Sermon Jamita Partangiangan, Minggu Misericordias Domini

Sermon Jamita Partangiangan

Minggu Misericordias Domini, 19 April 2026

Lukas 1: 46 – 55

I.                Patujolo

Ende pujipujian on sian Lukas 1:46-55 ro do dung dijalo si Maria barita sian surusuruan na naeng gabegabean Mesias ibana, jala dung ditopot si Elisabet. Pamujion ni si Maria di hata Latin didok magnificat, lapatanna pasangaphon. Di tongatonga ni biar ni roha dohot longang ni roha mida ulaon ni Debata na balga i, diusehon si Maria do na di rohana laho mamuji.  Ende ni si Maria tubu di bagasan konteks paimahon na leleng ni bangso Israel. Dung marratus taon hohom songon panurirangon, nuaeng mangkuling jala marpangalaho Debata marhite parniahapan ni sada boruboru na poso sian Nasaret, i ma si Maria. Sada parompuan na sederhana do ibana na mangantusi na masa tu ibana ndada holan peristiwa biologis sambing, alai hasasaut ni bagabaga ni Debata do. Si Maria mangendehon ndang taringot tu dirina sandiri, alai taringot tu holong ni roha ni Debata na satia na paluahon bangsoNa.  Lukas 1: 46 – 47; Ende pujipujian on dipungka marhite pujipujian pribadi na mabaor sian roha. Hata jiwaku dohot rohku patuduhon na mamuji Debata do si Maria sian nasa hadirionna. Di hata Gorik, hata “megalunei” (memuliakan) marharoroan sian hata na marlapatan pabalgahon, pamer. Dipatimbul si Maria do Tuhan i, ndang laho manambai hamuliaonNa, alai laho patuduhon dohot mangokuhon hamuliaon ni Debata na pinataridahon i.  Didok si Maria do na marlas ni roha ibana mida Debata Sipalua ahu, on patuduhon ndang na so mardosa si Maria. Dipajongjong ibana do dirina di tongatonga ni angka pardosa na dohot manghaporluhon panobusion dohot haluaon. 

 

II.             Hatorangan Ni Turpuk Di

Ayat 48, ditaringoti do hata memperhitungkan na marlapatan mamereng dohot holong manang mamparrohahon secara khusus. Debata mamillit ndang marojahan tu habalgaon ni jolma, alai ala ni lomo ni roha ni asi ni rohaNa do. Hata “sude sundut dohononna martua ahu” ndang na mandok ginjang ni roha alai baliksa pangakuan do asi ni roha ni Debata di ibana na tama do tandaon salelenglelengna. Si Maria i ma gombaran ni songon dia asi ni roha patimbulhon angka na lea. Di ayat 49, diparhatopot si Maria do saluhut na masa i ulaon ni Debata do i, jala huaso dohot habadiaon ni Debata do na mangula marhite ibana.

Ayat 50 patuduhon asi ni roha ni Debata ndada holan tu si Maria, alai marsundut-sundut do asi ni rohaNa tu angka na manghabiari Ibana. Disadari si Maria do na masa tu ibana ima bagian ni padan ni Debata na dimulai sian si Abraham, ditorushon sahat tu Israel, dungi puncakna di hatutubu ni Mesias. Turpuk on patuduhon pardomuan ni Padan na Robi dohot Padan na Imbaru.

Ayat 51 manaringoti Debata na mangagohon ginjang ni roha ni jolma jala patimbulhon angka na serep marroha. Angka na ginjang roha, i ma angka na marhaposan tu habisuhon dohot hagogoonna, sahat tu na mangalo Debata. On ma gombaran ni jolma na manulak hadaulaton ni Debata.

Ayat 52 i ma gombaran ni paradoks ni Barita na Uli i. Dibalikkon Debata do tatanan ni portibi on, na gogo dipatunduk jala na gale dipatimbo. Ndang sangap si Maria, ndang marsingkola, jala ndang partogi, alai marhite ibana do ditubuhon Debata Raja ni angka raja. On ma na patoguhon na tama do Debata marsangap ala holan Ibana do na marhuaso laho mamillit ise sipangkeonNa.

Hata male dohot mamora di Ayat 53 ndada holan kondisi ekonomi alai simbol kondisi partondion do i. Na male martudutudu tu halak na sadar di haporluan ni partondionna tu Debata, jala na mamora martudutudu tu halak na puas di dirina sandiri. Hata Debata marningot asi ni rohaNa di Ayat 55 ndang na mandok na hea lupa Debata, alai na satia do Ibana di bagabagaNa. Hata ingot lapatanna Debata bertindak hombar tu bagabagaNa.

III.           Hahonaan Ni Turpuk 

Magnificat mangajarhon, panombaon na sintong dimulai sian panandaon tu Debata, ndang sian suasana ni roha. Dipasangap si Maria do Debata ndang ala ni na dihilala ibana, alai ala ni ise Ibana.  Dipasangap  si  Maria  do  Debata  ndang  ala  naung marhamulian ibana di Kristus, alai ala naung dipamasuk Debata Kristus tu bagasan ibana. Dipillit Debata do si Maria, boruboru na somal laho manubuhon Sipalua i. On ma na patoguhon prinsip asi ni roha, Debata do na patimbohon angka na lea ndang angka na gogo. Sude na masa, nang hatutubu ni Kristus, masa di toru ni huaso ni Debata na badia jala na marhuaso. Di portibi na mubauba on, ndang hea mubauba Debata, diingot do asi ni rohaNa sian sundut tu sundut

 

 

Berbagi :