Sermon Jamita Minggu-Lukas 10: 25 – 37

 

Sermon Jamita Minggu

Minggu XIV Dung Trinitatis 06 September 2026

Manghaholongi Debata dohot dongan jolma Kasih kepada Allah dan sesama Manusia 

Lukas 10: 25 – 37

 

1.   Patujolo

Di jolo ni turpuhon nunga dipasupasu Tuhan Jesus angka siseanNa marhite   na   mandok   “Martua   ma   angka   matana   marnida   na niidamuna” (ayat 23). Martua ma nang halak naung mananda Ama i marhite  Anak  i,  naung  pabotohon  hangoluan  na  salelenglelengna nang pe onding dope hata i di angka na pistar, alai patar di angka siondihonon (ay. 21). Disima soluk ro sahalak sibotopatik, na manungkun dia do sibahenonna asa ditean ibana muse hangoluan na salelenglelengna. Digombarhon barita on do ngolu ni torop jolma di tingki Padan na Imbaru, na sai tongtong sungkunsungkun taringot ise do Jesus, nang pe naung patar nian kehadiran ni Jesus jala tullom di jolo nasida.

 

2.   Hatorangan ni Turpuk

Ayat  25-26;  Disungkun  sahalak  sibotopatik  do  Jesus  taringot  tu syarat-syarat laho manean hangoluan na salelenglelengna. Sungkunsungkun na sarupa mullop jala tarsurat do nang di Mateus

22: 35 dohot Lukas 18: 18. Disura roha adong dua na solot di roha ni sibotopatik  i  marhite  sungkunsungkun  i,  parjolo  ima  manungkun sada hal na so apala tangkas binotona, napaduahon ima sangkapna asa diboto ibana Guru na songon dia do Jesus i. Ianggo isi ni sungkunsungkun i manaringoti “hangoluan na salelenglelengna”, somalna molo sibotopatik manungkun pintor manaringoti patik ni Debata, patik ni si Musa do, anggo sangombas on manungkun hangoluan salelenglelengna do. Gabe disuru Jesus ma sibotopatik i mangalusi sandiri sungkunsungkunna i, ai balik gabe manungkun do Jesus marhite na mandok “aha do tarsurat di patik i? Boha do dijaha ho?”. Dison ma tarida metode mengajar na pinangke ni Jesus sebagai guru,  ai  sebagai  Guru  do  Jesus  disungkun  sibotopatik.  Laos  ima paingothon sibotopatik i di angka naung jinahana di Buku na Badia i (kitab Taurat-Pentateukh). Ayat 27-28; Huroha tangkas do dijaha, gabe diingot sibotopatik i na jinahana, ai pintor hatop do ibana mangalusi: “Ingkon dihaholongi ho do Tuhan Debatami sian nasa ateatem, dohot sian nasa tondim, sian nasa gogom dohot sian nasa roham, jala donganmi songon dirim.” Sai dipahe Jesus do alus on manang piga hali di ganup adong sungkunsungkun  na  sarupa,  rupani  di  Mateus  22:  35-40  dohot Markus 12: 28-32, jala nanianet ni Jesus do i sian Padan na Robi 3 Musa 19:18 dohot 5 Musa 6:5, umbuk ma antong nang pandohan di ayat na umpudi ondeng tu tema tahun pengajaran iman di tonga ni keluarga (2026). Manghaholongi Debata sian 4 unsur na adong di diri ni jolma (tondi, ateate, gogo dohot roha) ima na mangondolhon asa dihaholongi jolma i Debata sian sandok ngoluna. Manghaholongi Tuhan Debata ndada holan marhite simanghudap, alai dohot do marhite pambahenan. Laos songon i do nang na manghaholongi dongan,  naeng  patupaon  i  songon  na  manghaholongi  diri  niba sandiri. Sada singot-singot do on tu na masa di hatiha i, di na lam torop ahli teologi/guru-guru Jahudi na mangajarhon patik marhite dalan na sala jala lilu. Diajarhon nasida do patik manghaholongi sian dalan na terpaksa jala ndang sian nasa roha, nasa ateate, nasa gogo dohot  nasa  tondi.  Totalitas  ni  hajolmaon  naeng  manghaholongi Debata dohot manghaholongi dongan jolma doshon diriniba. Nang pe dialusi sibotopatik i dohot alus na lengkap, alai ndang haruar i sian sandok hadirionna, ai holan malo mangapil do ibana, ala ni i do asa didok Jesus tu ibana: “Tingkos do alusmi; ulahon ma i gabe mangolu ma ho.”  Jesus paboahon tu sibotopatik i, na alusna i do na gabe ojahan asa teanonna hangoluan na salelenglelengna. Asa unang holan na mangapil patik ibana, alai dohot ma mangulahon, ima dalan asa mangolu ibana.

 

Ayat 29; Ndang tarjalo sibotopatik i huroha alus ni Jesus i, gabe naeng pintoranna ma dirina. Sibotopatik i marpingkir, ianggo alus ni Jesus i naung binotona do i, ala ni i disungkun ibana ma muse sada sungkunsungkun na interpretative: “Ai ise do donganhu goaron?” Patar  ma  dison  kesulitan  ni  sibotopatik  i  laho  manghaholongi

donganna jolma. Maol do ibana membedakan sikap tu dongan jolma, na denggan manang na roa, ai tingkos didirina sandiri do ibana.

 

Ayat 30-35; Laho mangalusi sibotopatik na manungkun ise do donganhu  goaron,  ditariashon  Jesus  ma sada umpama taringot  tu halak Samaria na asi roha. Umpama on dibuat do sian kejadian na somal masa di dalan balobung na gok mara. Na tuat do sahalak sian huta Jerusalem laho tu Jeriko, marjarak 25 km i. Dalan na marbatu huhut padang pasir, gabe adong ma kesempatan tu panamun laho manamun ala halongonan do dalan i. Disamun panamun ma ibana, dipupudi jala dipukpuhi, dungi ditadingkon matemate ne. Adong ma dua ragam ni jolma na mamolus jala mamereng ibana disamun, alai marasing be do pambahenan nasida. Parjolo, mamolus do sada Malim, dung i sahalak Levi di inganan i alai ndang olo mangurupi, malah dilaosi sambing do. Paduahon, mamolus ma sahalak Samaria. Dung diida na masa i, asi ma rohana marnidasa huhut ma didapothon jala dipauli bugangna marhite na mandaishon miak dohot anggur. Dipahundul muse ma ibana tu hodana mamboan ibana tu parbornginan. Pangalaho ni Malim dohot Halak Levi nangkin jelas ndang tarpuji, ai holan manghatai taringot tu patik do diboto hape ndang adong parbuena. Hape halak Samaria i, na dianggap songon halak na so parbinoto di ruhutruhut parugamaon ni halak Jahudi, gabe ima na mangurupi na hona samun i jala na sari di halak na hansitan. Dihasogohon halak Jahudi do halak Samaria sebagai halak dagang na “satonga keturunan” (half-breeds) di pardagingon dohot partondion. Mansai sobu do parmusuon ni Jahudi dohot Samaria. Molo  mardalan  halak  Jahudi  sian  Galilea  tu  Jerusalem  mamolus dalan na tigor sian Samaria, ndang diloas halak Samaria nasida marborngin di huta Samaria, alani gabe mangaliati do nasida sian dompak Purba ni aek Jordan asa tolhas tu Jerusalem. Di adopan ni Tuhan Jesus, ia holong ni roha     ndang mananda batas-batas ni parbangsoon, alai Jahudi tung rongking do di adat parbangsoon.

    Ayat 36-37; Di na tarlomong dope sibotopatik i di pambahenan ni halak Samaria i, dipahosing Jesus ma sungkunsungkun: “Ise sian na tolu   i   di   roham   na   gabe   dongan   ni   na   tardobo   i?   on   ma sungkunsungkun reflektif ni Jesus taringot tu halak na boi membuktikan, dongan na haposan jala na marpambahenan do ibana? Dialusi sibotopatik i do nian, paboa ia i na marasiniroha i do dongan ni na tardobo i, alai ndang boi ibana mangulahonsa. I do asa disuru Jesus ibana laho jala mangulahon parasinirohaon di dongan.

 

3.   Paraithon tu Jamita

a. Dipatuduhon Jesus do di turpuhon metode pengajaran tu halak na munafik songon sibotopatik na mangunjuni Jesus. Ndang  ditolak Ibana sipangunjuni i. Baliksa diajari do tahe marhite pendekatan na positif, ima paboahon aha siulaon ni halak na masihol di hangoluan na salelenglelengna. Dipamura Jesus do pangantusion ni na niajaranNa marhite na paboahon sada umpama. Dibagasan kesabaran do Jesus na mangalehon pengajaran i, jala adong sangkap na jelas, ima:  asa diantusi jolma isi ni pangajarion i. Diboto Jesus do na mangunjuni do sibotopatik i, alai dijonohi Jesus marhite holong. Sitiruonta do metode pengajaran ni Jesus on di na laho mangadopi halak na mangunjuni hita. Pengajaran iman di tengah keluarga pe membutuhkan kesabaran do sian natoras natumua, ai nunga bahat sungkunsungkun ni angka dakdanak na so tangkas niantusan ai umpistar nasida martehnologi. Pendekatan holong  di  meja  makan  di  labalaba  rap  dohot  ianakhon  nunga mahal be nuaeng. Boha ma hita pahinsathon i muse.

b. Sude do hita manghirim asa dohot gabe panean di hangoluan na salelenglelengna marhite na rade rohanta manghaholongi Debata sian nasa ateate, nasa roha, nasa tondi dohot nasa gogo, huhut manghaholongi dongan doshon diriniba. Diigil do dison ketaatan yang mutlak (total devotion) sian hita dompak Debata, na laos tarida di ngolunta siganup ari.

c. Ringkot  do  jamothononta  dirinta  asa  unang  gabe  sapangalaho dohot Malim nang halak Levi di nas on, nunga dibereng alai paula so diida. Ndang ungkap roha nasida mangurupi na gale. On ma hataridaan ni na so saurdot hata dohot pambahenan. Tuani ma ro halak Samaria i na pintor sigop mangurupi na tardobo i. Jiwa dohot kemauan mangurupi dongan na humasusa, i do sada parbue ni parsaoranta dohot Debata. Timpang do sada halak Kristen molo holan  beribadah  diboto,  hape  ndang  olo  mangurupi  donganna. Haholongi Debata haholongi dongan jolma. Amen.

Berbagi :