Sermon Jamita Minggu Jubilate, Ulaon ni Apostel 2: 22 – 28

 

Sermon Jamita

Minggu Jubilate, 26 April 2026

Marolopolop Do Rohangku Jala Mariaria Do Tondingku

 Ulaon ni Apostel 2: 22 – 28

I.                Patujolo

Buku Ulaon ni Angka Apostel udut ni barita Nauli na sinurat ni si Lukas, pinangke ni si Teopilus na pinarsangapan bahen bohal laho mangondihon Apostel Paulus dohot sude halak Kristen di pengadilan Rom. Mandok ndada pemberontak si Paulus nang sude halak Kristen i, alai angka na porsea tu Tuhan Jesus do. Ganup taon do tapestahon ari parningotan di Hasasaor ni Tondi Parbadia. Somal digoari ari Pentakoste. Pentakoste lapatanna: limapulu  ari,  manang  pitu  minggu  dungkon  ni  ari  Haheheon (Paskah). Ari i ma songon Pesta Gotilon (panen) di halak Jahudi. (Ida 3 Musa 23:4-21). Di ari i ma sude ruas ni Jahudi mamelehon patumonaan (buah sulung) ni angka naniulana. Manang ise na ro tu jolo ni Jahowa di ari i ndang boi ro mengembal-rumar boti (dengan tangan hampa: 5 Musa 16: 16 “Ingkon tolu hali di bagasan sataon ro nasa baoa di tongatongamu tu adopan ni Jahowa Debatam, di inganan sipilliton ni Jahowa, i ma di ari raya sagusagu na so niasoman dohot di ari raya minggu dohot di ari raya parlapelapean, jala ndang jadi rumar boti ro manang ise tu adopan ni Jahowa.”) Molo ro tu adopan ni Jahowa, ingkon mamboan Peleanna. (nang hita pe, molo ganup itapatupa parpunguan partangiangan marsomba Debata dohot tumangihon Hata ni Debata, sai itaparade peleanta, sai itapasahat peleanta). Laos ari i do dipangke Debata laho manggotil (memanen) naniulaNa. Ai di ari Pentakoste i ma Debata manggotil patumonaan  (memanen  buah  pertama/sulung)  ni  ulaon  ni  Tuhan Jesus. Ai di ari sadari i ma tardidi 3.000 halak di Jerusalem. Di ari Pentakoste i ma diusehon (dicurahkan) Debata Tondi ParbadiaNa, na pagarahon (menggerakkan) roha ni natorop i, laos paubahon roha ni natorop i gabe porsea di Jesus. Laos i ma ari hatutubu ni huria (sasintongna mamotong kue ulang tahun do hita di ari i, mandok Selamat Ulang Tahun tu sude huria di portibi on). Tondi Parbadia i do na mangula, na manorusi roha, manggohi roha ni jolma, laos manogu, mamboan roha ni jolma i gabe porsea jala manjalo Jesus gabe Sipaluana. Molo jongjong huria, molo tamba angka  na  porsea  sian  3.000  halak,  dung  i  gabe  5.000  halak  jala nuaeng nunga marbilangan miliar halak, mamungka sian tano Jerusalem, tu Judea, tu Samaria, tu Eropa jala nuaeng sahat tu liat portibi on (Ul. Ap. 1:8), holan ala ulaon ni Tondi Parbadia do i. Tondi Parbadia ndada pangumpolan ni sadasada sekte i. Ai Tondi ni Debata do i. Debata do tahe Tondi i. Tondi i i ma Debata na mangula ndada secara pisik alai na mangula marhite Tondi. Ndang tarida wujud-Na, alai tahilala panghorhonNa. Mangihuthon si Johannes, ia Tondi i, songon alogo. Ndang binoto sian dia jala tu dia ai ndang boi idaon ni mata jala tiopon ni tangan, alai tahilala do panghorhonNa (Joh.3:8).

II.                Hatorangan Ni Turpuk

Barita na pinasahat ni apostel Petrus dohot sisean i, ndada barita na somal taringot Patik ni Debata. Alai barita na imbaru, haheheon ni Kristus, paboa na so pasombuonNa Ibana di banua toru jala na so idaon ni dagingna i habusukon (Ul. Ap. 2:27). Ginohan ni Tondi Parbadia, marjamita ma apostel Petrus dohot sisean na asing na i, jadi mamungka marpangkuling na asing ma nasida, marguru tu pangalehon ni Tondi i tu nasida manghatahonsa. Jala sude halak na pungu disi mangantusi (Halak Partia, Media, Elamit, angka na maringanan di Mesopotamia, di Judea, di Kappadosia, di Pontus, di Asia, di Prigia, di Pampilia, di tano Misir, di angka luat Libia, na tungkan  Kirene,  halak  Rom,  angka  halak  Jahudi  ro  di  angka parguru, angka halak Kreta, halak Arab; di hatanta be. 8-11). Di jamitana, ditaringoti apostel Petrus do ompunasida si Daud sahalak sian Raja ni bangso i. Sai manghirim do bangso Israel asa mandohar muse bangso i songon uju harajaon ni ompunasida si Daud i. Jala nang sisean ni Jesus i, suan do nang di roha nasida panghirimon si songon i. Nang pe naung diida nasida sandiri Jesus i mate tarpajal, hehe sian na mate. Ala ni i do uju laho manangkok tu surgo Jesus, disangahon nasida dope manungkun: Pajongjongonmu ma saonari, ale Tuhan, Harajaon i di Israel? (Ul. Ap.1:6). Nunga marurat mardaging panghirimon  harajaon Israel na hea marbungaran i, di roha  ni  saluhut  bangso  i.  Ala  marratus  taon  nasida  digomgomi bangso sipelebegu. Na ni omo nasida pe ingkon gabe balasting tu si jalo beo, ndang gabe pelean tu Debata, i do umbahen songon i jut ni roha nasida marnida si jalo beo. Sai dihirim nasida ma kemerdekaan ni bangso i, ingkon songon uju Daud raja nasida.  Ganda holan Tondi Parbadia  do  na  bolas  pature  roha  dohot  pangantusion  nasida  i. Marhite Tondi Parbadia, panghirimon i ndada be songon na masa uju Daud,  alai  tu  pomparanna  nama,  i  ma  Jesus  Kristus  na  so  boi hatiopan hamatean. Ai ndang tagamon pasombuonmu tondingku di banua  toru,  ndang  tagamon  loasonmu  hasianmu  marnida habusukon. (Psalmen 16:7-11). Psalmen Messianik na manghatahon ulaon ni Messias ni Debata, diririt apostel Petrus gabe jamita Patumonaan. Aha ma na boi dapot hita sian Jamita ni si Petrus on?

Tondi  Porbadia  patubuhon  Haporseaon:  Na  marsihohot  tu Debata Tondi Porbadia mangarahon hita mangasahon Tuhan i, asa bolas hita hot jala monang. "Tongtong do huida Tuhanki di jolongku, ai di  siamunhu do Ibana, asa unang humordit ahu.” (Ul. Ap. 2:25).   Di tingki martangga sada hita, tontu ndang na mura manjagahon keseimbangan asa unang tarrobung. Ringkot pasada roha, pasada pingkiran dohot gogo (konsentrasi penuh).  Haru mardalan di dalan na lambas, boi tartuktuk, beha ma molo mardalan di dalan na rahis? Dalan na rahis, boi do i gombaran ni dunia modern si saonari. Ndang adong na hot manongtong, hatop mubauba (pat. Tarsongon detik.com ganup detik muba barita). Apostel Petrus mandok: "Ala ni i las do rohangku jala marolopolop soarangku; dagingku pe maradian do huhut mangkirim." "Ai ndang pasombuonmu diringku di banua toru jala ndang loasonmu na badiam i marnida habusukon." "Nunga dipabotohon Ho tu ahu angka dalan hangoluan, gohanmu do ahu halalas ni roha di adopanmi!" Aha nama sibahenonnami, ale angka dongan? Pauba hamu ma rohamuna masihohot tu Tuhan Jesus!

Tondi  Porbadia  patubuhon  Haporseaon:  Manghorhon  las  ni roha di bagasan Jesus

Sai sonang do parniahapan ni halak na marsihohot tu Debata. Songon pandok ni apostel Petrus, “dagingku pe maradian do huhut mangkirim." (Ul.Ap. 2:26). Maradian na ni dokna di son, songon mobil na hop satongkin (stop: Supirna top dihundulanna, masinna pe mangolu). Ndang “maradian” marlapatan pasif. (pat. Diparsilang i: Ndang “Di son mate” didok, alai: Di son maradian). Maradian: adong do pe pardalanan siudutan. Ndang mabiar atik pe di tonga ni si habiaran. Haantusan atik pe ditonga ni na so niantusan. Tontu nang pe di tonga ni na so tontu.) Tondi  Porbadia  patubuhon  Haporseaon:  Mardalan mangihuthon Jesus Tontu nunga marasing portibi on, sian 100 taon na salpu, sian 20 taon na salpu dohot sadari on. Ndang tarambatan hita anggo perubahan i. Sai hira na marlojong do hamubaon ni portibi on, alai taboto, Tuhanta mangatasi saluhut do. Taingot ma, hakristenon i, ndang holan di sada ari on, alai mardalan tu jolo do i mangihuthon Kristus, mardalan ma hita mangihuthon Jesus di bagasan pos ni roha jala marlas ni roha.

3.   Jubilate do goar ni minggunta ari on Jubilate

Mandok marolopolop, marsuraksurak di bagasan las ni roha. Ndang asal olopolop dohot las ni roha, alai ingkon na marpusathon Debata do, na mamuji jala marmuliahon goarNa ala ni hatimbulon dohot hasongkalonNa  naung  pinapartarNa  di  bagasan  angka pambahenanNa, songon na nidok ni Psalmen 66: 1-3: “Marolopolop tu Debata ma ho, ale sandok tano on! Endehon hamu ma hamuliaon ni goarNa, marmulia bahen hamu pujipujianNa! Dok hamu ma mandok  Debata:   Tung   na  songkal   do   angka  pambahenanMu! Binahen  ni hinatimbul ni gogoM ingkon marsomba tu Ho angka musuM.”  Angka  dia  ma  naung  binahen  ni  Debata  di  hita  na mangonjar hita marolopolop mamujimuji jala marmuliaihon Ibana?

III.              Hahonaan Ni Turpuk

Na parjolo, dipabinsar do di hita barita na uliNa. Di na laho manaek tu banua ginjang, ditonai Jesus do siseanNa asa gabe sitindangiNa nasida di Jerusalem, di sandok Judea, di Samaria, sahat ro di ujung ni tano on. Dung ro Tondi Parbadia i, pintor diulahon sisean i do i. Parjolo di Jerusalem, dung i tu sandok Judea, tu Samaria, jala udutna tu ruar ni hajahudion manang tu ujung ni tano on.

Na paduahon, dipasonggop tu hita Tondi ParbadiaNa. Nunga nidok di jolo, ulaon na maol jala na gok paraloan do pamaritahonon di Barita na Uli i, ulaon na gok tantangan dohot pergumulan. Tantangan na parjolo ro do sian huria i, sian Kristen Jahudi na sian horong Parise. Mangihuthon nasida, holan Jahudi do na patut hasahatan ni Barita na Uli i, ndang dohot na so Jahudi. Ala ni i, angka na sian bangso sipelebegu na naeng gabe parjambar di parsaulian na marhite Barita na Uli i ingkon jolo dijahudihon do nasida, jolo disunat jala digohi sude na nidok ni patik i, dung i pe asa tardidi jala dijangkon tu huria. Alai ndang songon i fakta sian Debata songon na nialaman ni si Petrus, ai tongon marjamita ibana di jabu ni si Kornelius, songgop do Tondi Parbadia tu sude na manangihon hata i gabe marpanghuling na asing nasida tudos tu na nialaman ni angka apostel di Jerusalem di ari  Pentakoste  i.  Na  sian  parbegu  do  si  Kornelius  i,  jala  na  so marsunat dope ibana dohot sude pangisi ni bagasna. Alai ndang gabe ambatambat i di nasida laho manjalo Tondi Parbadia; Tondi na dos tu na jinalo ni apostel i. Mangihuthon si Petrus, panindangion na sian Debata do i paboahon na so adong be parasingan ni Jahudi dohot na so Jahudi, na marsunat dohot na so marsunat, alai naung gabe rap parjambar do sasude di silua na sian Debata. I ma muse na patut olophonon, endehonon jala pujihononta tu Debata, dipasonggop jala dipaian TondiNa di bagasan hita

Alai  molo  naeng  botoonta  tanda  ni  na  sinonggopan  ni  Tondi Porbadia, ingkon parsiajaranta do i parjolo sahali sian hatorangan ni Tuhanta Jesus Kristus na di Johannes 14-16. Disi dipatorang Ibana do ulaon ni Tondi Porbadia, i ma: Na mangondihon na porsea i (14:16a),  mandongani  (14:16b),  mangingani  (14:  23),  mangajari dohot paingothon tu nasa hata ni Jesus (Joh.14: 26), manghatindanghon taringot tu Jesus (Joh.15:26); mangajari portibi on taringot tu dosa, taringot tu hapintoron, dohot taringot tu uhum (Joh.16:8-11), manogihon halak tu bagasan nasa hasintongan (Joh.16:13), dohot na pasangaphon Jesus (Joh.16:14). Mansai torang, ndang adong ditaringoti disi taringot tu na mangajarhon hata sileban. Sian i boi ma dohonon: Molo porsea jolma di pandonganion ni Debata, molo gabe porsea di Tuhan Jesus dohot di hataNa, molo gabe ditanda dosa jala diparhatopot i na roa jala siuhumon, na ingkon solsolan jala topotan, molo gabe ditanda hapintoron, hasintongan jala dipasangap Jesus Kristus, pos ma rohana naung songgop jala mian do Tondi Porbadia i di bagasan ibana. Molo nunga songon i, patut do hita tutu marjubilate, marolopolop jala marlas ni roha mamujimuji Debata.

Na patoluhon, dibasabasahon do tu hita haluaon na sian asi ni rohaNa. Marhitehite Tondi Parbadia na mangula mahitehite Barita na Uli i, tangkas do dipanghilalahon si Pilippus, si Petrus, si Paulus dohot si Andreas na gabe muba do roha ni angka sipelebegu jala mulak nasida tu Debata. Songon na nidok nangkin taringot tu bangsonta, na ramun hian do nasida, na holang jala dao sian Debata (sipelebegu).  Alai  marhite  Barita  na  Uli  na  niulahon  ni  Tondi Parbadia i, nunga diurasi nasida, dipaias gabe sahat tu hamubaon ni roha dohot tu haporseaon asa tu haluaon. Haluaon na sian asi ni roha do i, na hombar tu tahi ni Debata na sian mulana i. Molo songon i, ita pasaut ma topik minggunta: Tongtong las rohanta jala marolopolop soaranta. Amen.

 

 

 

Berbagi :