Sermon Epistel-2 Musa 19:1-6

 

Sermon Epistel -JAMITA PARTANGIANGAN 

MINGGU VIII Dung Trinitatis 

2 Musa 19:1-6

 

1.   Patujolo

Di hata Heber, buku 2 Musa digoari “Syemot” jala di hata Gorik didok   “Exodus” lapatanna   “ruar”   manang   “laho”.   Adong   do peristiwa na mansai arga idaonta di buku 2 Musa on - Keluaran, ima sada   moment   bersejarah   –   Sada   peristiwa   nabolon   naso   boi tarlupahon ima taringot tu pardalanan ni bangso  Israel dung tolu bulan nasida ruar sian tano Misir sahat ma nasida di tu halongonan Sinai “Tano horsik. Sinai on ma na digoari inganan na mansai sakral, ai disi ma Debata naeng patupa padan "perjanjian” tu bangso naung pinipalua-Na i. Molo pe dipalua Debata nasida, ndada martujuan asa gabe bangso na bebas so maraturan nasida, alai asa gabe bangso na niatur ni holong ni roha ni Debata do nasida jala badia, Ai nabadia do Debata,  Adil,  Debata  parsintong  jala  parasiroha.  Tung dihalungunhon roha ni bangso i do naeng pajumpang dohot Debata, jala mansai arga situtu do parjumpangan i diroha nasida atikpe holan marhite si Musa naposoNa. Boasa songoni sihol ni roha nasida ima ala naung dipalua Debata nasida sian parhatobanan Misir dohot sian tangan ni angka soldaduna.   Di buku on disurathon do songon dia haluaon ni bangso Israel sian tano parhatobanan Misir, jala disi ma tong dipatuduhon songon dia bangso Israel gabe bangso ni Debata jala manean tano na pinarbaga ni Debata tu nasida mamungka sian ompunasida. Ihut tusi dipatorang do songon dia hapapatar ni huaso ni Debata di parngoluon ni bangso Israel di adopan ni angka bangso na asing. Songon dia muse Debata pahot padanNa dohot bangso i marhitehite angka uhum dohot patik, jala dipajongjong nasida undungundung ni Debata.

 

2.   Hatorangan Ni Turpuk

Marhasurungan do bangso Israel sian angka bangso na asing di adopan ni Debata:

    Naparjolo, Dipaloas Debata do bangso i marnida hapapatar ni huasoNa. Hata “hapapatar ni huasoNa” dipangantusion na umbagas dos lapatanna “Marnida jala manghilala - Na ni’idamuna manang na hinilalamuna. Lapatanna disi ndang holan hatahata sambing huaso manang hagogoon ni Debata, na tutu situtu do i masa na niida jala masa di tongatonga ni ngolu ni bangso Israel.

    Napaduahon, didok Debata tu bangso i ”Sian sude bangso hamu ma na gabe ampunakKu na mansai arga” Ay. 5, lapatanna “Gabe hasianKu ma hamu”. Sungkunsungkun; Boasa ingkon dipatandahon jala dipapatar Debata hataNa, huasoNa tu bangso israel? jala boasa gabe bangso hasian ni Debata nasida? Tontu adong do sangkap ni Debata disi. Dia mai? Ima patuduhon na marpadan do Debata tu bangso Israel na paluaon ni Debata nasida sian parhuaso (tangan na gogo) di portibion. Alasan na mangihut hombar tu panjouon i patuduhon ‘Asi ni rohaNa” asa gabe bangso na merdeka, ‘jasmani dan rohani” ima patuduhon asi dohot holong ni roha ni Debata tu bangso Israel; dikhususkan – dipapulik asa gabe sisomba Debata (Ibana gabe Debatana – Jala Israel gabe bangso na hinaholongan ni Debata). Dipapatar Debata hataNa, huasoNa tu bangsoNa - hita jolma? Asa adong hata si dohononta, si pataridahononta, si patujolohononta tu angka pinomparta. Antong nasa silehonlehon ni Debata na adong di hita ndada laho parburnang diri i pangkeonta, alai gabe dalan ma i laho manghatindanghon asiniroha, huaso, dohot hasangapon ni Debata.

        Asa  tahe  unang  holan  arta  na  di  hasiangan  on  taetong  na  gabe siteanon tu angka pinomparta. Alai di ginjang ni saluhutna i ingkon Debata do na parjolo tabahen gabe arta siteanteanon tu angka pinomparta. Ra molo tasungkun tu portibion (Batak) aha do kunci ni sukses? Pintor hatop do ra alus mandok, oh adong 3 H, dia mai? Hamoraon, hagabeon dohot hasangapon. Onma na jotjot dipakke portibion    songon “Suhatsuhat    –    Standart”    ni    kesuksesan di haportibion. Antong songon dia do suhatsuhat – standart ni kesuksesan      mangihuthothon      hata      ni      Debata?      Kunci kesuksesan hombar  tu  hata  ni  Debata  ima,  “Manangihon  hata  ni Debata     jala     Mangaradoti     padan     nabinahen     ni     Debata”.

        Lapatanna kunci  ni  kesuksesan di  adopan  ni  Debata  ndada  holan manangihon alai ingkon dohot do tong mangaradoti. Manangihon jala  mangaradoti  hata  manang  padan  ni  Debata.  I  do kunci  ni kesuksesan di ngolu ni halak na porsea. Naboi jala na talup sipangasahononta didok di turpuk on, “Ingkon holan Debata do”. Molo angka jolma do na tapangasahon tarbatas do gogona jala ndang manongtong i. Alai molo Debata do tapangasahon ndang na hasuhatan huasoNa jala ndang marujung. Hata ni Debata mandok “hasianHu ma ho sian nasa bangso, ai gok di Ahu do liat portibi on – tudosanna ima sumurung manang hasian, arta jala nampuna ni Debata”.  Molo naung didok sumurung manang hasian, tontu angka sipatujolohononhon ma on sian nasa na ringkot. Alai ndada holan maimaima hita manang holan manjalo sambing sian Debata gabe ndang mangulahon manang aha, alai molo naung didok sumurung, ba parangenta pe tutu ingkon sumurung ma sian angka halak na asing na so mananda Debata. Ingkon tarida do paboa na anak ni Debata hita, ampuna ni Debata. Ingkon tarida ma i di parngoluonta si ganup ari. Molo di turpuk ni Epistelta didok: "Aha ma gunana ale angka donganhu molo didok halak, di ibana do haporseaon alai ndang adong di ibana pangulaon?" (ida Jak. 2:14). Didok muse di ayat 17 anggo so adong pangulaon ni haporseaon i, naung mate do hadirionna. Lapatanna disi molo olo do hita manangihon jala mangaradoti hata ni Debata, tapataridahon songon anak ni Debata hita di ngolunta gabe hasian ni Debata ma hita. Gabe sumurung ma hita di adopan ni Debata, jala gabe angka sipapatujoloon ni Debata ma hita sian nasa jolma.

 

III. Hahonaan Ni Turpuk

Marojahan tu topik ni minggunta “Panumpak ni Debata tu angka na pinillitNa – Karya Allah bagi orang pilihanNya” Marhadomuan tu tema orientasi pelayanan ni hurianta HKBP di taon 2026 on “Transformasi:  Pengajaran  Iman  Di  Tengah  Keluarga”,  na  dienet sian Buku 5 Musa 6: 4 disungguli do hita:

“Debata  do  patupa  haluaon  tu  bangsoNa  ruar  sian  parhatobanan Misir hombar tu sangkap ni rohaNa dohot ala asi ni rohaNa. Marhite i dipasunggulhon ma tu bangso i marhite si Musa asa tung ditangihon

nasida soara ni Debata jala diradoti nasida padan naung binahen ni Debata tu nasida, ima patuduhon na “Hasian ni Debata nasida sian nasa bangso” jala “manjadi harajaon malimmalim ma hamu di Ahu jala bangso nabadia”. Molo diradoti nasida songon dia naung tinonahon ni Debata tu nasida, ima patuduhon natutu situtu nasida songon  “Arta  hasianNa  –  harta  kesayanganNya”  angka  naung pinalua ni Debata.

Dipartingkianta nuaeng, targoar do hita bangso ni Debata na gabe hasahatan dohot partonaan ni Debata, Boi tapatudos tu 1 Petrus 2: 9 na mandok “Alai marga na pinillit do hamu, hamalimon na raja, bangso  na  badia,  houm  na  ginomgomanNa,  asa  tung  dibaritahon hamu denggan ni harohaon ni Ibana, naung manjou hamu sian na holom tu hatiuron halongangan “i.   Ala angka partonaan ni Debata do hita, ingkon tangkas do jumolo “Hangoluhononta” hata ni Debata naung taguruhon i – na mamolin i, jala ingkon lam tu ringgas na rohanta pasahathon hata i di ganup tingki – di ganup inganan. Laos ido di’igil Tema Orientasi pelayanan HKBP 2026 “Transformasi: Pengajaran Iman di Tengah Keluarga” 2 Musa 6:4”. Diondolhon do marhite tema orientasi pelayanan on tu angka natoras di tongatonga ni  keluarga  asa  gabe  “Ecclesia  domestica”  (Gereja  kecil/sekolah iman utama), Keluarga ndada holan sebatas inganan parmianan sambing “Rumahku adalah istanaku”, alai andul sian i naeng suan tu roha ni angka ianakkon songon hata pandohan “Rumahku adalah gerejaku”.

        Satia do Debata dipadanNa, ingkon songoni ma ganup na porsea di Tuhan Jesus Kristus siboan haluaon dihita ingkon “Satia tumangihon dohot umpeop hata ni Debata, asa gabe halak na martua hita (Pat. Luk.  11:  28).  Hasatiaan  i  ndada  holan  satia  manangihon  hata  ni Tuhan i, alai ingkon satia do nang mangaradoti hata ni Debata. Molo didok mangaradoti, tontu ingkon di bagasan pangantusion do, dibege, dipahusorhusor, dipeop jala diulahon. Molo naung taradoti hata ni Tuhan i, i do pataridahon tutu situtu angka napinillit ni Debata do hita, naung parsidohot hita mambahen hata ni Debata gabe siteanon tu angka pinomparta. Molo naung taradoti hata ni Debata, gabe anak hasian  ni  Debata  ma  hita,  gabe  sumurung  ma  hita  di  adopan  ni Debata sian nasa jolma na adong liat portibi on, asa gabe partohap hita sogot, rodi angka pinomparta di harajaon ni Debata, di banuaginjang i. Amen.

Berbagi :