Sermon Jamita, 2 Musa 15: 1 – 14

Sermon Jamita, Minggu Kantate, 3 Mei 2026

“Marende Do Ahu Tu Jahowa”

2 Musa 15: 1 – 14

I.                 Patujolo

Tung mansai balga situtu do asi ni roha ni Debata di angka na hinaholonganNa. Tarida do i marhite pambahenanNa na so habilangan. Marragam do dalan dibahen Debata laho patuduhon holong ni rohaNa i. Ndang tarlambat Debata laho mangurupi angka na porsea di Ibana. Ditingki marsitaonon jolma i, diapuli Debata do marhite hataNa laos hataNa i mampargogoihon. Suang songoni nang dingolu ni bangso Israel, dipapatar Debata do holongNa i marhite haluaon. Jumpang ma tingki na di bangso Israel manjalo haluaon na sian Debata dung jolo manaon na porsuk di parhatobanon Misir.

 

II.               Hatorangan

Sangkap ni Debata do haluaon ni bangso Israel sian parhatobanon Misir, i ma ala na marningot bagabaga naung pinasahatNa tu si Abraham,  Isak  dohot  si  Jakkob. Na  parjolo,  mangalehon  tano Kanaan, tano habaoran ni susu dohot situak ni loba gabe teanteanan di nasida. Na paduahon, mamasumasu bangso Israel gabe bangso na bolon. Na patoluhon, asa gabe pasupasu nasida tu saluhut bangso, tu sandok portibi on. Dipasaut Debata do bagabagaNa i, marhite panjouon ni Debata di si Musa na gabe partogi di bangso i rap dohot si Aron. Dipataridahon Debata do huasoNa na bolon i. Disuru Debata do si Musa manopot raja Firaun laho manogihon bangso Israel ruar sian Misir. Godang do dipatupa Debata angka tanda halongangan di tongatonga ni bangso Misir i. Asa dipaloas nasida borhat sian i.

 

Di na haruar bangso Israel sian parhatobanon Misir, dung sahat di topi laut arung, gabe muba ma roha ni si Firaun. Naeng do leleonna bangso i marhitehite 600 paranganna na marhureta hoda dohot parsihundulna. Dung jonok raja Firaun gabe mabiar situtu ma nasida, mangangguhi ma halak Israel tu Jahowa. Jala marungutungut nasida tu si Musa. Alai dipapos si Musa ma rohanasida, didok ma tu Israel: Unang hamu mabiar, marsihohot ma rohamuna jala ida hamu ma hamuliaon ni Jahowa. Dipataridahon si Musa do pos ni roha laho pasahathon diri nang ngolunasida tu adopan ni Debata marhitehite tangiang. Jala unang marpangunsandean tu pingkiran nang hagogoonna sandiri.

Diramoti jala dipaihutihut Debata do pardalanan ni bangso Israel. Pola do Debata menjamin keamanan nasida marhite Hata ni Debata sandiri, na mandok: “Ahu do marporang humongkop hamu, asal hohom hamu” (ida 2 Musa 14:14). Tanda holong ni roha ni Debata maradophon bangsoNa, Debata sandiri do marporang mangalo hatangkangon ni si Firaun na sai mambahen bangsoNa manaon na porsuk. Adong do pagantusion ni bangso israel dohot na humaliang nasida, molo marporang sada bangso maralohon bangso na asing, ndang holan jolma manang paranganna marporang alai dohot do Debata nasida. Hamonangan ni bangso ido na gabe hamonangan ni debatanasida.

 

Dung sahat bangso Israel di topi laut arung, disuru Debata ma si Musa manghindat tungkotna. Dipatoltol si Musa tanganna tu ginjang ni laut i, asa boi halak Israel mamolus sian tongatonga ni laut i, mardalan di na mahiang. Dung i, diulahon si Musa ma hombar tu hata ni Debata i. Dipatoltol si Musa ma tanganna tu ginjang ni laut. Gabe mabaor ma laut i dibahen Jahowa marhitehite alogo na pur sian purba manipat saborngin i pahiang laut i. Gabe tartulak ma angka aek i. Jadi bongot ma halak Israel tu tongatonga ni laut di na mahiang i. Gabe hira dorpi do angka aek i di siamun dohot di hambirangnasida. Molo sian pingkiran ni hajolmaonta tung so mungkin do marsirang aek di sada laut jala pola gabe dalan na mahiang, alai songon na tarsurat di Lukas 1:37 “Ai ndang adong na so tarpatupa Debata.” Halongangan bolon na pinatupa ni Debata on pataridahon panghophoponNa tu angka na niasianNa.

 

Ndang olo bangso Misir paluahon halak Israel. Ala ni tangkang ni rohana dilumba si Firaun rap dohot paranganna do bangso Israel. Alai ndang dipaloas Debata bangso i mulak tartangkup, ala ni i jongjong ma Debata, didok ma tu si Musa: Patoltol ma tanganmu tu atas laut, asa sumuang angka aek i lingkup tu halak Misir. Jadi diulahon si Musa ma hombar tu hata ni Debata. Dipatoltol si Musa ma tanganna tu atas laut, gabe sumuang ma laut i tu dalanna. Gabe maporus ma halak Misir manjumpangkon aek i, ditunggalingkon ma nasida di tongatonga ni laut i. Gabe dilungkupi aek ma angka hureta dohot angka parsihundul ro di sude parangan ni Firaun i. Ndang adong na mangolu sian nasida nanggo sada.

 

Alai anggo halak Israel mardalan do nasida di na mahiang i, di tongatonga ni laut i jala sahat ma nasida tu bariba ni laut arung i. Tarida ma huaso ni Debata na patariparhon jala paluahon bangso na hinaholongan na i tu bariba ni laut arung. Jadi dung diida halak Israel tangan na timbul, na binahen ni Jahowa tu halak Misir. Gabe mabiar ma bangso i mida Jahowa. Jala porsea nasida di Jahowa dohot di si Musa, naposoNa i. Dipuji jala dihatindangkon nasida do angka tanda halongangan na pinamasa ni Debata.

 

III.            Hatorangan Ni Turpuk

Marhaporusan Tu Jahowa. Jotjot do hita mangadopi angka na maol di bagasan ngolunta. Godang angka na bernit, nang sitaonon. Na boi ulahononta  i  ma  holan  joujou  tu  Debata  do.  Jala  marhaporseaon dohot marpos ni roha,  ndang tadingkonon ni Debata hita. Sai na lehononNa  do  pangurupion.  LehononNa  do motivasi dohot  gogo manghamonangkon paraloanta. Ala ni i, songon siihuthon Kristus hita, tung aha pe hamaolon na ro tu hita, naeng ma margogo hita mangadopi. Jala unang sumurut semangat nang haporseaonta. Holan tu Ibana ma hita marhaporusan. Jahowa do partanobatoanta jala na tuk pangalualuanta.

Sangkap ni Debata do nasaut. Sangkap ni Debata na ingkon do manjadi di ngolu ni angka na porsea. Hata ni Debata naung ruar sian Ibana tudos do i songon hadadabu ni udan dohot ambolas sian langit, jala ndang jadi mulak boti, ingkon bahenon na do lomo ni rohaNa (Jer. 55:11). Songon sangkap ni Debata di bangso Israel di turpuk on, songon i do nang di parngoluonta. Maragam do dalan ni Debata laho pasauthon sangkapNa i di ngolu ni angka na porsea di Ibana. Jala tarpatupa Ibana do tanda halongangan laho pahothon roha ni jolma i.

Taendehon jala tapuji ma angka pambahenan ni Debata. Debata do na paluahon bangsoNa. Rajumanta ma peristiwa haluaon ni angka halak na porsea sian parhatobanon dosa marhite hamamate dohot haheheon ni Tuhanta Jesus Kristus. Dipalua do hita sian dosa, sian biar dohot arsak ni roha. Ditogutogu do hita taripar sian laut haholomon i tu hatigoran na manongtong. Ala ni i tapatuduhon ma hasetiaon ta tu Ibana. Asa ramotanNa jala pargogoanNa hita tagan di hasiangan on. Songon panindangion ni bangsi Israel na manghatindangkon pambahenan ni Debata, suang songon i ma nang na porsea di tingki on. Marende mamuji Debata di bagasan na marhabadiaon. Amen.

 

Berbagi :