni Debata. Angka hamaolon nang hasusaan pe ndang boi manirang hasadaonta dohot Debata Jahowa, tung aha pe na masa dibagasan ngolunta, ndang boi manirang hita sian asi ni roha ni Debata. Nang di na mangadopi angka hamaolon dibagasan ngolunta, dipaingot do hita, Saluhut do manumpak tu na denggan sangkap ni Debata diangka na porsea jala na holong roha di Ibana, Ay.28. Tondi ni Debata do na mandongani hita asa mangolu hita dibagasan panjouon i suman tu Kristus i (ay.29), tapatuduhon ma i marhite pambahenan, nang pangalaho na hombar tu patik dohot Hata ni Debata asa gabe panean hita di HarajaonNa i (1 Ptr. 5: 10).
III.
Panimpuli
Sian mulana nunga disangkapi Debata manjou angka naporseai asa taruli dihaluaon, jala saonari naporse i dipintori, asa diari parpudi i (Eskatologis) ganup na porsea taruli hasangapon ni Kristus i. Na tarjou do hita angka siihuthon Kristus tu panjouon na badia (2 Tim. 1:9), nadijou dibagasan pangaramotion ni Tondi i ndada be mangihuthon tahitahi ni dosa i, asa dua horong ma panjouon i di hita, ima na manait roha ni jolma i asa mangokui Kristus (Mat. 22:14) dohot Panjouon laho manait roha roha ni jolma i asa marnampunahon Kristus (Ulaon 16:14). Panjouon pardagingon i holan na mangotapi roha ni jolma i do asa unang didatdati mardosa, alai panjouon ni roha i asa paubahon rohana gabe sarupa- suman tu Kristus. Dison ma asa dapot rohanta: “saluhutna do manumpak tu na denggan di angka na marholong ni roha di Debata”. Na mangula do Tondi Parbadia i laho manogunogu hita asa paubahon ngolunta martiruan tu Kristus i. Sadia maol pe na niadopan ni angka na porsea i, naeng ma pos rohana dipangaramotion ni Debata na mangula dibagasanna laho patupahon na denggan na hombar tu lomo ni roha ni Debata. Ndada hea Debata patubuhon manang patupahon hasusaan molo sai marsihohot hita dibagasan HataNa i. Alai nang pe tabolus angka mara, hamaolon, hasusaan i, sian i do naeng ditubuhon Debata angka na uli na denggan dibagasan ngolunta hombar tu asi ni rohaNa. I do asa unang pintor mandele, jala unang mandate roha ni na porsea i, unang godoron manang monditondit jala mabiar mangadopi hamaolon i, naeng ma tapasahat saluhutna i tu adopan ni Debata. Ai tudos do songon na hinatindanghon parpsalmen di Psalmen 25: 10 “Asi ni roha dohot hasintongan do sude dalan ni Jahowa di angka na mangaradoti padanna dohot angka panindangionna”. Amen.
Posting Komentar untuk "SERMON JAMITA MINGGU- Rom 8: 26 – 30"