BAHAN JAMITA MINGGU, 19 APRIL 2026;Habakuk 3: 10 – 19

BAHAN JAMITA 

MINGGU MISERICORDIAS DOMINI

19 APRIL 2026

“Marolop olop Di bagasan Jahowa / Bergembira di Dalam Tuhan”

Habakuk 3: 10 – 19

I.           Patujolo

Panurat   ni   buku   on   patandahon   dirina  songon  “panurirang Habakuk”  (Hab  1:1;  Hab  3:1).  Ndang  dipaboa  ibana  latar belakang pribadina manang keluargana. Goar Habakuk lapatanna mangangkupi manang mangalompit tangan. Ibana maringanan di Harajaon Israel Selatan (Juda) di tingki pamarentaon ni raja Manasse, Josia, dohot Joiakim. Di Habakuk 3:19, ditaringoti do sahalak ni angka parmusik, na patuduhon ibana sahalak Lepi jala parmusik di Bagas Joro di Jerusalem. Buku Habakuk terdiri sian dua bagian utama i ma panghataion ni si  Habakuk  dohot  Debata,  dohot  tangiang  manang  ende  si Habakuk mamuji Debata naung mangurupi bangso Israel na jolo. Di panghataionna dohot Debata, ndang mabiar si Habakuk manungkun tu Debata angka sungkunsungkun na ringkot taringot tu angka na masa manang angka na so diantusi ibana. Bindu 1-2 marisihon sungkunsungkun ni si Habakuk marojahan tu holso ni rohana ala nunga diida godang ni hajahaton dohot panombaon ganaganaan di Juda. Sungkunsungkun ni si Habakuk na parjolo, boha   do   Debata   boi   paloashon   bangsoNa   na   mangalo   i mangulahon godang dosa so pola diuhum. Dialusi Debata do i marhite na patuduhon tu si Habakuk, ndang sadia leleng nari pangkeon ni Debata ma halak Babel laho manguhum Juda. Sungkunsungkun ni si Habakuk paduahon, boha do Debata mamangke bangso Babel na umjahat sian Juda laho manguhum nasida? Dialusi Debata do i marhite na paposhon roha ni si Habakuk na ro do ari pamaloson tu halak Babel. Dibagasan pangantusion na sala i, dipatuduhon si Habakuk do haporseaonna taringot tu hadaulaton ni Debata dohot kepastian paboa na tigor do Debata di saluhutna.

II.        Hatorangan ni Turpuk

Di  bindu  3  on,  dipungka  si  Habakuk  do  tangiangna  marhite pangidoan asa marpangulahi roha ni Debata tu bangso Juda, dungi diuduti  dohot  gombaran  taringot  tu  hadirion  dohot  huaso  ni Debata di portibi on. Di ayat 3-16, Habakuk martudutudu tu tingki dipalua Debata bangsoNa sian Misir. Debata na sarupa na ro mamboan haluaon di tingki na salpu i do na ro muse di bagasan nasa hamuliaonNa. Sude na paimahon Ibana mangolu jala manghatindanghon hamonanganNa maradophon saluhut harajaon dohot  bangso.  Di  ayat  18-19,  dihatindanghon  si  Habakuk  do paboa  ibana  mangoloi  Debata  ndada  ala  dilehon  pasupasu  tu ibana, alai ala Debata do Ibana. Nang di tonga ni uhum ni Debata tu Juda, dipillit si Habakuk do marlas ni roha dibagasan Jahowa; Debata ma na gabe Sipalua ibana jala mual ni gogo na so olo mansohot. Marhaposan do si Habakuk tu Debata, manang aha pe na masa nang pe sude naung hea adong di bangso Juda dohot si Habakuk ingkon mago, dibuat sian ibana. Haporseaonna ndang di angka na hea di ibana—isara ni arta manang hau ara, hau anggur, hau jetun, lombu dohot birubiru—na ringkot sumber sipanganon, siinumon, miak dohot bulu—alai di Debata do. I do na manogunogu si Habakuk marende di tangiangna i.

III.     Hahonaan Ni Turpuk

Di portibi on, godang do jolma na so parduli be tu Debata dohot tu patikNa. Molo dilehon kesempatan, boi do jolma i mangalinsingi donganna ala ni hamoraon, keamanan, huaso dohot hasonangan. Situasi on jotjot mambahen hita ndang boi mangantusi boasa dipaloas Debata masa sude hajahaton manang na roa. Sai adong do holso dohot biar ni roha di jolma, alai ndang boi mangarajai angka na porsea ala dipasahat do saluhutna tu Debata pargogo na so hatudosan. Laos i do na binahen ni si Maria. Di na pinasahat ni Surusuruan Gabariel barita na naeng tubuhononna Sipalua i, biar dohot holso do dihilala ibana, ala so marhasohotan dope ibana. Di konteks parugamoon dohot sosial hatiha i, na niadopan ni si Maria (marhamulian  andorang  so  marhasohotan)  ndang  holan mambahen ibana ndang nyaman alai dohot do mambahen ibana gabe marmara. Alai olo do si Maria mangadopi saluhutna i di bagasan konteks panjouonna. Jadi, panjouon ni Debata sipata boi do mangadopi hita tu angka situasi na maol songon na niadopan ni si Maria. Sungkunsungkunna, boha do hita boi pasangaphon Debata jala marlas ni roha di situasi na songon i? Di Lukas 1:38, boi  do   idaonta  boha  do   panandaonna  tu   Debata  umbahen dipasahat si Maria dirina hibul tu Debata na marlomo ni roha tu ibana, gabe malua ibana sian biar dohot holso ni roha. Laos didok si Maria do: "... jala marolopolop do tondingku mida Debata Sipalua ahu,..." (Luk. 1: 47). Dipasangap si Maria do  Debata, marlas ni roha ibana ndada ala ni situasi ngoluna na maol, alai ala ni haporseaonna do paboa Debata do Sipalua ibana. Nang pe songon ndang denggan manang maol keadaanta, alai tongtong do jonok Debata tu angka na mananda jala manghaposi Ibana. Boi do pos rohanta, Ibana do na pasaehon saluhutna hombar tu dalan dohot tingkiNa. Jumpang hita ma gogo asa margogo Ibana marlas ni roha jala pasangaphon Debata, ndang di bagasan keadaanta, alai di bagasan Debata, di kenyataan ise Ibana jala aha do na naeng ulahononNa. Ibana do Immanuel, Debata na mandongani, na mangantusi pergumulan ni bangsoNa, na mandongani bangsoNa mangadopi ragam ni paraloan ni ngolu.Amen

 

Berbagi :