BAHAN JAMITA
PARTANGIANGAN
JEREMIA 31:31-34
Di
hita halak Batak adong hata; si JOGAL BAUT. On ma hata namartudutudu tu sada
pangalaho ni halak Batak na maol situtu dohonon hata, ndang olo muba, sai naeng
holan na dirohana i na saut. Molo dipardonganon, dipasisi halak do on, molo
dipunguan, tu mangon nama halak sisongonon dipahaluar sian punguan i. Pitu
pangkail sada pandangguri, sude do ndang dapotan. Molo ala ni sahalak di
punguan sai sega, tumangon ma nasalak i dipahaluar asa taruli punguan i. Molo
sada dakdanak digoar si jogal baut, ndang tarpasingot be on, bulus nama
dipasombu manuntun lomona. Sumuang songon ima nang bangso Israel. Holan ala asi
ni roha ni Debata do marnida huhut mambege angguk gobar nasida na dipasiaksiak
di Misir umbahen dipalua. Dung dipalua bangso i marhite huaso hagogoon ni
Debata, dipardalanan di halongonan, nungga mamungka bada nasida marungurungut
tu si Musa ala ni tapian naso adong (Masa dohot Meriba). Dung simpul i, diulahi
muse marungutungut mamungka bada tu si Musa ala soada sipanganon juhut dohot
roti. Dung simpul muse dipungka muse bada tu si Harun, manopa ganaan anak ni lombu
sian sere nasida bahen sombaon nasida, dung simpul i muse, ndang olo nasida
masuk tu tano Kanaan, ala ni biarna marnida pangisini tano Kanaan. Tutu si
jogal baut do bangso Israel on. Nga patut diripashon, ai so olo muba, sai
mamungka dosa do mangalo huhut mansoadahon Debata nasida. Alai parasi roha jala
pardenggan basa do Jahowa, lambat tarrimas jala parasi roha godang, ndang
dibahen tu hita hombar tu angka dosanta, jala ndang dibaloshon tu hita hombar
tu angka hajahatonta (Psal.103:8,10).
Ndang dung adong jumpa dihasianganon
songon Debata natasomba dibagasan Jesus, parholong roha. Molo taingot dimasa hasipelebeguon
dope tano batak, ima angka haporseaon ni omputa. Holan sala otik, nga marsahit
dibahen, sala otik nga peol pamangan i, sala otik, olo rintik dibahen, holan so
ro manomba, nungga ro mangarupa mangido mamaksa pelean sipasahaton tu sombaonna
i. Alai anggo Debata situtu, na tangkas tatanda di bagasan Jesus, balga hian do
holong ni rohaNa tu portibion, tu salahut hita angka na tinompaNa, sai songon
mataniari na marsinondang ganuo ari, atik pe so adong namandok mauliate, atik
pe so adong na mamuji, tongtong mambahen na uli na denggan tu liat portibion
marsite sinondangna.
Suang
songon i do nang Debata tu bangso Israel, ndang na bangso nai diganti, manang
jolma i diganti, ditopa na imbaru. Alai, padan ni Debata sandiri dipauba dalan
paluahon hajolmaon sian hamagoan tanda holong ni roha ni Tuhan i tu hita na
porsea di ibana. Lehonon ni Tuhan i ma, patikNa tu ateate dohot tu roha ni
bangsoNa, ndada ala ni uli, arga, tongam, bisuk, hamoraon, hajagoon ni bangso
i, so holan ala ni, holong ni Debata namarpamuati rohaNa mida hajahaton dahot
dosa ni bangso i. Di bahen i, binsan tarbahen dope, tahangoluhon ma balga ni
holong ni Debata
di hita, marhite namangulahon holong
tu saluhut hum manisia dohot tu saluhut jadijadian ni Tuhan i, di ngolunta siganup
ari.
Ditulis Oleh : Pdt.
Rio Pendi Nababan
0 Komentar