Sermon Epistel-Partangiangan-Galatia 3: 26 – 29

Sermon Epistel-Partangiangan

Minggu XI Dung Trinitatis, 16 Agustus 2026

Radoti Uhum, Ulahon Hatigoran Taati Hukum Dan Tegakkan Keadilan Galatia 3: 26 – 29

 

I.   Patujolo

Sian sude isi ni surat Galatia, turpuk Galatia 3:26-29 ma na gabe sintuhu ni surat on na manaringoti hasintongan so ala ni patik alai alani haporseaon. Sian bindu 1-2 nunga dipatorang Paulus haapostelonna dohot  pasupasu hata ni Debata, dung i di bindu 3 ma dipaboa  ngolu  ni  si  Abraham  na  monang  alani  haporseaonna andorang dilehon Patik  tu jolma i. Dipatorang ibana ma ia patik naung nilehon ni Debata pangkeon ma i gabe "songon siparorot  na mamboan hita tu Kristus" (Gal. 3:19-25), dungkon i ayat 26-29 ma na  gabe  panimpuli  na  mandok  identitas  na  imbaru  tu  angka  na porsea: ai ise naung porsea tu Kristus nasida ma naginoaran angka anak ni Debata, angka naung tardidi tu bagasan Kristus, jala ndang mardiaimbar  Jahudi  manang  Junani,  hatoban  manang  anak  mata, baoa  manang  parompuan.  Saluhut  na  porsea  do  parjambar  di harajaon ni Debata.

 

II.   Hatorangan ni Turpuk

Dibuhai do turpuk on sian ayat 26 na paandarhon sude do gabe anak ni Debata ala ni haporseaonna tu Kristus Jesus. Alani, ndada ditorui patik be hita alai laos dipauli Debata do hita dohot Ibana, asa marhite haporseaonta tu Kristus ma umbahen na dipalua  hita.  Dung i, ayat 27 paboahon hamubaon ni identitas ni angka na porsea i, gabe tardidi ma  nasida  dibagasan  goar  ni  Debata  Ama,  Anak  dohot  Tondi Parbadia manjalo hangoluan na imbaru jala dipasada rap dohot Kristus. Alani i do, dingolu ni halak naporsea ndang mardiaimbar be nasida di  jolo  ni  Debata.  Marasing  be  bangsona,  Jahudi  manang  Junani ndada on be sintuhu ni halak na porsea di adopan ni Debata. Molo baoa  ibana  manang  parompuan,  rap  na  niasian  ni  Debata  do saluhutna. Ai Ibana do na manompa jolma i, baoa dohot parompuan. Alani i, ndada adong na boi mangambati gabe halak na porsea tu Debata.

        Sasintongna, ndada gabe mago ngolu ni nasida na marragam i dungkon porsea tu Debata, hot do nasida halak Jahudi manang halak Junani, hombar tu bangsona be. Ndada gabe muba nasida, hot do baoa dohot parompuan hombar tu natinompa ni Debata nasida. Jala, molo pe gabe hatoban ibana manang gabe anak mata di jolo ni jolma, alai anggo di jolo ni Debata rap naniasianNa do saluhut jolma, asal ma porsea nasida tu Debata. Nuaeng, nanidokna sada dibagasan Kristus ima ala ni naung dipasahat tu hita asi ni rohaNa i. On ma na patoguhon hasadaon ni ruas ni Debata dibagasan sada daging dohot Kristus, na so mardiaimbar jala na so tarsirang be alani suhat-suhat ni portibion. Hasadaon ni ganup jolma rap dohot Kristus gabe dalan hasadaon ni angka na porsea tu Ibana.

        Molo tapaumbuk turpuk on tu ari kemerdekaan Indonesia di ari marsogot, diarahon ma hita asa gabe angka anak ni Debata naung dipaimbaru dibagasan Kristus, alani haporseaonna. Kemerdekaan na tutu ndada holan alani sidung sian  penjajahan, alai hamubaon ni jolma i do sian pangalaho na pasiaksiak ngolu ni donganna manang penindasan, angka na so mangaradoti uhum manang ketidakadilan dohot dosa, muba ibana gabe jolma na sintong na mangolu hombar tu Debata. Topik ni minggutta na mandok: "radoti uhum, ulahon hatigoran," mangondolhon urat ni ngolu na porsea, i ma: ise naung manjalo haimbaruon manang identitas na imbaru tarjou do ibana asa mangolu dibagasan hatigoran, mamangke hatigoran na sahat tu ibana laho  patuduhon  ngolu  na  imbaru  jala  na  mangaradoti  uhum  ni Kristus. Alani, merdeka ndada gabe dalan marlomo-lomo, gariada tongtong do mangolu dibagasan uhum na tigor na manghorhon haulion tu saluhut humaliangna.

 

III.   Panimpuli

    Antong di bagasan Kristus ndang mardiaimbar be ngolu ni jolma i di adopan ni Debata. Laos on ma tong na pinaandar ni semangat kemerdekaan ni  Indonesia na manulak  diskriminasi jala pahothon hasadaon ni bangso Indonesia. Uhum naung adong, isarana UUD 1945 dohot lan angka na asing asa tapadalan ma i hombar tu ringkot nang hasalaan na adong so marnida bohi manang jabatanna, unang songon piso na tajom tu toru alai mabugang tu ginjang. Ingkon ris do dapotan uhum hombar tu na niulana be, asa tarpatupa hatigoran ditongatonga ni bangso i.

    Dipalua do jolma i sian parhatobanan ni patik ala dipatupa Debata haluaon marhite Kristus, alai ndada asa mangolu so maruhum jolma i. Gariada ingkon lam tubu di roha ni jolma i, ngolu na bertanggungjawab bahen ngolu nasida siganup ari. Umbahen i, tama do hita mandok mauliate tu Debata dungkon dipasahat kemerdekaan i tu bangsotta Indonesia on. Marsiakbagi do ompunta na parjolo i mangalo Bolanda nang angka hamaolon ni ngolu na niadopan nasida uju i. Pola maol mangan dohot minum nasida alani sitaonon naniae nasida uju i. Alani ingkon ringgas ma hita manjagahon pasupasu kemerdekaan on unang gabe partuktuhan na manegai bangsotta sandiri. Molo pe taradoti uhum, dalanta do i manggohi panjouonta dibagasan Kristus asa mangolu di dalan hatigoran jala mangargahon ngolu ni donganta jolma, saluhut angka natinompa ni Debata.

    Marhite ayat 29 i, parsidohot do hita gabe parjambar di arta harajaon ni Debata. Alani i, saluhut na porsea do tarjou manghehei portibion marhite na patupahon dame, mangaradoti uhum nang mangulahon hatigoran. On ma dalanta patuduhon harajaon ni Debata songgop tu saluhut pangisi ni portibion. Dison ma tapatuduhon semangat kemerdekaan  ni  negaranta  Indonesia.  Tahaporseai  do,  ia kemerdekaan on gabe partingkian na uli naung dipasahat Debata tu saluhut bangso Indonesia bahen pangkeotta paturehon ngolu marhite uhum na sintong tu saluhut jolma.

Berbagi :