BAHAN SERMON JAMITA MINGGU - Psalmen 50: 7 – 15

 

BAHAN SERMON JAMITA MINGGU 

Minggu I Dung Trinitatis, 7 Juni 2026

DEBATA NA NAMPUNA PORTIBI DOHOT SALUHUT PANGISINA

Psalmen 50: 7 – 15

 

 

1.  Patujolo

Psalmen 50 on mambaritahon taringot tu panguhumon ni Debata tu bangso-Na. Ndada ala ni na hurang godang pelean na pianasahatnasida umabahen na dipinsang Debata nasida. Alai ala ni pangalaho nasida maradophon Debata na sai tongtong marangkup Debata dibahen nasida di ngoluna siapari. Ndang tarbahen nasida manggabusi Debata, ai doshon na marsipaula do nasida maradophon Debata, ndang marsitutu nasida sumomba huhut pasahathon peleanna tu Debata. Tung pe songon na marsitutu nasida pasahathon parsombaonna tu Debata, tangkas do diboto Debata, ai siida roha do Debata jala ndang adong na holip di Ibana. Marhite turpuk on, dipaingot Debata do hita, aha do na tongon dihalomohon Debata sian parsombaonta.

 

2.   Hatorangan Ni Turpuk

a.   Ayat 7 – 8: "Ndada ala ni pelean umbahen na dipinsang Debata bangsoNa"

Debata marnida huria-Na (Israel) ndada songon panguhum, na manguhumi nasida asa gabe jumpang biar dohot godor ni roha. Songon Ama doo Ibana maradophon ianakhonna na paingothon anggiat jumpang hamubaon ni roha di ngolu parugamoon nasida songon i nang di ngolu siganup ari.

 

Dihagigihon Debata do nasa pelean jala biasan do Ibana di angka ari raya, parsombaon, jala ndang dihalomohon Ibana angka luhutan songon i nang angka pelean situtungon, pelean sipanganon, pelean hamauliateon  sian  angka  pinahan   pamuean.   Ndang  dihalashon Debata sude i, molo holan na di bagas joro i do dipamasa i. Ndang dihalomohon Debata molo sai holan songon na naeng tama idaon, gabe marsipaula. Ingkon do tongtong marpangkorhon na denggan sude   angka   na   taula.   Tontu   ndang   na   mandok   gabe   so

marluhut/marpungu, marsomba be hita. Ndada gabe pasohotonta pasahat  pelean  tu  Tuhanta,  ndang  gabe  mansohot  hita  sumomba Ibana marhite ende dohot tangiang. Alai naeng ma tongtong marhite parsombaonta tu Debata marparbue. Ingkon margilinggiling ma songon aek uhum i jala hatigoran songon sunge na so olo marsik (Pat. Ams. 5:21-24).

b.   Ayat 9-13: Debata Nampuna Sude.

Saguru di Debata do luhutna nasa na adong. Di bagasan huaso dohot saguru lomo  ni  rohaNa  do  sude nasa na  adong.  Ai  Ibana  do  na manompasa. Pola ma ingkon mangidoido jala mangalualu Ibana tu hita jolma on molo tung jumpa male Ibana? Sian i naeng idaonta, tung lomo ni rohana jala di bagasan huasoNa do saluhutna. Ndang adong simangmanghononta molo tung pe gok parnampunaonta di hasiangan on. Na pinalumehon ni Debata do i jala ndang pola haginjanghononta i.

Pola ma gabe songon na “manedeknedek Debata sian hita on”. Hape

silehonlehonNa do saluhut na di hita on?

 

c.   Ayat 14-15: Na Dihalohomon ni Debata (Inti) Hamauliatehon jala pelehon ma tu Debata. Tung i do na pinangido ni Debata sian hita.  Manghamauliatehon sude angka silehonlehonNa huhut  mamelehonsa  tu  habangsaNa  i.  Marhite  angka  ulaon  na denggan di sandok gulmit ni ngolunta asa gabe pasupasu hita tu na humaliang. Tontu ingkon sian nasa ias dohot bulus ni roha do i, ndada songon na pinaksa.

 

Tontu, ndada ulaon na mura i. Gok do tontangan siadopanta di na mangulahonsa. Sian bagasan dirinta songon i ndang sian duru ni dirinta. Gok hagogotan dohot ragam ni pangambati, jorgong dohot ragam ni angka sambil siadopanta. Alani i do ingkon mardongan habisuhon na sian Debata do hita mangulahonsa. Marhite na sai tongtong   joujou   hita   tu   Ibana   mangido   pangurupion.   Ndang mansohot jala ndang dipagele Tuhan i bagabagaNa songon di roha ni na deba. Lambas do rohaNa mida angka partigor na sai manghalaputi angka ulaon na denggan di ngoluna. (Pat. 2 Pet. 3:9)

3.   Sipahusor-Husoron

Marsitutu di bagasan roha na bulus pasahathon ngolu gabe pelean na hushus tu habangsa parasianNa. Ndada holan na pasahat pelean boti, alai ingkon do di bagasan roha na marsitutu. Unang gabe marsipaula holan laho mangalap tua dohot  pujian  sian  deba.  Taingot  ma, ia Debatanta i ndada holan siida bohi, dohot do nang rohanta tangkas diida.

Molo  pe  pasahatonta  peleanta  tu  Debata.  Ingkon  rajumanta  do songon sada ulaonta na ingkon do i. Sada keharusan do di hita pasahathon peleanta, gariada sude jala sandok ngolunta ingkon pasahatonta tu Debata (Rom 12:1). Sian i do tarboto, na Debata do nampunasa. Asa ingkon dohot do hita manghajongjonghon marhite ulaon parsombaon dohot parpeleanonta patuduhon na Debata jala saguru di Debata do sandok nasa na di tano on, nasa na adong di hita.AMEN

Berbagi :