BAHAN JAMITA EVANGELIUM MINGGU - 2 MUSA 14: 19 – 31

 

BAHAN JAMITA EVANGELIUM

MINGGU XV DUNG TRINITATIS

MINGGU PARTNERSHIP

MINGGU, 13 SEPTEMBER 2026

2 MUSA 14: 19 – 31

 

JAHOWA PATUPAHON PARULAON NA BOLON TU BANGSONA

Patujolo

            Bangso Israel dipillit Debata gabe bangsoNa mamungka sian ombas ni si Abraham, na diboan Debata ibana sian huta ni natorasna di Ur tu huta Haran. Sian i ma nasida bungkas laos marhuta di huta Kanaan. Alai uju di ombas ni si Jakob (Pahompu ni si Abraham), hinorhon ni na masa haleonon di huta Kanaan, bungkas do si Jakob na marganti goar gabe si Israel dohot angka gomparanna tu tano Misir, disi ma nasida maringan lelengna 430 (opat ratus tolu pulu) taon.

Di tingki ni si Musa, dijou Debata do ibana gabe uluan mamboan bangso Israel haruar sian tano Misir. Denggan do nian dipangido si Musa tu Uluan ni bangso Misir manang Raja Parao, asa dipasiat raja i nasida mulak tu huta nasida di Kanaan. Ndang apala ditolopi raja Parao  sangkap ni bangso Israel i, Ala nunga sanga didai Halak Misir tabo ni na marparhatobanhon bangso Israel i.

Alai ganup na sinangkapan ni Debata, ndang adong na tuk laho mangambati i. Ido na patar uju i, ala so dipasiat Raja Parao mulak bangso Israel tu huta nasida, gabe di pamasa Debata do di 10 (sampulu) uhum (Ind. Tulah) di huta Misir. Nang pe dibahen Debata uhum na pasingkat sorin, alai sai tongtong do martangkang ni roha si Parao. Alani i, dipamasa Tuhan ma uhum na umborat jala na umbalga di huta Misir tarlobi tu nasa halak Misir, ima marmatean nasa baoa siangkangan di ruma tangga ni nasida. Hinorhon ni i, ndang tarambatan ni si Parao be ingkon haruar Halak Israel sian Misir.

Dung marsaro bangso i di parhorsihan (Padang Pasir), di borngin na i, bungkas ma nasida haruar sian Misir. Dung sahat barita i tu si Parao, disuru si Parao ma asa borhat angka soldaduna laho mangadu bangso i, laho mangambati Halak Israel haruar sian tano Misir, laos masa ma angka na masa, ima na digurithon di turpuk jamita on.

 

Hatorangan

1.        Ndang dong na so tarpatupa Debata

Hombar tu parenta ni raja Parao, pintor sigop do tentara ni halak Misir i mangadu Halak Israel naung mardalan manadinghon Misir. Marhureta jala marhoda do Tentara Misir i, hape halak Israel mardalan pat. Marnida na masa i, sasintongna ndang apala na maol nian tentara Misir i laho manangkup Halak Israel, laho mamaksa nasida asa mulak tu tano Misir. Alai idama, ndang boi dapot diadu tentara Misir i Halak Israel, boasa? Dison ma hataridaan ni huaso ni Debata na so hasuhatan, ai ndang adong na so tarpatupa Debata, ai guru dokNa do nasa na adong.

Di turpuk on, digurithon do huaso ni Debata na so hatudosan i. Toho, do borngin do uju i di na mardalan i Halak Israel haruar sian Misir, jala na pasti, molo borngin mansai holom situtu do di halongonan i. Alai ala di jolo do Halak Israel, sasintongna ndang apala gabe pangambati bolon na holom i. Ai boi do dadap-dadapon ni tentara i dalan i, marhite na paihut-ihut suara ni pat ni na totop i di pardalanan i. Antong dia do rahasiana umbahen na so boi diadu tentara i bangso Israel i.

Mansai patar do na pinatupa ni Debata paluahon bangsoNa, ima marhite na mangatur partording (urutan) ni pardalan ni bangso i. Dimulana, suru-suruan ni Debata jongjong jala mardalan di jolo ni halak Israel, suang songon i nang ombun marddalan di jolo ni bangso i. Alai dung jonok tentara ni Mesir tu bangso i, humusor ma suru-suruan i tu pudi ni bangso I, laos ombun pe diholangholangi ma uduran ni bangso i sian tentar ni Misir i. Di tingki i masa do halongangan, ai sambariba ombun i holom na sambariba nari marsinondang, gabe ndang masipadohonan antara bangso Israel dohot tentara ni Misir, nang pe pajonok-jonok nasida.

Nang pe naung dibolus jala malua bangso i, sian persoalan na sada, ndada naung selamat nasida. Alana di jolo nasida adong do laut na digoari laut Teberau (jotjot do didok laut Merah). Diida bangso i do hambatan na umbalga dope di pardalanan nasida i. Nian nunga didai nasida huaso ni Debata na palua nasida, alai marnida hambatan na umbalga dope, ndang tagamon so lomos roha ni bangso i. Alai si Musa songon partogi ni bangso i, tongtong do ibana mangolu dohot mangulahon parsuru ni Debata. Disuru Debata di ibana asa dipatoltol tanganna tu laut i, masa ma tutu na so dung masa, masisi do aek ni laut i tu hambirang dohot tu siamun, gabe boi ma bangso i mardalan manaripari laut i. Mangihuthon angka pandapot ni na malo, ia bidang ni laut i ima +/- 16 Km. Hinorhon ni huaso ni Tuhan I, selamat do nasida sian mara bolon i.

 

2.        Talu do hagogoon ni portibi on.

Diihuthon tentara Misir do manaripari laut Teberau naung mahiang i, alai lohot do ban ni hureta nasida tu gambo ni laut i, gabe maol ditait hoda i. Diuji tentara i do laho pature ban ni hureta i, alai nunga tarlambat. Ala mandapothon parbinsar ni mata ni ari, mandapothon manogot ni ari, disarea Debata do si Musa, asa dipatoltol tanganna muse tu laut na mahiang. Holan diulahon si Musa songon na nidok ni Tuhan i, pintor sumuang masitomuan ma muse aek ni laut i, gabe dinongnong aek ni laut i ma saluhut tentara ni Misir i rap dohot angka hoda nang hureta i.

Sada na patar merhite na masa on, paboa tung songon dia pe hape hagogoon ni angka na di portibi on, ndang tuk gogona laho manaluhon Debata. Ai tangkas tarida do hagogoon ni tentara ni Halak Misir i, nasida marhureta, marhoda laho mangadu bangso Israel na mardalan pat, alai ndang taradu tentara ni Misir i. Suang songon i tentara ni Misir mamangke hureta laho mamolus laut naung mahiang i, dirimpu roha nasida do boi humatop nasida manaripari laut i, hape laos hureta i do mambahen nasida tarborot. Na asing muse, somalna angka tentara nunga terlatih marlange di laut, alai keahlian nasida i ndang menjamin paluahon nasida sian panahop ni aek ni laut i. Jadi hagogon ni portibi on, ndang margogo marimbanghon hagogon ni Debata.    

 

 

Hahonaan

Minggu tanggal 13 September 2026, digoari do Minggu XV Dung Trinitatis, na marlapatan minggu parningotan hasitolusadaon ni Debata, ima Debata Ama, Anak dohot Tondi Porbadia. Jamita bolon di minggu on na dienet sian buku ni si Musa na paingothon, Tangan ni Debata na gogo i, holan i do na tuk paluahon bangso i sian parhatobanon ni halak Misir.

Sian turpuk jamita on adong do piga-piga siauhononta, ima:

1.    Bangso na pinillit ni Jahowa. Uju dipillit Debata bangsoNa, disi do naeng papataron ni Debata holongna tu bangso na i. Bangso Israel dipillit jala dipapulik Debata, asa gabe malua sian parhatobanon, jala marhasonangan di bagasan Tuhan i. sahat ro di tingki on, holongNa ndang muba, sai disangkapi Debata do asa taruli haluaon jolma sian hinaragam ni parhatobanon, baik sian parhatobanon no dosa, parhatobanon ni Halak na asing, parhatobanon ni dirina sandiri. Antong pangasahon ma Jahowa di sandok ngolum.

2.    Debata manaluhon tentara ni Misir marhite huasoNa sandiri. Di angka paraloan na sipata sonson ro tu hita, taingotma paboa Debata tuk do huasona pamonang hita, asal ma hohom hita.

3.    Di minggu paralealeon di taon 2026, huria HKI dohot EKK Hamm disungguli asa tongtong gabe huria na saling masiurupan dohot masitangiangan. Amin.

Berbagi :