Sermon Epistel -Partangiangan- 2 Timoteus 4:6-8

 

Sermon Epistel -Partangiangan

Minggu XIII Dung Trinitatis, 30 Agustus 2026

Hatami Do Las Ni Rohangku

Firman Tuhan Menjadi Kegirangan Bagiku

2 Timoteus 4: 6 – 8

 

I.   Patujolo

Ditongos apostel Paulus do surat parmahanion (penggembalaan) tu si Timoteus songan anak na hinaholongan (anak rohani) na marhobas di huria Efesus. Surat on ditongos apostel Paulus di tingki dibagasan penjara di Rom. Dibagasan parsorion na dokdok do ibana, alai dang sumurut holongna dohot gogona laho mangapoi dohot mamparbohali si Timoteus dohot huria Efesus asa margogo mangadopi ragam hamaolon di tongatonga ni panghobasion. Ditingki manurat surat 2 Timoteus on, kaisar Nero tongon mambahen gogona laho mangotapi harararat ni hakaristenon di Rom marhite na manggosagosa angka halak na porsea. Dipenjara jala dirante do apostel Paulus (2 Tim. 1: 16) songon parjahat, jala torop angka donganna hian naung manundali/manadinghon ibana.

    Ditongatonga ni na masa i, barita naui ingkon tongtong galak. Ndang jadi  intopan  palito  ni  dalan  laho  marbarita  nauli  ala  ni  angka hamaolon dohot parsorion. Si Timoteus songon sahalak parbarita nauli, nang pe poso dope, ndang jadi talu maradophon angka guru- guru palsu, alai ingkon barani ibana manjamitahon hasintongan ala ni haporsean dohot barita naui i.

 

II.   Hatorangan ni Turpuk

Di bindu 4 on (1-5) tangkas do disungguli apostel Paulus asa marsitutu si Timoteus laho marbarita nauli di sude partingkian, di tingki na une nang so une. Ingkon rade jala hobas manjamitahon Hata ni Debata di bagasan hasintongan marhite lambas niroha dohot pamodaion. Ulaon mamaritahon barita nauli dohot hasintonganna na boi do mangadopi resiko, ndada mansohot, alai manontong do mardalan ulaon pararathon HataNa, sabar manaon na jat huhut marbisuk unang mandele ala ni sitaonon i.

Ayat 6

Songon  surat  parmahanion  (pastoral),  asa  ndada  na  manggurui apostel Paulus, alai nunga parjolo ibana mangae na jat i. Di tingki manurat buku 2 Timoteus on tongon do ibana di penjara di Rom jala marsitaonon  na  dokdok.  Sitaonon  na  niae  na  i  ditatap  ibana  do songon  pelean  na  arga  di  adopan  ni  Debata  Jahowa,  ima  dalan maniru Tuhan Jesus Kristus na manaon na hansit laho manobus hita pardosa. Didalani ibana do resiko panghobasion i so pola marungutungut jala mandele. Hinorhon ni sitaonon na dokdok i, sai hira naung jonok nama ujung ni ngoluna. Jala di tingki managam hamatean tarida do pos ni roha di apostel Paulus, ala ditatap ibana do paboa ujung ni golu manang hamatean ima dalan laho manjalo haluaon (tingki haluluangki).

 

Ayat 7

Ngolu on ima paraloan (pertandingan – perlombaan) maradophon ragam  ni  angka  na  masa.  Molo  disuru  songon  parbarita  nauli, denggan ma dihobasi ulaon i so pola marlaok. Ndada mangait tu diri, manghasiani diri sambaing, alai manghaholongi na marsuru i do, ima Tuhan Jesus Kristus. Hasatiaon, parsitutuon dohot bulus ni roha ima na gabe gogo mandali parlojongon sahat tu ujungna (garis akhir). Molo diula apostel Paulus paraloan dohot parlojongon sahat ro di ujungna, ala na mangolu do haporseaon dohot panghirimonna maradophon  Tuhan  Jesus  Kristus.  Molo  pe  loja,  mandate,  tangis dohot marsahit ibana manaon na jat i, alai dang moru haporseaonna, ndang  tanggal  panghirimonna  jala  ndang  muba  holongna maradophon Tuhan i.

 

Ayat 8

Upa ni haporseaon i ima tumpal hatigoran na sian Tuhan i. Haporseaon i selehonlehon ni Tuhan i, alai ulaonta ima mangaradotisa. Tumpal hatigoran i silehonlehon ni Tuhan i sahat ma i  tu  angka  na  porsea  na  manghasiholi  haroroNa.  Asa  ndang marisuang haporseaon maradophon Kristus i. Ibana do na paradehon tumpal hangoluan tu angka na manontong marhaporseaon sahat ro di ujungna. Asa ndada marisuang panghirimon maradophon Kristus i, ai di Ibana do hasisingkop ni nasa alus ni na tahaiholi di ngolunta. On ma na gabe tua jala las ni roha di ganup angka na porsea.

 

III.   Sipahusorhusoron tu Jamita

a. Ngolunta dohot panghobasion marbarita nauli ima pelean na arga diadopan ni Debata. Na margoar pelean tontu na dumenggan ma. Molo pasahat pelean, pasahaton ma na dumenggan. On ma na naeng sihobasanta songon halak na porsea na mangolu di portibi on. Ganup do hita disuru mamaritahon barita nauli dohot patuduhon parbueana sahat ro di ujungna.

b. Songon halak na porsea tu Tuhan Jesus Kristus, na marsiranggut do  hita  di  ragam  ni  angka  na  masa  di  ngolunta.  Alai  ingkon tangkas jala gomos do peoponta haporseaon dohot panghirimon i, asa  monang  hita  di  paraloan  i.  Ragam  do  ro  pangelaela  di ngolunta, boi do i masa di rumatangga, di huria, di parsaoran siganup ari, di inganan ulaon. Mual ni gogo dohot bisuk di angka na porsea ima Tuhan  Jesus Kristus. Diajari bisukNa i do  hita manahan, marhasabaron, marhasabamon mangadopi ragam ni parsirangguton i.

c. Molo    Tuhan    Jesus    Kristus    donganta    jala    tapangasahon tarhamonanghon hita ma paraloan di ngolunta. Tanda ni hamonanganta ima, sahat ro di ujung ni ngolunta hot haporseaon dohot panghirimon so marlaok.

d. Songon tema tahun Transformasi: Pengajaran Iman di Tengah Keluarga, i ma Urat ni las ni rohanta ima managam tumpal hangoluan sian asi ni roha ni Tuhan Jesus Kristus, ndada sinamot, arta, hasangapon. Asa tapeop ma na manontong i, unang na olo salpu i. molo ro marsorin angka resiko ni haporsean, unang ma madabu tu pandelean dohot ungutungut. Unang adong na manangko tua dohot las ni rohanta, ala dao umbalaga jala umarga do asi ni roha ni Tuhan Jesus di ngolunta.

Berbagi :