Sermon Epistel - PARTANGIANGAN
Minggu I Dung
Trinitatis, 7 Juni
2026
1 Korint 10: 18 – 26
1. Patujolo
Hata ni Debata na
tarsurat di 1 Korintus 10:18-26 on, i ma poda sian Apostel Paulus tu Huria Korintus, taringot tu haburjuon ni jolma di bagasan partondion. Di tingki i, adong parsalisian taringot panganon na
pinantanghon (daging na pinelehon tu ajiaji/berhala). Apostel
Paulus mangajari jemaat asa unang holan mangarohai sandiri (kebebasan
diri), alai mamingkiri hasadaon
ni
huria
dohot hasangapon ni Debata. Nang
pe ingkon dim portibi on dope hita, alai songon angka na pporsea ingkon tandi do ddi parange nang
di pangalaho di bagasan ngolu siapari, Ndang tarbahen sarombang
tutu angka na porsea i
dohot portibi on.
2. Hatorangan Ni
Turpuk
a.
Ayat
18-22: Haporseaon holan tu sasadasa
Debata
Paulus mangida "Israel di bagasan daging" (ayat 18) na manganhon pelean, gabe mardomu tu langgatan. Alai, di bagasan Kristus, hita ndada boi mangoloi dua tuan. Unang tadongani ajiaji (penyembahan berhala/setan) di bagasan ngolunta siganup ari. Manganhon jala minum sian "pangisuan ni Tuhan" (Perjamuan Kudus), ndada boi dohot sapanganan tu meja ni ajiajian. Tung so tarbahen do manganhon dohot minum sian panginuman ni Tuhan i huhut sian panginunan ni angka begu. Jala ndang tarbehen angka na porsea gabe partohap di langgatan ni Tuhan i huhut di langgatan ni angka begu. Ndang dihalpomohon Debata angka na mandok porsea ibana di Debata alai sai tongtong dipaeleng pinggol dohot pardompahanna tu hagogoon ni portibi on. Sandok parsaoran na holan tu Kristus Jesus do sihalaputanta.
b. Ayat 23-24: Saluhut do jadi, alai ndang saluhut marguna. Turpuk on paingothon hita taringot tu sintuhu ni ngolunta songon angka na porsea di Debata marhite ragam ni gulmit ni ngolu na boi patuduhononta dohot pabotohononta. Godang do na boi ulahononta di hasiangan on, alai ingkon do tangkas jala dibagasan roha na bisuk manimbangi taringot tu gunana manang marlapatan do manang ndang. Bebas do hita mangulahonsa. Alai ingkon rajumanta do angka na taulahon i tagamon do ingkon marguna jala marpangkorhon na denggan di hita dohot na humaliang tarlumobi marsangap Debata. Hita halak Kristen mangolu di bagasan haluaon (kebebasan), alai haluaon i ndada laho mangulahon na jat, alai laho mambangun (membangun iman) donganta. Unang holan mangalului na denggan tu dirinta, alai lului ma na denggan tu donganta.
c. Ayat
25-26: Gok di Tuhan i
do tano on dohot isina
Paulus mandok, mangan ma daging na di onan (pasar) manang na di
jabu ni halak parbegu, asal unang diparsinta (dipermasalahkan)
taringot tu haiasonna manang harumaronna. Sandok nasa na tinompa
ni Debata, na denggan do i. Hita Kristen ndada mabiar mangida panganon, alai marhite
haporseaon na togu, tatanda do saluhutna
i ro sian Tuhan. Holan i tutu, unang sai taunjuni
Tuhan i taringot
tu angka
sipanganon na marpardomuan tu hahipason. Sude
do boi panganon, alai ndang
sai
sude sipanganon i denggan tu hahipason. Asa unang hita martabuni di balik
ni huaso ni Debata na sai mandok
“Nunga ditangiangkon” huhut ma dipangani so marpangorom na boi mambahen tubu sahit dohot
mara.
3. Sipahusor-husoron
a.
Unang
Mardua Holong.
Angka naung malua jala pinalua
ni Debata marhite Kristus Jesus, asa unang
mabiar mangula na denggan. Alai unang ma gabe masalpuhu gabe sarombang dohot
portibi on.
b. Mangula ulaon na
marguna
Ndada holan ulaon na marlapatan sambing na ingkon halaputanta. Alai ingkon na marguna tarlumobi di angka deba dongan, tarlumobi na boi pasangaphon Debata. Ai boi do angka na denggan mangihuthon pingkiran songon i nang mangihuthon aturan manang ojahan ni haporseaon alai boi do gabe partuktuhan di angka dongan na humaliang. Alani i tongtong ma tajalo bisuk sian Debata asa diajari hita taringot tu angka na naeng sihobasan dohot sihatahononta. (Luk. 12:22). On do tahe suhatsuhat ni nasa siulahononta, di na saluhut manang aha pe siulahononta, manang di hata manang di pambahenan naeng ma laho pasangaphon Debata. (1Kor 10:31).Amen
Posting Komentar untuk "Bahan Sermon Epistel - PARTANGIANGAN-1 Korintus 10:18-26"