BAHAN JAMITA MINGGU : 1 Korint 15:1-11 "Hehe Do Jesus Di Ari Patoluhon"

 

Minggu Paskah I, 05 April 2026

Ev.   1 KORINT 15 : 1-11                    Ep.   Hosea 6 : 1 – 6                                  S.P. Kolose 3 : 13

Topik : “Hehe Do Jesus Di Ari Patoluhon”

Dipaingot apostel Paulus do huria Korint ala ragu nasida di hasintongan di haheheon ni Jesus sian namate. Ai didok nasida, songon dia ma boi masa naung mate gabe hehe muse? Ise na boi pahehehon songoni? Adong do sitindangi taringot tu haheheon i?

Laho mangalusi on diarahon apostel Paulus do nasida laho marningot barita nauli naung binegena jala jinalona. Ai nunga dibaritahon I tu nasida paboa naung mate do Kristus alani dosanta, na tartanom do Ibana jala dipahehe di ari patoluhon laos dipataridahon do dirina ndang tu sahalak (kepas, sampuludua sisean Luk.24:36-49, lobi 500 dongan, tu si Jakobus, tu Paulus). Pandohan ni apostel Paulus on ma na gabe alus di keraguan ni ruas ni huria na di Korint taringot tu haheheon ni Jesus. Adong do sitindangi taringot tu haheheon i (saksi mata), dung hehe Jesus dipataridahon do dirina tu angka siseanNa, ndada holan tu sahalak alai tu sada punguan. Namarhagogoon do Ibana hehe ala Debata do Ibana jala marhuaso do manaluhon hamatean dohot sorop ni banuatoru. Namarhagogoon do Ibana pangoluhon na mate songon naung pinatupaNa di panghobasionNa.

Na pinangido ni Debata tu huria Korint marhite apostel Paulus, laos ido naeng jumpang di hita di tingki on, dia ma i:

1. Marojahan di hasintongan ni barita nauli i ma ngolunta.

Dijalo halak korint do barita nauli na pinasahat ni apostel Paulus alai ndang di ojahan I haporseaonna di pajongjong. Dibege nasida do panindangion ni apostel Paulus taringot tu hamamate dohot haheheon ni Jesus alai tuminggilan do nasida di angka poda dohot angka habisuhon ni portibi on. Mura dope munggil haporseaon dohot pangantusion nasida binahen ni angka parbinotoan na adong diportibi on. Nang pe naung dibege nasida pangajarion taringot hamatean dohot hahehon ni Jesus, na olo masa do hadirion ni na mambege ndang manjangkon manang talu disosak hansit ni ngolu (perumpamaan penabur = Mateus 13:1-23).

Sahat tu tingki on nang pe naung leleng manjalo, tumangihon, dohot gumuruhon barita nauli i, olo dope lobi porsea jolma di barita, mitos dohot angka barita na pinasahat ni portibi on, gabe mambahen ragu di hasintongan ni hata ni Debata dohot di haheheon ni Jesus.

Lam maju portibi on, lam timbo do parbinotoan, pangantusion jala lam bagas do logika berpikir ni jolma. Na boi masa do penelitian dohot analisa ni angka na pistar mangharhari barita na tarsurat di Bibel i. Sai mullop do angka pandangan naimbaru taringot tu pokok-pokok ni haporseaon secara khusus, sai adong do na sai torus manguhal di hasintongan ni natarsurat di bibel i marhite angka arkeolog, tokoh-tokoh sejarah, dohot angka na meneliti angka naskah manang surat-surat natumua, alai sudei ndang gabe menyangkal di hasintongan ni hata ni Debata. Hasintongan ni hata ni Debata hot do salelenglelengna jala ndang muba, ala hasintongan na tarsurat di bibel i na ro sian Debata do i na pinasahatna marhite tondiNa. Jadi unang holan manangihon dohot mangguruhon hata ni Debata, ingkon lam dihaporseai do hasintonganna jala di hangoluhon.

Mansai tangkas do didok ia hata ni Debata na dibaritahon tu nasida (halak Korint uju i) ido gabe parhitean gabe malua. On do nanidokna haluaon alani barita nauli manang hata ni Debata (Sola scriptura). Nanidokna dison paboa Hata ni Debata na tarsurat di Bibel i, ido standart na tumimbo na mambohali ganup angka naporsea di rumang ni angka pangalaho na denggan. Ndang adong otoritas na tumimbo na sarupa dohot bibel i na patoranghon taringot tu standar na manogunogu jolma di haporseaon dohot di ngolu hakristenon. Ndada holan hata natarsurat sambing na tarsurat di bibel i. Holan di Bibel ido tarsurat pangantusion taringot tu haluaon sian dosa na porlu di jolma na dipatupa Debata marhite panobusion ni Jesus.

2. Ala Haheheon ni Jesus : Ndang magopo hita porsea

Molo didok magopo lapatanna ndang marguna manang dang marlapatan; boi do holan napalojalojahon manang songon na manampul alogo ( didok di buku parjamita). Mansai torop do jolma namandok ulaonna, haburjuonna, haringgasonna, pangoloionna, haporseaonna dohot angka partangiangonna "magopo”. Torop na mandok na so adong lapatan ni ibadahna dohot pelean na pinasahatna, magopo sude, ninna.

Alai marhite haheheon ni Jesus mansai tangkas diondolhon naso adong magopo angka nadenggan naung taulahon. Mansai arga barita taringot tu haheheon ni Jesus. Alai ndada holan i, hinorhon ni haheheonNa i gabe lam patar ma tu hita jolma, paboa huaso hagogoonNa na so boi diihoti hamatean manang banua toru; na so adong na so mungkin di bagasan Jesus (Luk 1:37).

Haheheon ni Jesus didok John MacArthur: digombarhon songon jantung: na mamompa mudar mambahen sude bagian ni pamatang gabe mangolu (sama seperti jantung memompa darah yang memberi kehidupan ke setiap bagian tubuh). Haheheon ni Jesus gabe poros dan inti ni sude pangajarion dohot panindangion di barita nauli. Molo ndang hehe Jesus i, hakristenon boi do gabe barita sambing, angan-angan jala gabe sipaotooto. Alani haheheon ni Jesus i, ndang magopo hita porsea. Nunga dibaritahon Jesus hian tu angka siseanna na ingkon marsitaonon Ibana, jala mate dungi hehe di ari patoluhon, jala songon na binaritahon ni Jesus ido na niadopanNa laho paluahon jolma pardosa. Ndada holan Jesus mamaritahon i, dao andorang so tubu Jesus, nunga dibaritahon angka panurirang na ingkon marsitaonon anak ni jolma i (Jesaya 53: Hamba Tuhan yang menderita). Asa boi ma dohononta : Kebangkitan adalah peristiwa yang mengesahkan iman Kristen (1 Korint 15:17). Mansai balga do panghorhon ni haheheon ni Jesus di hita, ai marhite haheheon i gabe jumpang ma di hita: parjolo: Kepastian di hasesaan ni dosa, ala marhite Ibana do sesa dosanta jala digarar utang ni dosanta. Paduahon :Adong Jaminan di hangoluan na manontong, jaminan di haheheon ni angka naporsea. Patoluhon: Dipatandahon tu hita: Ibana do mual ni hagogoon di angka naporsea.

Molo dipabotohon tu hita haheheon ni Jesus, gabe gogo do i di hita angka na porsea laho mangulahon dohot manghangoluhon hataNa jala mangalo angka dosa dohot pangelaela ni sibolis dohot tondi haportibion. Selamat paskah. Amen.

Ditulis Oleh : Pdt. Idris Simbolon                               

Berbagi :